នៅក្នុងសង្គមឌីជីថលបច្ចុប្បន្ននេះ សុវត្ថិភាពផ្នែកហិរញ្ញវត្ថុក្លាយជាបញ្ហាដ៏សំខាន់សម្រាប់មនុស្សគ្រប់រូប។ ក្នុងនោះ “លេខកូដសំងាត់” ឬ “PIN code” ដែលប្រើសម្រាប់ចូលគណនីធនាគារ ឬកាត ATM ទោះមានត្រឹម ៤ ឬ ៦ ខ្ទង់ក៏ដោយ តែអាចក្លាយជាចំណុចខ្សោយយ៉ាងធ្ងន់ធ្ងរ ប្រសិនបើជ្រើសរើសលេខមិនបានត្រឹមត្រូវ។ ខាងក្រោមនេះ គឺជាលេខ ៤ ប្រភេទ ដែលអ្នកមិនគួរច្រើនធ្វើជាលេខកូដសំងាត់កុងធនាគារឡើយ៖

១/. លេខសាមញ្ញ និងពេញនិយមបំផុត ដូចជា ១២៣៤, ០០០០, ១១១១, ១២១២។ យោងតាមការស្រាវជ្រាវដោយ DataGenetics លើ PIN code ជាង ៣.៤ លានករណីបង្ហាញថា ១២៣៤ គឺជាលេខដែលគេប្រើច្រើនជាងគេបំផុត ខណៈចំនួនស្ទើរតែ ១១% នៃករណីសរុប។

២/. ថ្ងៃខែឆ្នាំកំណើត ឬលេខទាក់ទងនឹងខ្លួនឯង ដូចជា ១៩៩៩, ២០០០, ០១០១, ៣១១២។ អ្នកវាយប្រហារ Cyber Criminals អាចប្រើព័ត៌មានផ្ទាល់ខ្លួនដូចជា ថ្ងៃកំណើត ឬឈ្មោះសមាជិកគ្រួសារ ដើម្បីសាកល្បង PIN code។

៣/. លេខរៀងលើក្តាចុច ដូចជា ២៥៨០, ០៨៥២, ៦៩៦៩។ ទាំងនេះគឺជាលេខដែលងាយចងចាំ ប៉ុន្តែមានមនុស្សច្រើននាក់ណាស់ដែលកំពុងប្រើ។ ក្រុមហ៊ុនផ្តល់សេវាសន្តិសុខតាមអ៊ីនធឺណិត Kaspersky និង NordVPN បានណែនាំឲ្យជៀសវាងលេខដែលមានលំនាំងាយទាយ។

៤/. លេខឯកសារ ឬព័ត៌មានច្បាស់លាស់ពីអ្នកប្រើ ក្នុងនោះមានដូចជា លេខទូរស័ព្ទផ្ទាល់ខ្លួន, លេខអត្តសញ្ញាណបណ្ណ ឬលេខប័ណ្ណ ATM ជាដើម ព្រោះព័ត៌មានទាំងនេះអាចរកឃើញបានពីឯកសារផ្ទាល់ខ្លួន ឬតាមបណ្ដាញសង្គម។

យ៉ាងណាមិញ ដើម្បីជ្រើសរើស “លេខកូដសំងាត់” ឬ “PIN code” ឲ្យបានត្រឹមត្រូវអ្នកគួរប្រើលេខចៃដន្យ ៤ ឬ ៦ ខ្ទង់ដែលមិនទាក់ទងនឹងព័ត៌មានផ្ទាល់ខ្លួន, មិនមានលំនាំងាយទាយ និងមិនគួរចែករំលែកជាមួយនរណាឡើយ ហើយត្រូវផ្លាស់ប្តូរភ្លាមប្រសិនបើមានការសង្ស័យថាមានអ្នកដទៃដឹង។ ការរក្សាសុវត្ថិភាពក្នុងប្រើប្រាស់ “លេខកូដសំងាត់” ឬ “PIN code” គឺជាជំហានដ៏សាមញ្ញ ប៉ុន្តែមានសារៈសំខាន់ខ្លាំងក្នុងការការពារគណនីហិរញ្ញវត្ថុរបស់អ្នក ពីការបាត់បង់ប្រាក់ឬការបំពានតាមបច្ចេកវិទ្យា។

គួរជម្រាបផងដែរថា ប្រសិនបើបងប្អូនទទួលរងនូវករណីក្លែងបន្លំ ឬឆបោកតាមប្រព័ន្ធបច្ចេកវិទ្យា អាចទំនាក់ទំនងទៅកាន់លេខ ០២៣ ៧២ ៦៨ ២២ ឬទៅទំនាក់ទំនងផ្ទាល់ នៅនាយកដ្ឋានប្រឆាំងបទល្មើសបច្ចេកវិទ្យា ដែលមានទីតាំងនៅក្នុងក្រសួងមហាផ្ទៃ រៀងរាល់ថ្ងៃចន្ទ ដល់ថ្ងៃសុក្រ ពេលព្រឹកចាប់ពីម៉ោង ៧៖៣០នាទី ដល់ម៉ោង ១១៖៣០នាទី និងពេលរសៀល ចាប់ពីម៉ោង១៤៖៣០នាទី ដល់ម៉ោង១៧៖៣០នាទី៕