លោកអ្នកឧកញ៉ា ពុង ឃាវសែ បច្ចុប្បន្នជាអគ្គនាយកក្រុមហ៊ុនវិនិយោគទុនអាណិកជនកម្ពុជា (OCIC) ដែលជាក្រុមហ៊ុនមួយបានអភិវឌ្ឍន៍គម្រោងជាច្រើននៅក្នុងប្រទេសកម្ពុជាដូចជា ទីក្រុងរណប ស្ពាន និងព្រលានយន្ដហោះជាដើម។ ហើយនៅដើមឆ្នាំ២០២៥ ខាងមុខនេះ គម្រោងធំ ២ ដែលវិនិយោគសាងសង់ដោយក្រុមហ៊ុនមួយនេះ ក៏នឹងត្រូវបើកដំណើរការផងដែរ។ ដោយនៅក្នុងនោះរួមមាន៖

១. ព្រលានយន្ដហោះអន្ដរជាតិតេជោ

ព្រលានយន្ដហោះអន្ដរជាតិតេជោ គឺជាគម្រោងព្រលានយន្ដហោះថ្មី និងធំជាងគេនៅក្នុងប្រទេសកម្ពុជា ខណៈគម្រោងនេះគ្រោងនឹងបើកឲ្យដំណើរការនៅដើមឆ្នាំ២០២៥​ ខាងមុខនេះផងដែរ។ នេះបើតាមការបញ្ជាក់ពីក្រុមហ៊ុនសាងសង់ Cambodia Airport Investment Co., Ltd (CAIC) ដែលជាក្រុមហ៊ុនបង្កើតឡើងរួមគ្នាដោយក្រុមហ៊ុន OCIC និងរដ្ឋលេខាធិការដ្ឋានអាកាសចរស៊ីវិលកម្ពុជា កាលពីពេលកន្លងទៅ។​

ព្រលានយន្ដហោះអន្ដរជាតិតេជោនេះ បានបើកការដ្ឋានសាងសង់កាលពីពាក់កណ្ដាលឆ្នាំ២០២០ លើផ្ទៃដី ២,៧០០ ហិកតា មានទីតាំងស្ថិតនៅស្រុកកណ្ដាលស្ទឹង ខេត្ដកណ្ដាល និងមានចំងាយប្រមាណ ១៩ គីឡូម៉ែត្រពីរាជធានីភ្នំពេញ។ ព្រលានថ្មីនេះស្ថិតនៅក្នុងចំណាត់ថ្នាក់ F4 ដែលអភិវឌ្ឍន៍ជា ៣ ដំណាក់កាល។ ក្នុងនោះសម្រាប់ដំណាក់កាលទី១ នឹងត្រូវចំណាយទុនសរុប ១,៥ ពាន់លានដុល្លារ ដោយមិនរាប់បញ្ចូលផ្ទៃដីព្រលានឡើយ។

នៅពេលដាក់ឲ្យដំណើរការដំណាក់កាលទី១ នាដើមឆ្នាំ២០២៥ ខាងមុខ អាកាសយានដ្ឋានអន្ដរជាតិតេជោ អាចទទួលភ្ញៀវទេសចរបានចំនួន ១៣លាននាក់ក្នុង១ឆ្នាំ ហើយដំណាក់កាលទី២ នឹងបញ្ចប់នៅឆ្នាំ២០៣០ ដែលអាចទទួលភ្ញៀវ ទេសចរបានចំនួន៣០លាននាក់ក្នុង១ឆ្នាំ និងដំណាក់កាលទី៣ នឹងបញ្ចប់នៅឆ្នាំ២០៥០ អាចទទួលភ្ញៀវទេសចរបានចំនួន៥០លាននាក់ក្នុង១ឆ្នាំឯណោះ។

២. ស្ពានអាកាសមរតកតេជោ (កម្ពស់ ២ ជាន់)

នៅដើមឆ្នាំ២០២៥ ខាងមុខនេះ គម្រោងស្ពានអាកាសមរតកតេជោ ដែលជាស្ពានអាកាសមានកម្ពស់ ២ ជាន់ដំបូងគេបង្អស់នៅកម្ពុជ នឹងត្រូវដាក់ឲ្យដំណើរការទាំងស្រុងផងដែរ។ ខណៈដែលដំណាក់កាលទី១ ត្រូវបានបើកឲ្យដំណើរការកាលពីដើមឆ្នាំ២០២៤ កន្លងទៅនេះ។

សូមជម្រាបថា ស្ពានកាសមរតកតេជោ នេះត្រូវបានបើកការដ្ឋានសាងសង់កាលពីថ្ងៃទី ៣១ ខែសីហា ឆ្នាំ២០២២។ ការសាងសង់ស្ពានអាកាសថ្មីនេះ គឺជាគម្រោងរបស់រាជរដ្ឋាភិបាលកម្ពុជា​តាមរយៈរដ្ឋបាលរាជធានី​ភ្នំពេញ និងសាងសង់ដោយក្រុមហ៊ុនវិនិយោគទុនអាណិកជនកម្ពុជា OCIC ដែលចំណាយថវិកាប្រមាណ ៣៦ លានដុល្លារ។

ស្ពានអាកាសសាងសង់ជា ២ ជាន់ ដោយជាន់ទី១ ជាស្ពានរង្វង់មូល នៅត្រង់ចំណុចប្រសព្វ ដែលបំបែកខ្នែងជាបួនទិសផ្សេងគ្នា ទៅកាន់មហាវិថីសម្តេចតេជោ ហ៊ុន សែន ស្ពានព្រះមុនីវង្ស មហាវិថីព្រះមុនីវង្ស និងវិថីកងយោធពល ខេមរភូមិន្ទ។ ខណៈជាន់ទី២ ជាផ្លូវទ្វេទិស មានទិសដៅទៅមក រវាងមហា វិថីព្រះមុនីវង្ស និងមហាវិថីសម្តេចតេជោ ហ៊ុន សែន និងគ្រោងបញ្ចប់នៅមុនបុណ្យចូលឆ្នាំខ្មែរ (២០២៥)៕