ក្រោយពេលក្រុមហ៊ុនប្រតិបត្តិការគ្រីបតូ FTX បានដួលរលំ លោក Sam Bankman-Fried មិនត្រឹមតែបាត់បង់ទ្រព្យសម្បត្តិរបស់ក្រុមហ៊ុនទេ សូម្បីតែទ្រព្យផ្ទាល់ខ្លួនរបស់គាត់ក៏អស់ទៅតាមដែរ។ ជាក់ស្ដែងនាយកប្រតិបត្តិរូបនេះ បានបង្ហើបឱ្យដឹងថា លុយក្នុងកុងធនាគាររបស់គាត់សល់ត្រឹមតែ ១០ម៉ឺនដុល្លារប៉ុណ្ណោះ។
បើតាមសារព័ត៌មាន Yahoo បានឱ្យដឹងថា ទ្រព្យសម្បត្តិសរុបរបស់លោក Bankman មានប្រមាណជា ៦៥.៥ពាន់លានដុល្លារ ប៉ុន្តែនៅថ្ងៃទី៣០ ខែវិច្ឆិកា វាថយចុះមកសល់ត្រឹម ១០ម៉ឹនដុល្លារប៉ុណ្ណោះ។ នេះបញ្ជាក់ឱ្យឃើញថា លោក Bankman បានបាត់បង់ទ្រព្យផ្ទាល់ខ្លួនអស់ស្ទើរតែទាំងស្រុងទៅហើយ។
លោក Bankman បានលើកឡើងថា “ជាទូទៅអ្វីគ្រប់យ៉ាងដែលខ្ញុំមាន ត្រូវបានផ្សារភ្ជាប់ជាមួយនឹងក្រុមហ៊ុន FTX ស្ទើរទាំងអស់ ហេតុនេះហើយទើបការដួលរលំរបស់ក្រុមហ៊ុននេះ ធ្វើឱ្យស្ថានភាពហិរញ្ញវត្ថុរបស់ខ្ញុំត្រូវជួបភាពស្មុគស្មាញ”។
អតីតនាយកប្រតិបត្តិរូបនេះ បាននិយាយទាំងទឹកមុខស្រងូតស្រងាត់ថា គាត់ស្ដាយក្រោយបំផុតដែលដាក់ពាក្យសុំក្ស័យធន។ ហើយបន្តថា គាត់គួរតែព្យាយាមរៃអង្គាសប្រាក់បន្ថែមទៀតជំនួសឱ្យការប្រកាសថាក្រុមហ៊ុនក្ស័យធន។ មូលហេតុដែលគាត់និយាយបែបនេះគឺព្រោះតែ ក្រោយពេលប្រកាសក្ស័យធន គាត់ប្រមូលទុនពីវិនិយោគិនណាក៏លែងបាន រហូតធ្វើឱ្យជាប់ទ្រព្យផ្ទាល់ខ្លួនក៏ត្រូវបាត់បង់ថែមទៀត។
បើតាមសារព័ត៌មាន Forbes មូលហេតុសំខាន់នៅពីក្រោយការដួលរលំរបស់ FTX គឺដោយសារតែ Bitcoin ធ្លាក់ថ្លៃខ្លាំងពេក។ កាលពីខែវិច្ឆិកា ឆ្នាំ២០២១ Bitcoin ធ្លាប់ឡើងថ្លៃដល់ ៦៩,០០០ដុល្លារក្នុងមួយកាក់ ប៉ុន្តែក្រោយពីនោះវាបានធ្លាក់ថ្លៃជាបន្តបន្ទាប់ រហូតមកដល់ ថ្ងៃទី២ ខែធ្នូ ឆ្នាំ២០២២ នេះ វាមានតម្លៃត្រឹមតែ ១៦,៩២០ដុល្លារក្នុងមួយកាក់។ Bitcoin ធ្លាក់ថ្លៃបែបនេះព្រោះតែវិនិយោគិនបាត់បង់ទំនុកចិត្ត ឬអាចនិយាយថាពួកគេកាត់បន្ថយការវិនិយោគលើ Bitcoin ឬអ្នកខ្លះទៀតបញ្ឈប់តែម្ដង។
មូលហេតុសំខាន់នៃការបាត់បង់ទំនុកចិត្តរបស់វិនិយោគិន គឺដោយសារតែធនាគារកណ្ដាលរបស់សហអាមេរិក បានចាត់វិធានការដំឡើងអត្រាការប្រាក់ ដើម្បីទប់ទល់ជាមួយនឹងអតិផរណា ចាប់តាំងពីដើមឆ្នាំ២០២២មក។ នៅពេលដែលអត្រាការប្រាក់កើនឡើង មនុស្សនឹងសម្រេចចិត្តដាក់លុយនៅធនាគារយកការប្រាក់ ជាជាងខ្ចីលុយពីធនាគារយកទៅវិនិយោគ។ ហេតុនេះចង់មិនចង់ ក៏ចំនួនវិនិយោគត្រូវតែមានការថយចុះ មិនថានៅក្នុងវិស័យអ្វីក៏ដោយ។
សូមជម្រាបផងដែរថា ក្រុមហ៊ុន FTX ដែលមានលោក Sam Bankman-Fried ជាស្ថាបនិក បានប្រកាសក្ស័យធននៅថ្ងៃទី១៧ ខែវិច្ឆិកា ឆ្នាំ២០២២ នេះ៕
អត្ថបទដោយ៖ សូ សុខលី