ភោជនីយដ្ឋានបុរាណដ៏ចំណាស់មួយរបស់ហុងកុងដែលមានឈ្មោះថា Jumbo Floating Restaurant ត្រូវបានលិចនៅសមុទ្រចិន ខាងត្បូងក្នុងជម្រៅជាង ១.០០០ ម៉ែត្រ ខណៈពេលដែលកំពុងអូសសណ្ដោងចេញពីទីក្រុងដើម្បីប្តូរទីតាំងថ្មី។ សម្រាប់ការប្តូរទីតាំងនេះដែរក៏ព្រោះតែខ្លួនកំពុងស្វែងរកម្ចាស់ថ្មី និងកន្លែងដែលមានតម្លៃពន្ធថោកជាងនេះ។
បើយោងតាមសារព័ត៌មានបរទេស CNN បានឱ្យដឹងនៅថ្ងៃទី ២២ ខែ មិថុនា ឆ្នាំ ២០២២ នេះថា ភោជនីយដ្ឋានបណ្ដែតទឹកនេះ មានកម្ពស់ ៣ ជាន់ដែលផ្នែកខាងក្រៅរចនាបថបែបវិមានអធិរាជចិន ហើយត្រូវបានទូកអូសទៅឆ្ងាយកាលពីថ្ងៃអង្គារសប្តាហ៍មុន បន្ទាប់ពីចតនៅដែនទឹកភាគនិរតីរបស់ទីក្រុងហុងកុង អស់រយៈពេលជិតកន្លះសតវត្សរ៍។ ប៉ុន្តែយ៉ាងណាមិញក្រុមហ៊ុនមិនបានបញ្ជាក់ពីមូលហេតុជាក់លាក់ណាមួយអំពីការលិចនេះនោះទេ។
ប្រភពដ៏ដែលបានបន្ថែមថាភោជនីដ្ឋាននេះត្រូវបិទជិត ៣ ឆ្នាំមកហើយក៏ព្រោះតែការរាតត្បាតនៃជំងឺ កូវីដ ១៩ ដោយម្ចាស់ភោជនីដ្ឋាន បានប្រកាសកាលពីខែ មីនា ឆ្នាំ ២០២០ កន្លងទៅនេះថាខ្លួនបានខាតបង់ទឹកប្រាក់ជាង ១៣ លានដុល្លារ។
គួរបញ្ជាក់ផងដែរថាភោជនីយដ្ឋានអណ្ដែតទឹក Jumbo Floating Restaurant ត្រូវបានបង្កើតឡើងនៅថ្ងៃទី១៩ ខែតុលា ឆ្នាំ១៩៧៦។ នៅក្នុងអំឡុងពេលបើកដំណើរការអស់រយៈពេលជាច្រើនឆ្នាំកន្លងទៅនេះ ភោជនីដ្ឋាន Jumbo ទទួលបានភ្ញៀវជាង ៣០ លាននាក់ក្នុងនោះក៏មានវត្តមានរបស់ ម្ចាស់ក្សត្រី អេលី ហ្សាបេត ទី២ (Queen Elizabeth II) នៃប្រទេសអង់គ្លេស និង អតីតប្រធានាធិបតីអាមេរិក Jimmy Carter ព្រមទាំងជនល្បីល្បាញជាច្រើនទៀតផងដែរ ៕
អត្ថបទដោយ៖ ឌឿក ស្រី នុច រតនៈ
