កាលពីពេលថ្មីៗនេះក្រុមហ៊ុន Tesla បានធ្វើការបញ្ចុះតម្លៃទៅលើរថយន្តអគ្គិសនីរបស់ខ្លួន ៤ ម៉ូដែល ចាប់ពី ២% ដល់ ៦% ដោយក្នុងនោះរួមមានម៉ូដែល ៖ Tesla Model 3 បញ្ចុះតម្លៃ ១,០០០ ដុល្លារ Tesla Model Y បញ្ចុះតម្លៃ ២,០០០ ដុល្លារ Tesla Model S និង Model X បញ្ចុះតម្លៃ ៥,០០០ ដុល្លារ ។
យ៉ាងណាមិញចំពោះ ការបញ្ចុះតម្លៃនេះមិនមែនជាលើកទីមួយទេសម្រាប់ក្រុមហ៊ុន Tesla ពោលគឺនេះជាលើកទី៥ហើយ ដែលក្រុមហ៊ុន Tesla បានធ្វើការបញ្ចុះតម្លៃទៅលើរថយន្តរបស់ខ្លួន។ចំណែកឯ មូលហេតុនៃការបញ្ចុះតម្លៃរថយន្តអគ្គិសនីរបស់ក្រុមហ៊ុន Tesla នេះគឺដោយសារតែ រដ្ឋាភិបាលរបស់សហរដ្ឋអាមេរិក បានចាប់ផ្តើមធ្វើការបន្ធូបន្ថយពន្ធសម្រាប់រថយន្តអគ្គិសនីដល់ទៅ ៧,៥០០ដុល្លារ។នេះបើយោងតាមការចុះផ្សាយរបស់សារព័ត៌មាន Reuters ។
ប្រភពដដែលបានបន្តឱ្យដឹងទៀតថា ការបញ្ចុះតម្លៃរថយន្តនេះអាចនឹងធ្វើឱ្យប្រាក់ចំណេញរបស់ក្រុមហ៊ុន Tesla របស់មហាសេដ្ឋី Elon Musk អាចនឹងមានការធ្លាក់ចុះ ពោលគឺវានឹងធ្វើឱ្យមានផលប៉ះពាល់ទៅដល់ការចំណាយថ្លៃដើមផ្សេងៗ។
ប៉ុន្តែទោះជាយ៉ាងណាក្តី ក្រុមហ៊ុនផលិតរថយន្តអគ្គិសនីមួយនេះនៅតែមានគោលជំហររឹងមាំចំពោះគោលដៅរបស់ខ្លួនដែលរំពឹងថានៅក្នុងឆ្នាំ ២០២៣ នេះ Tesla នឹងអាចលក់រថយន្តបាន ១.៨លានគ្រឿង ខណៈពេលដែលកាលពីដើមសប្តាហ៍ត្រីមាសទី ១ឆ្នាំ ២០២៣នេះ ក្រុមហ៊ុន Tesla អាចលក់រថយន្តបាន ៤២៣,០០០ គ្រឿង កើនឡើង ៤% ធៀបនឹងត្រីមាសមុន៕
អត្ថបទដោយ៖សម្បត្តិ សុខឡាង
