អត្រាអតិផរណាកើនឡើងសឹងតែគ្រប់បណ្ដាប្រទេសនៅលើសកលលោក ក្នុងនោះប្រទេសមួយចំនួនមានអតិផរណាស្ទុះឡើងខ្ពស់ខុសពីធម្មតា ដូចជាប្រទេសក្បែរខាងកម្ពុជាទាំង ៣ រួមមាន ថៃ ឡាវ និងមីយ៉ាន់ម៉ា ជាដើម។ នេះបើយោងតាមទិន្នន័យរបស់គេហទំព័រTrading Economics។
ទន្ទឹមនឹងអតិរផណាកើនឡើងយ៉ាងគំហុកនៅក្នុងប្រទេសទាំង៣ខាងលើគេសង្គេតឃើញថាមានទំនិញ ៣ប្រភេទសំខាន់ៗដែលកំពុងតែឡើងថ្លៃខ្លាំង។ ទំនិញទាំងនោះមានដូចជា ប្រេងឥន្ធនៈ ហ្គាសចម្អិនអាហារ និងទំនិញប្រើប្រាស់ដែលនាំចូល។ យ៉ាងណាមិញនៅក្នុងប្រទេសថៃ និងឡាវ ត្រូវបានរដ្ឋាភិបាលចេញវិធានការទប់តម្លៃប្រេង ដើម្បីជួយសម្រួលដល់ប្រជាពលរដ្ឋ និងកាត់បន្ថយភាពខ្វះខាតប្រេងប្រើប្រាស់។
ទិន្នន័យពីប្រភពដដែលបានឱ្យដឹងថា កម្រិតអតិផរណារបស់ប្រទេសថៃមាន ៧.៦៦% ខណៈចំនួននេះជាចំនួនខ្ពស់បំផុតមិនធ្លាប់មាននៅក្នុងប្រទេសសេដ្ឋកិច្ចលំដាប់ទី២របស់អាស៊ានមួយនេះ។ ចំណែកឯប្រទេសឡាវវិញ មាន ២៣.៦% ជាចំនួនដែលបញ្ជាក់ពីស្ទុះឡើងសឹងតែចាប់មិនឈ្នះ ព្រោះតែសន្ទុះនៃថ្លៃទំនិញប្រើប្រាស់កើនឡើងលើសពីការរំពឹងទុក។ បើនិយាយអំពីប្រទេសមីយ៉ាន់ម៉ាវិញ អត្រាអតិផរណាមាន ១៣.៨២% និងត្រូវបានធនាគារពិភពលោកព្យាករណ៍ថា សេដ្ឋកិច្ចរបស់ប្រទេសអាស៊ានមួយនេះកំពុងតែធ្លាក់ចូលទៅភាពច្របូកច្របល់ជាខ្លាំង។
គួរបញ្ជាក់ផងដែរថាមកដល់ពេលនេះមិនទាន់មានអ្នកជំនាញណាម្នាក់ដែលអាចបញ្ជាក់ថា អត្រាអតិផរណានឹងថយចុះមកវិញ ឬក៏នឹងបន្តកើនឡើងដល់កម្រិតណាទៀតនោះទេ ព្រោះថា បរិមាណផ្គត់ផ្គង់ប្រេងឥន្ធនៈ នៅតែឈរជាហេតុផលយ៉ាងសំខាន់នៅក្នុងសេដ្ឋកិច្ច។ ជាក់ស្ដែងបើបរិមាណផ្គត់ផ្គង់ប្រេងឥន្ទនៈកាន់តែតិចតម្លៃរបស់វាក៏នឹងកាន់តែកើនឡើង ផ្ទុយទៅវិញ បើបរិមាណផ្គត់ផ្គង់ច្រើន តម្លៃរបស់វានឹងកាន់តែថយចុះ។
សម្រាប់បងប្អូនមិនទាន់យល់ថាអ្វីទៅជាអតិផរណា សូមអានអត្ថបទ” អតិផរណានៅកម្ពុជាដល់ ៧.២%! តោះមកដឹងថាអ្វីជាអតិផរណា? ហេតុអ្វីបានជាវាកើនឡើង?”
អត្ថបទដោយ៖ សូ សុខលី
