យោងតា​មសេចក្តីប្រកាស​របស់ក្រសួងការងារនិងបណ្តុះបណ្តាលវិជ្ជាជីវៈ បានឱ្យដឹងថាការធ្វើការបន្ថែមម៉ោងក្រៅពីថិរវេលាធ្វើការធម្មតា ម្ចាស់ឬនាយកសហគ្រាស ត្រូវចូលរួមអនុវត្តតាមសេចក្តីសម្រេចរបស់ក្រសួងការងារ។

ក្នុងនោះនៅជំពូកទី២ ក្រសួងបានបញ្ជាក់ថាគ្រឹះស្ថានអាចរៀបចំឱ្យកម្មករនិយោជិតធ្វើការបន្ថែមម៉ោងលើសពីថិរវេលាធ្វើការ ធម្មតារបស់សហគ្រាស គ្រឹះស្ថានរបស់ខ្លួន នៅក្នុងករណីដូចខាងក្រោម៖

១.​ ដើម្បីឱ្យការងារពិសេសប្រព្រឹត្តទៅបាន ដូចជា ការធ្វើបញ្ជីសារពើភណ្ឌ និងតុល្យការ ការដាក់កំណត់ ពេលវេលាការជម្រះបញ្ជី និងការបិទបញ្ជីគណនេយ្យ។

២. ដើម្បីឱ្យសហគ្រាស គ្រឹះស្ថានអាចទប់ទល់នឹងការងារ ដែលមានច្រើនខុសធម្មតាបណ្តាលមកពីកាលៈ ទេសៈប្លែកៗ ដោយមិនអាចរង់ចាំនិយោជករកវិធានការដទៃផ្សេងទៀត។

៣. ការរៀបចំធ្វើការបន្ថែមម៉ោងនេះ ត្រូវផ្អែកលើគោលការណ៍ស្ម័គ្រចិត្ត។

៤. ម្ចាស់ឬនាយកសហគ្រាស គ្រឹះស្ថាន មិនត្រូវបង្ខិតបង្ខំ ឬដាក់វិន័យផ្សេងៗចំពោះកម្មករនិយោជិត ដែលមិនស្ម័គ្រចិត្តធ្វើការបន្ថែមម៉ោងឡើយ។

៥. ម្ចាស់ឬនាយកសហគ្រាស គ្រឹះស្ថានត្រូវផ្តល់ប្រាក់ឈ្នួលធ្វើការបន្ថែមម៉ោងជូនកម្មករនិយោជិតតាមអត្រា ដូចខាងក្រោម៖

-ស្មើនឹង ១៥០ % (មួយរយហាសិបភាគរយ) ឬមួយដងកន្លះ នៃប្រាក់ឈ្នួលពេលធ្វើការធម្មតា ចំពោះ ការធ្វើការបន្ថែមម៉ោងនៅពេលថ្ងៃ នៃថ្ងៃធ្វើការធម្មតា

-ស្មើនឹង ២០០% (ពីររយភាគរយ) ឬពីរដង នៃប្រាក់ឈ្នួលពេលធ្វើការធម្មតា ចំពោះការធ្វើការបន្ថែម ម៉ោងនៅពេលយប់ ចាប់ពីម៉ោង ២២ ទៅម៉ោង ៥ ភ្លឺ៕