ទីបំផុតគម្រោងសាងសង់ពង្រីកកំណាត់ផ្លូវជាតិលេខ ៧ តភ្ជាប់ពីពីទីប្រជុំជនស្គន់ ដល់ក្រុងកំពង់ចាម ខេត្ដកំពង់ចាម ត្រូវបានរាជរដ្ឋាភិបាលគ្រោងបើកការដ្ឋានសាងសង់ នៅដើមខែមករា ឆ្នាំ២០២៣ ខាងមុននេះហើយ។ នេះបើយោងតាមការចុះផ្សាយដោយក្រសួងសាធារណការ និងដឹកជញ្ជូន នៅថ្ងៃទី១២ ខែធ្នូ ឆ្នាំ២០២២នេះ។

តាមការបញ្ជាក់ពីក្រសួងសធារណការ នៅក្នុងពិធីបើកការដ្ឋានសាងសង់នេះ ក៏មានការអញ្ជើញចូលរួមជាអធិបតីដ៏ខ្ពង់ខ្ពស់ពីសម្ដេចតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជាផងដែរ។ អ្វីដែលចាប់អារម្មណ៍គឺគម្រោងនេះ ក៏នឹងបើកដំណើរការសាងសង់ដំណាលគ្នាជាមួយនឹងគម្រោងស្ពានឆ្លងកាត់ទន្លេមេគង្គ ស្ថិតនៅក្នុងខេត្ដក្រចេះដែរ។

តាមប្រសាសន៍លើកឡើងរបស់ឯកឧត្ដមទេសរដ្ឋមន្ដ្រី ស៊ុន ចាន់ថុល រដ្ឋមន្រ្ដីក្រសួងសាធារណការ និងដឹកជញ្ជូនកាលពីពេលកន្លងទៅបានឲ្យដឹងថា គម្រោងពង្រីកកំណាត់ផ្លូវជាតិ ៧ តភ្ជាប់ពីទីប្រជុំជនស្គត់ទៅកាន់ក្រុងកំពង់ចាម ខែកំពង់ចាមនេះ ត្រូវបានសិក្សា និងចរចា តម្លៃសាងសង់រួចរាល់អស់ហើយ ដោយចាំតែថ្ងៃបើកការដ្ឋានសាងសង់នេះតែប៉ុណ្ណោះ។

សូមជម្រាបជូនថា គម្រោងសាងសង់ពង្រីកផ្លូវជាតិលេខ៧ ពីស្គន់ ដល់ក្រុងកំពង់ចាម ខេត្តកំពង់ចាមនេះ មានប្រវែង ៤៥,៥០ គីឡូម៉ែត្រ ពង្រីកទៅជាផ្លូវ៤គន្លង (ពីរគន្លងទៅពីរគន្លងមក) គ្រោងចំណាយថវិកាសរុបប្រមាណ ១១៤,៨៩ លានដុល្លាសហរដ្ឋអាមេរិក ជាហិរញ្ញប្បទានពីសាធារណរដ្ឋប្រជាមានិតចិន គ្រោងចំណាយពេលសាងសង់ប្រមាណ៣៦ខែ អនុវត្តការងារសាងសង់ដោយក្រុមហ៊ុន សាជីវកម្មស្ពាន និងថ្នល់ចិន៕

អត្ថបទ៖ កឹម ប៊ុនធឿន