រោងចក្រកាត់ដេរសម្លៀកបំពាក់ម៉ាក Adidas ដែលជាយីហោសម្លៀកបំពាក់ដ៏ល្បីល្បាញរបស់ពិភពលោក គ្រោងនឹងបើកដំណើរការក្នុងពេលឆាប់ៗខាងមុខនៅក្នុងខេត្ដកណ្ដាល។ ដោយរោងចក្រនេះត្រូវបានវិនិយោគដោយក្រុមហ៊ុន Sunfair Garment Co., Ltd.។ នៅពេលបើកដំណើរការគម្រោងនេះនឹងផ្ដល់ឱកាសការងារជូនប្រជាពលរដ្ឋចំនួន ៤ ពាន់កន្លែងថែមទៀតផង។
យោងតាមការដកស្រង់ពីក្រុមប្រឹក្សាអភិវឌ្ឍន៍កម្ពុជា បានឲ្យដឹងថា រោងចក្រដ៏ធំខាងលើត្រូវបានសាងសង់លើផ្ទៃដីទំហំប្រមាណ ៣៣ហិកតា មានទីតាំងស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប កណ្តាល។ ហើយនៅថ្ងៃទី១៧ ខែមករា ឆ្នាំ២០២៥ នេះឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ក៏បានអញ្ជើញចុះពិនិត្យដំណើរការសាងសង់រោងចក្រនេះផងដែរ មុនពេលដែលឯកឧត្ដមអញ្ជើញចូលរួមពិធីសម្ពោធបើកឱ្យដំណើរការរោងចក្រផលិតស្រោមដៃរបស់ក្រុមហ៊ុន HESTRA (CAMBODIA) Co., Ltd.។
សូមជម្រាបថា ក្រុមហ៊ុន Sunfair Garment Co., Ltd. ធ្វើការវិនិយោគបង្កើតរោងចក្រកាត់ដេរសម្លៀកបំពាក់ម៉ាក Adidas នេះដើម្បីនាំចេញទៅបណ្តាប្រទេសអាស៊ាន សហរដ្ឋអាម៉េរិក និងអឺរ៉ុប។ ដោយក្នុងនោះក្រុមហ៊ុនបានបោះទុនវិនិយោគសរុបចំនួន ៩០លានដុល្លារអាម៉េរិក និងអាចបង្កើតការងារចំនួនប្រមាណ ៤.០០០កន្លែង។ តាមការបញ្ជាក់ពីខាងក្រុមហ៊ុន រោងចក្រនេះគ្រោងនឹងបញ្ចប់ការសាងសង់ និងដំណើរការផលិតកម្មនៅពេលឆាប់ៗខាងមុខ៕
