នៅពេលថ្មីៗនេះ ក្រុមវិនិយោគមកពីប្រទេសចិន បានសម្រេចដាក់ទុនក្នុងការសាងសង់តំបន់សេដ្ឋកិច្ចពិសេស និងសួនឧហ្សាហកម្មធំៗចំនួន ២ ដែលមានទីតាំងស្ថិតនៅក្នុងខេត្ដកំពង់ស្ពឺ និងខេត្ដកំពត។ ខណៈគម្រោងទាំង ២ នេះមានទុនសរុបជាង ១១០ លានដុល្លារ។ ដោយគម្រោងវិនិយោគថ្មីនេះមានដូចខាងក្រោម៖
១. ខេត្ដកំពង់ស្ពឺ
កាលពីថ្ងៃទី៨ ខែវិច្ឆិកា ឆ្នាំ២០២៤ ក្រុមហ៊ុន Golden Intergrity International Investment Group បានបើកការដ្ឋានសាងសង់ គម្រោងសួនឧស្សាហកម្មវាយនភណ្ឌបៃតងកម្ពុជា ដែលមានទីតាំងស្ថិតនៅក្នុងភូមិឈើនាង ឃុំតាំងស្យា ស្រុកភ្នំស្រួច ខេត្តកំពង់ស្ពឺ។ ដែលគម្រោងដ៏សំខាន់មួយនេះត្រូវបានសាងសង់នៅលើផ្ទៃដីសរុប ៥០០ ហិកតា មានទុវិនិយោគប្រមាណ ៥ លានដុល្លារ។
គម្រោងអភិវឌ្ឍន៍សួនឧស្សាហកម្មវាយនភណ្ឌបៃតងកម្ពុជានេះផ្តោតលើការបង្កើតឱ្យបាន នូវសួនឧស្សាហកម្មវាយនភណ្ឌលំដាប់ជាតិកម្ពុជា និងបន្តអភិវឌ្ឍន៍ឱ្យក្លាយជាមូលដ្ឋានផលិតកម្ម ផ្គត់ផ្គង់ដ៏សំខាន់លើ ឧហ្សាហកម្ម បោះពុម្ភ ជ្រលក់ពណ៍ និងអេឡិចកូប្លាតីងស្បែក ក្នុងតំបន់អាស៊ានផងដែរ។
២. ខេត្ដកំពត
កាលពីពេលថ្មីៗនេះក្រុមហ៊ុន Sailun ដែលជាក្រុមហ៊ុនផលិតសំបកកង់រថយន្ដមានដើមកំណើតមកពីប្រទេសចិន ដែលបច្ចុប្បន្នកំពុងបើកដំណើរការអាជីវកម្មនៅខេត្ដស្វាយរៀង បានប្រកាសវិនិយោគបង្កើតតំបន់សេដ្ឋកិច្ចថ្មីមួយទៀតនៅក្នុងខេត្ដកំពត ដែលមានទុនសរុប ១១០ លានដុល្លារ។
យោងតាមការដកស្រង់ពីគេហទំព័រ Tyrepress កាលពីថ្ងៃទី ៣០ ខែតុលា ឆ្នាំ២០២៤ បានឲ្យដឹងថា គម្រោងបង្កើតតំបន់សេដ្ឋកិច្ចពិសេសដែលវិនិយោគដោយក្រុមហ៊ុន Sailun នេះមានឈ្មោះថា "គម្រោងតំបន់សេដ្ឋកិច្ចពិសេសកំពត" (Kampot SEZ) ។ លើសពីនេះ Sailun បាននិយាយថា ខ្លួនកំពុងរៀបចំបង្កើតក្រុមហ៊ុនបុត្រសម្ព័ន្ធដែលមានឈ្មោះថា Kampot Bay Investment Co., Ltd., ដើម្បីគ្រប់គ្រង និងទទួលខុសត្រូវក្នុងការអនុវត្តតំបន់សេដ្ឋកិច្ចពិសេសកំពតផងដែរ៕
