បញ្ហាលុយកាក់ បានក្លាយជាប្រធានបទដ៏ក្តៅគគុកមួយ និងមានបង្ករឿងក្តីក្តាំជាច្រើន ខណៈរឿងមួយចំនួនអាចឈានដល់កម្រិតទោសក្រមរដ្ឋប្បវេណី ឬព្រហ្មទណ្ឌឯណោះ។ ខាងក្រោមនេះ គឺជារឿងធំៗ២ ដែលម្ចាស់បំណុល មិនអាចធ្វើដាក់កូនបំណុលបាន៖

១/. មិនអាចយកការប្រាក់លើស ១៨%ក្នុង១ឆ្នាំ៖ យោងតាមសេចក្តីប្រកាសរបស់ ក្រសួងយុត្តិធម៌ លេខ128 កយ ប្រក/11 ចុះនាថ្ងៃទី ២១ ខែ ធ្នូ ឆ្នាំ ២០១១ បានបង្ហាញថា ម្ចាស់បំណុលអាចយកអត្រាការប្រាក់ខ្ពស់បំផុតត្រឹម ១៨% ប៉ុណ្ណោះក្នុង ១ឆ្នាំ។ ការបើភាគីបានព្រមព្រៀងលើសពីនេះត្រូវបន្ថយមកត្រឹមច្បាប់កំណត់ កណីដែលមានការសងរួចហើយ នោះការប្រាក់ដែលលើសត្រូវដាក់បញ្ចូលជាការកាត់សងប្រាក់ដើមវិញ។

ការខ្ចីបរិភោគដោយភ្ជាប់ការប្រាក់ ត្រូវធ្វើតាមការព្រមព្រៀងជាលិខិតលាយលក្ខណ៍អក្សរ ដោយមានការចុះហត្ថលេខារបស់អ្នកខ្ចីផងដែរ។ ការខ្ចីបរិភោគដោយភ្ជាប់ការប្រាក់ ដែលធ្វើឡើងដោយផ្ទាល់មាត់ ឬធ្វើឡើងជាលាយលក្ខណ៍អក្សរដោយមានស្នាមម្រាមដៃរបស់អ្នកខ្ចី ច្បាប់ពុំបានទទួលស្គាល់នូវអានុភាពឡើយ (ក្រមរដ្ឋប្បវេណី, មាត្រា៥៨៣, កថាខណ្ឌ៣)។

២/. បង្ហោះរូបកូនបំណុលជាសាធារណៈ៖ សាស្រ្តាចារច្បាប់ អ្នកស្រី ម៉ឹង វ៉ាន់ឌី បានលើកឡើងថា “ប្រសិនបើម្ចាស់បំណុលបង្ហោះរូបកូនបំណុលលើបណ្ដាញសង្គម ឬជេរប្រមាថកូនបំណុល គឺជាការខុសច្បាប់”។ បើទោះបីជាការជំពាក់បំណុលនោះវាជាការពិតក្ដី តែច្បាប់រក្សាការពារនូវភាពឯកជនជូនបុគ្គល។

យោងតាមមាត្រា ៣០៥ នៃក្រមព្រហ្មទណ្ឌ បទបរិហាកេរ្តិ៍ជាសាធារណៈ បានចែងថា “គ្រប់ការអះអាងបំផ្លើស ឬការទំលាក់កំហុសដោយអសុទ្ធចិត្តលើអំពើណាមួយ ដែលនាំឱ្យប៉ះពាល់ដល់កិត្តិយស ឬកិត្តិសព្ទនៃបុគ្គល ឬស្ថាប័ន គឺជាការបរិហាកេរ្តិ៍។ ត្រូវពិន័យជាប្រាក់ពី ១០០,០០០ (មួយសែន) រៀល ដល់ ១០,០០០,០០០ (ដប់លាន) រៀល។”

យ៉ាងណាមិញ​ បើទោះបីមានច្បាប់ទាំងពីរខាងលើ ចំពោះកូនបំណុលការរត់គេចពីទំនួលខុសត្រូវពុំមែនជាមធ្យោបាយល្អឡើយ អ្វីគ្រប់យ៉ាងសុទ្ធសឹងតែមានដំណោះស្រាយ និងផ្លូវចេញដ៏ល្អប្រសើរ។ ដូច្នេះចូរស្វះស្វែងរកវិធីសាស្ត្រឲ្យមានប្រសិទ្ធភាពតាមដែលខ្លួនអាចធ្វើបាន ប្រសិនបើអ្នកព្យាយាមអស់លទ្ធិភាពហើយនៅតែរកច្រកចេញមិនឃើញទៀត អ្នកគួរតែទៅជួបអ្នកជំនាញដើម្បីឲ្យពួកគេជួយផ្តល់ដំបូន្មានប្រឹក្សាយោបល់ ឬយុទ្ធសាស្ត្រដើម្បីដោះស្រាយអ្វីដែលអ្នកកំពុងមានបញ្ហាប្រឈម៕

អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ បញ្ជាទិញតាម  https://t.me/BusinessCambodiaBook