កាលពីថ្ងៃទី២៥ ខែឧសភា ឆ្នាំ២០២៥ នៅសណ្ឋាគារសូហ្វីតែលភ្នំពេញភូគីត្រា វិទ្យាស្ថានខេមអេដ បានរៀបចំពិធី​ចែកសញ្ញាបត្រ ជូនដល់និស្សិត​​ ដែលបានប្រឡងបញ្ចប់​ការសិក្សាលើថ្នាក់បរិញ្ញាបត្រជាន់ខ្ពស់ MSc+ACCA ថ្នាក់បរិញ្ញាបត្រ BA+CAT​​ កម្មវិធីសិក្សា ACCA​  និងកម្មវិធីសិក្សា CAT ​សម្រាប់ ​ឆ្នាំ​២០២៤ កន្លងទៅនេះ។

កម្ម​​វិធីចែកសញ្ញាបត្រនេះ ត្រូវបានធ្វើឡើងជាបីវេន ដែលពេលព្រឹក និងពេលល្ងាចមានការអញ្ជើញចូលរួមក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ សមាជិកក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ ប្រធានគណៈកម្មាធិការគ្រប់គ្រងកម្មវិធីសិក្សាគណនេយ្យករជំនាញ កម្ពុជា និងជា ប្រធានគណៈកម្មការចុះឈ្មោះ និងសមាជិកភាពវិទ្យាស្ថានគណនេយ្យករជំនាញ និងសវនករកម្ពុជា និងពេលរសៀលមានការអញ្ជើញចូលរួម ក្រោមអធិបតីភាពដ៏ ខ្ពង់ខ្ពស់របស់ ឯកឧត្តមបណ្ឌិត សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា រួមជាមួយការ ចូលរួមពីអ្នក តំណាងស្ថាប័ន ACCA ប្រចាំនៅកម្ពុជា តំណាងក្រុមប្រឹក្សាភិបាលនៃវិទ្យាស្ថានខេមអេដ លោកនាយក​វិទ្យាស្ថានខេមអេដ សាស្រ្តាចារ្យ និយោជក បុគ្គលិកខេមអេដ និស្សិត  និងអាណាព្យបាលផងដែរ។

ទន្ទឹមនឹងនេះដែរ សម្រាប់ពិធីចែកសញ្ញាបត្រជូនដល់និស្សិតនេះ និស្សិតបញ្ចប់ការសិក្សាថ្នាក់បរិញ្ញាបត្រជាន់ខ្ពស់ជំនាន់ទី០១ លើមុខជំនាញវិទ្យាសាស្រ្ត គណនេយ្យ និងហិរញ្ញវត្ថុ មានចំនួនសរុប ០២នាក់ ថ្នាក់បរិញ្ញាបត្រជំនាន់ទី១០ លើមុខជំនាញគណនេយ្យ និងហិរញ្ញវត្ថុ មានចំនួនសរុប៤៨១នាក់ កម្មវិធីACCA មានចំនួនសរុប ៣២នាក់ និងកម្មវិធីCAT មានចំនួនសរុប២៥នាក់។

នៅក្នុងឱកាសដ៏មានអត្ថន័យនេះដែរ ឯកឧត្តមបណ្ឌិត ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ សមាជិកក្រុមប្រឹក្សា អាជ្ញាធរសេវា​ហិរញ្ញវត្ថុមិនមែនធនាគារ ប្រធានគណៈកម្មាធិការគ្រប់គ្រងកម្មវិធីសិក្សាគណនេយ្យករជំនាញ កម្ពុជា និងជាប្រធានគណៈកម្មការ ចុះឈ្មោះ និងសមាជិកភាពវិទ្យាស្ថានគណនេយ្យករជំនាញ និងសវនករកម្ពុជា បានមានប្រសាសន៍ថា ឯកឧត្តមបណ្ឌិត ពិតជាមានកិត្តិយស និងក្ដីសោមនស្សរីករាយដែលបានចូលរួមក្នុងកម្មវិធីប្រគល់សញ្ញាបត្រជូនដល់និស្សិត ដែលបានបញ្ចប់ការសិក្សាជាស្ថាពរនៅវិទ្យាស្ថានខេម អេដក្នុងថ្ងៃនេះ ដោយក្នុងនោះមាននិស្សិតបញ្ចប់ការសិក្សាថ្នាក់បរិញ្ញាបត្រគណនេយ្យ និងហិរញ្ញវត្ថុចំនួន ១៩៦នាក់ និងនិស្សិតបញ្ចប់ការ សិក្សាថ្នាក់បរិញ្ញាបត្រគណនេយ្យ និងហិរញ្ញវត្ថុ + CAT មានចំនួន ៥៤នាក់។

ក្នុងនាមឯកឧត្តមអគ្គបណ្ឌិតសភាចារ្យឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏ដូចជារូបឯកឧត្តមបណ្ឌិត ផ្ទាល់ដែលជាតំណាងរបស់លោក សូមថ្លែងនូវ សេចក្តីអំណរអរគុណ ហើយ ជាពិសេសទៅទៀតឯកឧត្ដមមានមោទនភាពណាស់ដែលបានមក ចូលរួមក្នុងពិធីចែកសញ្ញាបត្រដល់និស្សិតជ័យលាភីនៃវិទ្យាស្ថានខេមអេដ ដែលបានខិតខំបញ្ចប់ការសិក្សារបស់ខ្លួនក្នុងឆ្នាំ២០២៤។ យ៉ាងណាមិញ ឯកឧត្តម​បណ្ឌិតក៏មានប្រសាសន៍ថាចំពោះវិជ្ជាជីវៈគណនេយ្យ និងសវនកម្ម ពោលគឺហិរញ្ញវត្ថុនេះមានលក្ខណៈទន់ខ្សោយនៅឡើយដោយមុនឆ្នាំ២០០០ យើងមិនទាន់ក្បួនច្បាប់ និងស្តង់ដារគណនេយ្យ និងសវនកម្ម នៅឡើយ។ ដូចនេះក្នុងនាមយើងជាកូនខ្មែរនៅក្នុងព្រះរាជាណាចក្រកម្ពុជាដែលសម្បូរ ទៅដោយវប្បធម៌ អរិយធម៌ និងចំណេះដឹងជាយូរ សតវត្សមកហើយ និងក្នុងតួនាទីឯកឧត្តម​បណ្ឌិតជារៀមច្បងដែលលោកបានចាប់កំណើតមុន ឃើញព្រះអាទិត្យមុន ហើយបានយកវិជ្ជា ជីវៈគណនេយ្យ និងសវនកម្ម ដែលលោកខេស៊ី បាណែត លោកបណ្ឌិតព្រំម វីរៈ និងលោកនូវ រតនា បានលើកឡើងពីចំណុចសំខាន់ និង កាតព្វកិច្ច និងតូនាទីរបស់គណនេយ្យករ និងសវនករជំនាញដែលយើងត្រូវបំពេញ វិជ្ជាជីវៈគណនេយ្យ និង សវនកម្មបានដើរតួយ៉ាងសំខាន់នៅ ក្នុងវិស័យសេដ្ឋកិច្ចនៃព្រះរាជាណាចក្រកម្ពុជា ដូច្នេះឯកឧត្តម​បណ្ឌិតលើលទឹកចិត្តអោយប្អូនៗ និស្សិត ទាំងអស់នៅតែបន្តការសិក្សា បណ្តុះបណ្ដាលជំនាញ និងចំណេះដឹងរបស់ខ្លួនបន្តទៀត។

ឯកឧត្តមបានបន្តទៀតថាកម្ពុជាបាន ធ្វើការរៀបចំ ច្បាប់១៥ស្ដង់ដារគណនេយ្យ និង១០ស្ដង់ដារសវនកម្មប៉ុណ្ណោះ​ ហើយបន្ទាប់មកក្នុងឆ្នាំ២០០២ កម្ពុជាក៏បានបង្កើតច្បាប់គណនេយ្យ និងសវនកម្មសម្រាប់សហគ្រានដែលមានសរុបប្រមាណជាង ២០មាត្រា​ ហើយក្នុងឆ្នាំ២០១៦ កម្ពុជាក៏ផ្លាស់ប្ដូរច្បាប់គណនេយ្យ និងសវនកម្ម​ សហគ្រាស និងវិជ្ជាជីវៈគណនេយ្យ មកជាច្បាប់គណនេយ្យ និងសវនកម្ម ដែលជាឈ្មោះខ្លី និងមានរហូតដល់ ៣០ទៅ៣៨មាត្រា ដែលរៀបច្បាស់លាស់ពីស្ដង់ដារគណនេយ្យ និងសវនកម្ម រួមជាមួយការចុះកិច្ចសន្យានៅទីក្រុងទីក្រុងឡុងដ៍ និងរដ្ឋវ៉ាស៊ីនតោន ក្នុងការយក ស្ដង់ដារគណនេយ្យ និងសវនកម្មអន្តរជាតិមកប្រើប្រាស់នៅក្នុងប្រទេសកម្ពុជាផងដែរ។ នេះសបញ្ជាក់អោយឃើញថាកម្ពុជាមានច្បាប់ស្ដង់ដារ គណនេយ្យ និងសវនកម្ម វិជ្ជាជីវៈច្បាស់លាស់ សម្រាប់អនុវត្តការងារមិនត្រឹមតែក្នុងស្រុក ប៉ុន្តែរួមទាំងការអនុវត្តការងារបានយ៉ាងត្រឹមត្រូវជា អន្តរជាតិ ដែលវាជាមោទនភាពមួយសម្រាប់កម្ពុជា។ ឯកឧត្តម​បណ្ឌិតក៏មានប្រសាសន៍បន្តទៀតថា ជាការពិតណាស់វិទ្យាស្ថានខេមអេដ ពិតជាបានដើរតួនាទីយ៉ាងសំខាន់ក្នុងវិស័យគណនេយ្យ និងហិរញ្ញវត្ថុ ក្នុងព្រះរាជាណាចក្រកម្ពុជា ដោយបានកំពុងបង្កើតធនធានមនុស្ស ដែលប្រកបដោយវិជ្ជាជីវៈ និងក្រមសីលធម៌ លើជំនាញបច្ចេកទេសសម្រាប់​ វិស័យ ៣ ក្នុងសេដ្ឋកិច្ចរបស់កម្ពុជា។  

 ទី១៖ភាគច្រើនសវនករដែលកំពុងបម្រើការងារក្នុងក្រុមហ៊ុនសវនកម្មឯករាជ្យបានបញ្ចប់ការសិក្សានៅ វិទ្យាស្ថានខេមអេដ មានដូចជា ក្រុមហ៊ុន PWC, KPMG, EY និង Deloitte ជាដើម។

ទី២៖នាយកប្រតិបត្តិក្នុងវិស័យធនាគារមួយចំនួនធំ ក៏សុទ្ធតែបានបញ្ចប់ការសិក្សាពី វិទ្យាស្ថានខេមអេដ ផងដែរ ដូចជា ប្រធានផ្នែក ហិរញ្ញវត្ថុ ប្រធាននាយកប្រតិបត្តិ អ្នកគ្រប់គ្រងហិរញ្ញវត្ថុនៃធនាគារ ជាដើម។

ទី៣៖វិទ្យាស្ថានខេមអេដបច្ចុប្បន្នគឺជាប្រភពសំខាន់មួយនៃមន្រ្តីរាជការលើកិច្ចការបច្ចេកទេស ដូចជា អគ្គនាយកដ្ឋានពន្ធដារ នៃក្រសួង សេដ្ឋកិច្ច និងហិរញ្ញវត្ថុ។

ឯកឧត្តមបណ្ឌិតក៏លើកឡើងនូវថា វិទ្យាស្ថានខេមអេដ បានផ្តោតសំខាន់លើគុណភាពអប់រំជាអត្ថិភាពចម្បង ហើយកម្មវិធីសិក្សារបស់ វិទ្យាស្ថានខេមអេដទាំងថ្នាក់​បរិញ្ញាបត្រ និងបរិញ្ញាបត្រជាន់ខ្ពស់ សុទ្ធតែត្រូវបានទទួលស្គាល់ដោយក្រសួងអប់រំ យុវជន និងកីឡា និង ហើយ ចំពោះកម្មវិធីសិក្សាអ្នកគណនេយ្យករជំនាញ (Association of Chartered Certified Accountants-ACCA) ក៏ត្រូវបានទទួលស្គាល់ជាផ្លូវការពីស្ថាប័នACCA របស់ចក្រភពអង់គ្លេស និងបណ្តាប្រទេសប្រហែល ១៨០ប្រទេស។ ការសិក្សានៅវិទ្យាស្ថាន ខេមអេដ គឺបានផ្ដល់ឱកាសដល់និស្សិតគ្រប់រូប ក្នុងការអភិវឌ្ឍគុណវឌ្ឍិរបស់ខ្លួន​ និងពង្រឹងចំណេះដឹងលើជំនាញច្បាស់លាស់ ដើម្បីទទួល​បាន ភាពលេចធ្លោរលើទីផ្សារការងាជាសកលនិងក្នុងស្រុករផងដែរ។ លើសពីនេះវិទ្យាស្ថានខេមអេដផ្ទាល់  រួមទាំងសាស្រ្តាចារ្យ ថ្នាក់ដឹកនាំ ក្រុមការ ងារ និងបុគ្គលិកទាំងអស់ ដែលបានខិតខំ និងសម្រេចបានជោគជ័យដល់សព្វថ្ងៃ គឺដោយសារតែ វិទ្យាស្ថានខេមអេដ តែងតែស្តាប់ និងទទួល យក ព្រមទាំងឆ្លើយតបទៅតម្រូវការរបស់និយោគជិក ក៏ដូចជាទិសដៅនៃគោលនយោបាយ ជាតិផ្សេងៗ ដែលចេញដោយ   ស្ថាប័ន សាធារណៈដែលពាក់ព័ន្ធជាដើម។​ មិនតែប៉ុណ្ណោះ វិទ្យាស្ថានខេមអេដបានខិតខំពង្រឹងគុណភាពអប់រំរបស់ខ្លួន ឲ្យលេចធ្លោទាំងក្នុង និងក្រៅ ប្រទេស ដោយបានក្លាយជាគ្រឹះស្ថានឧត្តមសិក្សាដំបូងគេនៅប្រទេសកម្ពុជា ដែលទទួលបានការទទួលស្គាល់លើគុណភាពអប់រំ    ពីសហរដ្ឋ អាមេរិក ក៏ដូចជាចក្រភពអង់គ្លេស ដែលមានដូចជា៖

• ការទទួលស្គាល់ដោយ ក្រុមប្រឹក្សាសម្រាប់ការទទួលស្គាល់គុណភាពអប់រំឧត្តមសិក្សា ACBSP នៃសហរដ្ឋអាមេរិក ដែលមានសុពល ភាពរយៈពេល១០ឆ្នាំ។ ACBSP គឺជាបណ្ដាញសកលលោកដ៏ធំបំផុតដែលមានឯកទេសក្នុងការទទួល ស្គាល់សាលាគណនេយ្យ និងធុរកិច្ច និងកម្មវិធីផ្សេងៗ ហើយមានទីតាំងនៅសហរដ្ឋអាមេរិក។
• គុណភាពអប់រំ ក្នុងកម្រិត Platinum ពីស្ថាប័នអន្តរជាតិអ្នកជំនាញផ្នែកគណនេយ្យ ACCA នៅចក្រភពអង់គ្លេស
• តាមរយៈ QS Stars Rating System ដែលវិទ្យាស្ថានខេមអេដទទួលបាន ក្នុងកម្រិតផ្កាយប្រាំទៅលើគុណភាពបង្រៀនរបស់ សាស្រ្តាចារ្យ
• ការទទួលស្គាល់ពី ASEAN University Network-Quality Assurance (AUN-QA) ដែលជាស្ថាប័នមួយដែលផ្តល់ នូវការណែនាំនិងគម្រូស្តង់ដារនានា ដើម្បីលើកកម្ពស់ការអភិវឌ្ឍប្រព័ន្ធ ធានាគុណភាព ដែលជាឧបករណ៍មួយសម្រាប់រក្សា កែលម្អ និងលើកកម្ពស់ការបង្រៀន ការស្រាវជ្រាវ និងស្តង់ដារសិក្សាទាំងមូលរបស់ស្ថាប័នអប់រំដែលជាសមាជិករបស់ AUN-QA។
• វិញ្ញាបនបត្រទទួលស្គាល់គុណភាពអប់រំ ពីគណៈកម្មាធិការទទួលស្គាល់គុណភាពអប់រំនៃកម្ពុជា(ACC)

ដោយមានការប្រតិបត្តិការ និងសហការយ៉ាងរឹងមាំរវាងស្ថាប័នទាំងបីខាងលើនេះហើយ ទើបធ្វើឱ្យនិស្សិតដែលបានបញ្ចប់ការសិក្សា ពីវិទ្យាស្ថានខេមអេដ មានភាពងាយស្រួល និងមានឱកាសច្រើនក្នុងការស្វែងរកការងារធ្វើ។ លើសពីនេះទៅទៀត វិទ្យាស្ថានខេមអេដ ក៏មានដៃ គូសហការក្នុងការស្វែងរកការងារជូននិស្សិត នៅតាមស្ថាប័នឯកជនធំៗផងដែរដូចជាក្រុមហ៊ុន PWC, KPMG, EY និង Deloitte ជាដើម។

ជាទីបញ្ចប់ តាងនាមក្រសួងសេដ្ឋកិច្ចនិងហិរញ្ញវត្ថុ និងក្នុងនាមឯកឧត្តមផ្ទាល់ សូមចូលរួមអបអរសាទរ ដល់ប្អូនៗដែលបានបញ្ចប់ការ សិក្សាក្នុងថ្ងៃនេះ និងថ្លែងអំណរគុណក៏ដូចជាកោតសសើរដល់នាយកគ្រប់គ្រង ថ្នាក់ដឹកនាំគ្រប់កម្រិត សាស្រ្តាចារ្យ បុគ្គលិក ជាពិសេសក្មួយៗ និសិ្សតទាំងអស់ នៃវិទ្យាស្ថានខេមអេដ ដែលបានខិតខំរៀបចំ និងចូលរូមក្នុងកម្មវិធីនេះ និងសូមប្រសិទ្ធិពរនូវពុទ្ធិពរទាំងបួនប្រការ គឺ អាយុ វណ្ណៈ សុខៈ និងពលៈ ចំពោះ លោក លោកស្រី និងអ្នកនាងកញ្ញា កុំបីឃ្លាងឃ្លៀតឡើយ។

ក្នុងឱកាសដ៏មហោឡារិកនេះ ដើម្បីចូលរួមអបអរសាទរដល់និស្សិតបញ្ចប់ការសិក្សា ឯកឧត្តមបណ្ឌិត សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា “ខ្ញុំសូមចាប់ផ្តើមជាមួយនឹងសំណួរដែល ខ្ញុំសង្ឃឹមថាអ្នកឆ្លើយដោយ មោទនភាព —លើកដៃឡើង ប្រសិនបើអ្នកនៅទីនេះជាមួយគ្រួសាររបស់អ្នក ឪពុកម្តាយ និងបងប្អូនរបស់អ្នក…  សូមអនុញ្ញាតឲ្យខ្ញុំគោរព ដោយស្មោះ និងស្វាគមន៍យ៉ាងកក់ក្តៅបំផុតចំពោះពួកគេទាំងអស់គ្នា។ ឥឡូវនេះ សូមលើកដៃឡើង ប្រសិនបើអ្នកនៅទីនេះថ្ងៃនេះជាមួយដៃគូ ជីវិតរបស់អ្នក ឬមនុស្សពិសេសរបស់អ្នក! នៅ​ក្នុង​ពិភពលោក​ដែល​តែងតែ​មាន​អារម្មណ៍​ថា​គ្មាន​ទំនាក់ទំនង  ការ​នៅ​ជាមួយ​មនុស្ស​ដែល​អ្នក​ ស្រឡាញ់​ក្នុង​ថ្ងៃ​ពិសេស​មួយ​នេះ​គឺ​ពិត​ជា​ពរជ័យជា​អ្វី​ដែល​យើង​ទាំង​អស់​គ្នា​ប្រាថ្នា។

ឥឡូវ​នេះ​ខ្ញុំ​សូម​ចូល​ទៅ​កាន់​សំណួរ​មួយទៀត លើកដៃ ឡើង បើអ្នកជាមនុស្សដំបូងក្នុងគ្រួសារអ្នកដែលទទួលបានសញ្ញាបត្របរិញ្ញាបត្រ។ ថ្ងៃនេះអ្នកមិនត្រឹមតែបញ្ចប់ការសិក្សាទេ អ្នកកំពុងបង្កើត ប្រវត្តិសាស្ត្រសម្រាប់គ្រួសារអ្នក និងខ្លួនអ្នក។ អ្នកគឺជាសុបិនក្លាយជាការពិតរបស់ឪពុកម្តាយ ជីដូនជីតារបស់អ្នក ប្រហែលជាពួកគាត់មិនទាន់ បានទៅសាលារៀនដូចពួកយើង ប៉ុន្តែបានអធិស្ឋានថា ថ្ងៃណាមួយ នរណាម្នាក់មកពីត្រកូលរបស់ពួកគេនឹងដើរដោយមោទនភាពក្នុងឈុត បញ្ចប់ការសិក្សា ហើយម្នាក់នោះគឺជាអ្នក។

ថ្នាក់ឆ្នាំ២០២៥ អ្នកគឺជាជំនាន់ពិសេសមួយ មិនត្រឹមតែដោយសារតែអ្នកអាចសរសេរនិក្ខេបបទ និងកែសម្រួលវីដេអូ TikTok ក្នុងពេលតែមួយ... ប៉ុន្តែដោយសារតែជីវិតដែលអ្នកបានរស់នៅរួចហើយ។ អ្នកកើតនៅដើមទសវត្សរ៍ឆ្នាំ២០០០ ដល់២០០៣ ឬកន្លែងណាមួយនៅជុំវិញនោះ ដែលទាំងនោះគឺជាឆ្នាំដែលប្រជាជន ឮកម្ពុជាជិតពាក់កណ្តាលរស់នៅ ក្រោមបន្ទាត់នៃភាពក្រីក្រ មានតែប្រហែល ១៥% ប៉ុណ្ណោះដែលមានអគ្គិសនីប្រើប្រាស់ ហើយមួយភាគបីមានទឹកស្អាតប្រើប្រាស់។ អ្នកធំឡើងនៅទសវត្សរ៍ឆ្នាំ២០០០ និងដើមឆ្នាំ២០១០។ ជំនាន់របស់អ្នកនាំមកនូវពេលវេលានៃការលេងក្រោមភ្លៀង ឬចាប់មេអំបៅនៅខាងក្រៅជាមួយមិត្តភក្តិ ប៉ុន្តែក៏ជាការចាប់ ផ្តើមនៃការលេងហ្គេមវីដេអូក្នុងផ្ទះផងដែរ។ អ្នកបានឃើញរូបថ្លុកដំបូងរបស់អ្នកនៅលើអេក្រង់ធំ ហើយបន្ទាប់មកបានបន្តទៅ YouTube ហើយនិយាយលាទៅកាន់ឧបករណ៍ចាក់ស៊ីឌី និងម៉ាស៊ីនថត Cassette ក្នុងពេលតែមួយ។ អ្នកធ្លាប់ឆ្លងកាត់សម័យ Angry Birds, Pokemon Go ប៉ុន្តែបានឃើញការបាត់ទូរស័ព្ទ Nokia និង Motorolla ។

អ្នកបានសិក្សានៅទសវត្សរ៍ឆ្នាំ២០១០ និងឆ្នាំ២០២០ អ្នកបានឃើញការកើនឡើងនៃស្មាតហ្វូន ប្រព័ន្ធផ្សព្វផ្សាយសង្គម អ្នកមានឥទ្ធិពល និងចលនាឌីជីថល។ អ្នកបានក្លាយជាផ្នែកនៃជំនាន់ឌីជីថល ដំបូងគេពិតប្រាកដ ដោយភ្ជាប់ជូនដំណឹង និងតែងតែចង់ដឹងចង់ឃើញ។ អ្នកបានបញ្ចប់វិទ្យាល័យនៅពាក់កណ្តាលនៃការរាតត្បាតសកលនៃ Covid-19 ហើយបានចូលសាកលវិទ្យាល័យតាមរយៈអេក្រង់ Zoom និងថ្នាក់រៀនឌីជីថល។ ឥឡូវនេះអ្នកនៅទីនេះនៅឆ្នាំ២០២៥ ទទួលបានការអប់រំ ភ្ជាប់ទំនាក់ទំនង និងត្រៀមខ្លួនជាស្រេចដើម្បីបង្កើតអនាគត។ អ្នកបានឆ្លងកាត់បីទសវត្សរ៍ផ្សេងគ្នា ពីរសតវត្សផ្សេងគ្នា សហស្សវត្សរ៍ពីរផ្សេងគ្នា និងជាពេលវេលាផ្លាស់ប្តូរលឿនបំផុតមួយក្នុងប្រវត្តិសាស្ត្រមនុស្សជាតិ។ ប៉ុន្តែសូម​មើល​ឲ្យ​កាន់តែ​ជិត អ្នកមិនចាំបាច់ រង់ចាំកម្មវិធីទូរទស្សន៍ទេ អ្នកបានចេញពីទូរទស្សន៍ខ្សែកាបទៅ Netflix TikTok និងផ្សាយផ្ទាល់អ្វីៗគ្រប់យ៉ាង។ អ្នកធំឡើងជាមួយ YouTube និងបានមើលការកើនឡើងនៃឥទ្ធិពល អ្នកបង្កើត និងតារាឌីជីថល ហើយអ្នកបានស្ទាត់ជំនាញសិល្បៈនៃការរៀនមេរៀនជីវិតពី វីដេអូ និងផ្នែកមតិរយៈពេល ៦០វិនាទី ហើយអ្នកឱ្យតម្លៃវាច្រើនជាងមេរៀន៤ម៉ោងរបស់គ្រូរបស់អ្នក។  អ្នកធំឡើងជាមួយនឹងការសន្ទនា អំពីសុខភាពផ្លូវចិត្ត អត្តសញ្ញាណជាតិ ការប្រែប្រួលអាកាសធាតុ និងសមភាពរបស់មនុស្ស។ ជំនាន់​របស់​អ្នក​មិន​ខ្លាច​ក្នុង​ការ​និយាយ តាម​អ៉ីនធឺណេត ឬ​ក្រៅអ៉ីនធឺណេត។ អ្នកបានរៀនមិនត្រឹមតែពីរបៀបអូស និងរំកិលប៉ុណ្ណោះទេ ប៉ុន្តែរបៀបគិត និយាយឡើង និងភាពលេចធ្លោ ហើយតាមរបៀបណាក៏ដោយក្នុងយុគសម័យនៃការនិយាយដោយសេរី មនុស្សតែងតែភ្លេចនិយាយអ្វីដែលសំខាន់ ហើយកុំភ្លេចបង្ហោះអ្វីដែល មិនមាន។ អ្នកបានឃើញប្រព័ន្ធ AI ចូលក្នុងថ្នាក់រៀន ផ្ទះ ទូរស័ព្ទ និងសុបិន។ អ្នកកំពុងឃើញបដិវត្តន៍ជីវសាស្រ្ត និងថ្ងៃរះនៃយុគ សម័យបញ្ញាសិប្បនិម្មិត ហើយនេះគ្រាន់តែជាការចាប់ផ្តើមរបស់អ្នក។ អ្នកបានឃើញបច្ចេកវិជ្ជាអាកាសធាតុ ការកែហ្សែន ការគណនាកង់ទិច និងការបើកដំណើរការ SpaceX ហើយ ប៉ុន្តែជាមួយនឹងភាពអស្ចារ្យជុំវិញនេះ មនុស្សនៅតែស្នើឱ្យ AI សរសេរសំបុត្រស្នេហា ឈ្លោះ ជាមួយមនុស្សចម្លែកតាអ៉ីនធឺណេត ធ្វើពុតជាវីរបុរសវប្បធម៌នៅលើប្រព័ន្ធផ្សព្វផ្សាយសង្គម និងនិយាយអ្វីៗគ្រប់យ៉ាងដោយមិនគិតពីអ្វីដែល ឆ្លុះបញ្ចាំងពីប្រវត្តិសាស្ត្រពិតប្រាកដនោះទេ។​ ទោះជាយ៉ាងណាក៏ដោយ អ្នកបានរៀនពីភាពធន់ ការរៀនពីចម្ងាយ ការលត់ដំខ្លួន និងការយក ចិត្តទុកដាក់ចំពោះគ្រួសារ និងសហគមន៍របស់អ្នក។ អ្នកបានមើលពីរបៀបដែលពិភពលោកឆ្លើយតប សម្របខ្លួន និងកើនឡើងម្តងទៀត ហើយ​ជំនាញ​ជីវិត​មួយ​ដែល​សំខាន់​បំផុត​ក្នុង​សតវត្ស​ទី២១ គឺការ​សម្រប​ខ្លួន។ អ្នក​បាន​ផ្លាស់ទី​ឆ្លងកាត់​ពិភព​លោក​មួយ​ដែល​មាន​ឧបករណ៍ ​វិវត្តន៍​ឥតឈប់ឈរ។ អ្នកបានធំឡើងនៅក្នុងពេលដែលការផ្លាស់ប្តូរគឺថេរ ហើយអ្នកមិនគ្រាន់តែរស់រានមានជីវិតនោះទេ អ្នកបានទទួលយកវា។ អ្នកបានទទួលយកវាជាមួយនឹងការច្នៃប្រឌិត។ អ្នកកើតនៅដើមសតវត្សន៍ទី២១ ហើយអ្នកផ្ទុកនូវភាពក្លាហាននាពេលអនាគត។ នៅ​ក្នុង​ពិភព​ លោក​ដែល​មិន​ដែល​នៅ​ស្ងៀម អ្នករស់នៅ​ជាមួយ​នឹង​ការ​ផ្លាស់​ប្តូ​រ​។ អ្នកមិនត្រឹមតែត្រូវបានបណ្តុះបណ្តាលឱ្យធ្វើតាមច្បាប់ប៉ុណ្ណោះទេ អ្នកត្រូវ បានបណ្តុះបណ្តាលឱ្យអនុវត្តពួកវាឡើងវិញជាមួយគោលដៅជាក់លាក់។

ដូច្នេះនិស្សិតបញ្ចប់ការសិក្សាជាទីស្រឡាញ់! ឆ្ពោះទៅមុខជាមួយនឹងភាពបត់បែន ការច្នៃប្រឌិត និងសេចក្តីប្រាថ្នារបស់អ្នក អ្នកបន្តរៀន ដឹកនាំ និងលើកកំពស់អ្នកដទៃ។ ធ្វើជាអ្នកដែលមិនគ្រាន់តែអង្គុយ ហើយធ្វើតាមគ្រប់ច្បាប់ ឬចុះចាញ់នឹងសម្ពាធទេ ប៉ុន្តែនាំមកនូវ ភាពប្រែប្រួលរបស់អ្នក ដើម្បីបន្តការរៀនសូត្រ រីកចម្រើន និងរៀបចំដំណើរជីវិតរបស់អ្នកប្រកបដោយគោលបំណង។ ពិភពលោកនឹងបន្ត ផ្លាស់ប្តូរ ប៉ុន្តែសមត្ថភាពនៃការសម្របខ្លួនទៅនឹងការផ្លាស់ប្តូរនឹងក្លាយជាកម្លាំងដ៏អស្ចារ្យបំផុតរបស់អ្នក។ ធ្វើជាអ្នកដែលមិនរង់ចាំការអនុញ្ញាត ដើម្បីដឹកនាំ ប៉ុន្តែប្រើការច្នៃប្រឌិតរបស់អ្នកដើម្បីដោះស្រាយបញ្ហា ជំរុញគំនិត និងចាប់ផ្តើមអ្វីថ្មី ទោះបីជាផ្លូវមិនច្បាស់ក៏ដោយ។ អ្នកមិនចាំបាច់ មានចំលើយទាំងអស់ ដើម្បីឈានទៅជំហានដំបូងនោះទេ។ គ្រាន់តែចាប់ផ្តើមកន្លែងដែលអ្នកនៅជាមួយអ្វីដែលអ្នកមាន។ ហើយ​ធ្វើ​ជា​អ្នក​ដែល ​មិន​ក្រោក​ឡើង​តែ​ម្នាក់​ឯង ប៉ុន្តែ​នាំ​មក​នូវ​សេចក្តី​ប្រាថ្នា​របស់​អ្នក​ដើម្បី​លើក​អ្នក​ដទៃ​នៅ​ពេល​ដែល​អ្នក​ឡើង។ ភាពជោគជ័យមានន័យកាន់តែ ច្រើននៅពេលដែលវាត្រូវបានចែករំលែក។ ក្លាយជាមនុស្សជំនាន់ដែលជ្រើសរើសការយល់ចិត្តលើអត្មា និងឥទ្ធិពលលើការអបអរសាទរ។ ដោយសារតែពិភពលោកត្រូវការគំនិតឆ្លាតវៃ ប៉ុន្តែក៏មានបេះដូងដ៏កក់ក្តៅដែលសម្របខ្លួនដោយក្តីមេត្តា ច្នៃប្រឌិតដោយគោលបំណង និងក្តី ប្រាថ្នាមិនត្រឹមតែដើម្បីជោគជ័យប៉ុណ្ណោះទេ ប៉ុន្តែថែមទាំងធ្វើឱ្យមានការផ្លាស់ប្តូរផងដែរ។ សូមឱ្យអ្នកដើរទៅមុខជាមួយនឹងការសម្របខ្លួន ការច្នៃប្រឌិត និងសេចក្តីប្រាថ្នា។ អនាគត​មិន​ត្រឹម​តែ​រង់​ចាំ​អ្នក​ប៉ុណ្ណោះ​ទេ - វា​កំពុង​ពឹង​ផ្អែក​លើ​អ្នក។

ថ្នាក់នៃឆ្នាំ២០២៥ នៅពេលដែលយើងមកជិតដល់ពិធីដ៏អស្ចារ្យនេះ។ ដោយទទួលយកដោយកិត្តិយសដ៏ខ្ពង់ខ្ពស់ ការអញ្ជើញពី វិទ្យាស្ថានខេមអេដ ឱ្យធ្វើជាអធិបតីក្នុងពិធីប្រគល់សញ្ញាបត្ររបស់អ្នក ដោយទទួលស្គាល់ថាអ្នកបានបំពេញតម្រូវការសិក្សា និងលក្ខណៈ វិនិច្ឆ័យគុណវុឌ្ឍិទាំងអស់ ក្រោម​អំណាច​ប្រគល់​ឱ្យ​ខ្ញុំ​ជា​រដ្ឋលេខាធិការ​ក្រសួង​អប់រំ យុវជន និង​កីឡា។ ខ្ញុំ​សូម​ប្រគល់​សញ្ញាបត្រ​ជូន​អ្នក ​រាល់​គ្នា​ចាប់ពី​ពេល​នេះ​តទៅ។ សូមអបអរសាទរ!”

ជាមួយគ្នានេះដែរ លោកខេស៊ី បាណេត នាយកនៃវិទ្យាស្ថានខេមអេដបានចូលរួមអបអរសាទរដល់និស្សិត ជ័យលាភីទាំងអស់ និងមានប្រសាសន៍ថា “តាំងនាមអោយវិទ្យាស្ថានខេមអេដ សូមគោរព ឯកឧត្តមបណ្ឌិត ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ សមាជិកក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ ប្រធានគណៈកម្មាធិការគ្រប់គ្រងកម្មវិធីសិក្សាគណនេយ្យករជំនាញកម្ពុជា និងជា ប្រធានគណៈកម្មការចុះឈ្មោះ និងសមាជិកភាពវិទ្យាស្ថានគណនេយ្យករជំនាញ និងសវនករកម្ពុជាដ៏ខ្ពង់ខ្ពស់ សូមគោរព ឯកឧត្តមបណ្ឌិត  សាន វឌ្ឍនា រដ្ឋលេខាធិការ ក្រសួងអប់រំ យុវជន និងកីឡា នៃ​ព្រះរាជាណាចក្រ​កម្ពុជាដ៏ខ្ពង់ខ្ពស់ សូមគោរពលោកបណ្ឌិត ព្រំម វិរៈ ប្រធានក្រុមប្រឹក្សាភិបាល​នៃ​វិទ្យាស្ថាន​ខេមអេដ សូមគោរព​លោក នូវ រតនា នាយកការិយាល័យ​តំណាង​ អេស៊ីស៊ីអេ ប្រចាំ​ប្រទេស​កម្ពុជា សូមគោរព​ឯកឧត្ដម លោកជំទាវ​ ​លោកបណ្ឌិត​​ សាស្ត្រាចារ្យ មាតាបិតា អាណាព្យាបាល​និស្សិត និង​និស្សិតបញ្ចប់​ការសិក្សា​ ព្រមទាំង​សហការី​ និង​ភ្ញៀវ​កិត្តិយស​ទាំង​អស់​ដែល​កំពុង​មានវត្តមាន​ចូលរួម​ក្នុង​កម្មវិធី​ដ៏​​ឱឡារិក​​នាថ្ងៃ​នេះ ជាទី​គោរព​ដ៏​ខ្ពង់ខ្ពស់ និង​ជាទីស្រឡាញ់​រាប់អាន​ដ៏​ស្មោះ​ អស់​ពីដួងចិត្ត។ ខ្ញុំបាទ​មាន​កិត្តិយស​ និង​មាន​សេចក្ដី​សោមនស្ស​​រីក​រាយ ​ជាក្រៃលែង ដែលបាន​មក​ចូលរួម​អបអរសាទរ​ក្នុង​កម្មវិធី​​ ប្រគល់ សញ្ញាបត្រ​ ជូនដល់​និស្សិត ​ដែល​បាន​បញ្ចប់​ការសិក្សា​ ថ្នាក់បរិញ្ញាបត្រ នៃ​វិទ្យាស្ថាន​ខេមអេដ ជាមួយ​វត្តមាន​របស់​ឯកឧត្ដម លោក​ជំទាវ លោកបណ្ឌិត ​សាស្រ្តាចារ្យ​ លោក លោកស្រី និងនិស្សិត​ទាំងអស់​ នា​ឱកាស​ថ្ងៃនេះ​។

ឯកឧត្ដម​ លោកជំទាវ លោក​បណ្ឌិត សាស្ត្រាចារ្យ លោក លោកស្រី និងនិស្សិតទាំងអស់ ជាទីគោរព និង​ជាទី​ស្រឡាញ់​រាប់អាន​ ក្នុង​​ឱកាស​នេះ​ដែរ​ ខ្ញុំបាទ​មានពាក្យ​ក្នុង​ចិត្ត​ ពីរ បី ម៉ាត់ មក​ជម្រាបជូន ឯកឧត្ដម លោកជំទាវ លោកបណ្ឌិត ​សាស្ត្រាចារ្យ លោក លោកស្រី ជា​ពិសេស ខ្ញុំបាទសូម​រំឮក និង​​​​ផ្ដាំផ្ញើ​បន្ថែម ដល់​និស្សិត ​ដែល​បានបញ្ចាប់​ការសិក្សា ​ដោយ​ជោគជ័យ ទាំង​អស់​គ្នា អោយបានជ្រាបថា អ្នក ទាំង​អស់ បាន​ខិតខំ​ប្រឹង​ប្រែង​ខ្លាំង​ណាស់​ ទម្រាំ​បាន​មក​ដល់​ថ្ងៃ​នេះ​។ អ្នក​ទាំង​អស់​គ្នា បានឆ្លង​កាត់​ការខិត​ខំ​ប្រឹង​ប្រែង​សិក្សា យ៉ាងស្វិតស្វាញ​ ដែល​ជា​ញឹកញាប់ រហូត​ដល់​យប់​ជ្រៅ​ អ្នក​ធ្លាប់​ឆ្លង​កាត់​មុខ​វិជ្ជា​លំបាកៗ ​ជាច្រើន ហើយ​នៅ​អាច​ឆ្លៀត​ពេល​ចូល​រួម​សកម្មភាព​កីឡា ​ក៏ដូចជា​ សកម្មភាព​ក្រៅ​កម្មវិធី​សិក្សា​ផ្សេងៗ​ទៀត ដូចជា​សកម្មភាព​សង្គម​ជា​ដើម ។ល។ របស់​សាលា​។ អ្នក​ទាំង​អស់​គ្នា បាន​ចេះ​ដឹង ចេះ​គិត​ពិចារណា វិភាគ ស៊ីជម្រៅ ចេះ​​ដោះ​ស្រាយ​បញ្ហា​ផ្សេងៗ​ និង​ចេះ​ធ្វើ​ការ​ងារ​ជា​ក្រុម ចេះ​សហការ​ សាមគ្គី​​ការ​ងារ​ ប្រកប​ដោយ​ប្រសិទ្ធភាព​ខ្ពស់ ។ល។ ខ្ញុំ​បាទ​សូម​ប្រាប់ដល់​អ្នក​ទាំង​អស់​គ្នាថា អ្នកពិត​ជា​សក្ដិសម​នឹង​ទទួល​បាន​ជោគជ័យ​នេះ​ណាស់។ ខ្ញុំបាទ​សូម​ចូល​រួម​អបអរសាទរ​ដោយស្មោះ​ អស់​ពី​ដួង​ចិត្ត​! ​ថ្ងៃ​នេះ​ អ្នក​គឺ​ជា​ធនធាន​យ៉ាង​សំខាន់​របស់​គ្រួសារ ​សង្គម​ និង​ពិភពលោក។ ថ្ងៃ​​អនាគត​ខាងមុខ​នេះ​ អ្នក​នឹង​ជា​ធន​ធានកាន់ ​តែ​សំខាន់ ដោយ​អ្នក​អាច​នឹង​ក្លាយ​ទៅជា​អ្នក​ដឹកនាំ ក្នុង​ស្ថាប័ន​ជាតិ ឬ​អន្តរជាតិ ​ណាមួយ​​​​ ដូច្នេះ​អ្នក​នឹង​អាច​​បង្កើត​បាន​នូវ​​គំនិត​​ថ្មីៗ ឬ​ភាព ​ច្នៃប្រឌិត​​​ថ្មីៗ​។ ខ្ញុំបាទ​មាន​ជំនឿ​យ៉ាង​មុត​មាំ​ថា អ្នក​ទាំង​អស់​គ្នា​នឹង​ប្រើ​ប្រាស់​សមត្ថភាព​ ចំណេះ​ដឹង និង​ជំនាញ​របស់​អ្នក ដើម្បី​​ជា​ប្រយោជន៍​ ​ដែល​នាំ​ទៅរក​ មោទនភាព​របស់​ខ្លួនផង​ ​របស់​គ្រួសារផង និង​របស់​សង្គម​ជាតិ​ ក៏ដូចជា​សកល​លោក​ផ​ង។

​ខ្ញុំបាទសូមផ្ដាំផ្ញើផងដែរថា ខណៈពេលដែល អ្នកទាំងអស់គ្នាប្រឡូកចូលក្នុងសង្គម ក៏ដូចជាក្នុងសកលលោក អ្នកគួរគប្បីប្រកាន់ ខ្ជាប់នូវព្រហ្មវិហារធម៌ទាំងបួនគឺ មេត្តា ករុណា មុទិតា និងឧបេក្ខា។ សូមអ្នកបន្តរក្សាអោយបាននូវសេចក្ដីក្លាហាន ការតស៊ូ និងបើកចិត្ត អោយទូលាយ ហ៊ានប្រឈមនឹងអ្វីដែលថ្មី និងជាពិសេសបន្តអភិវឌ្ឍខ្លួនជានិច្ចតាមរយៈការសិក្សាពេញមួយជីវិត។ សង្គមជាតិ ក៏ដូចជាពិភព លោក កំពុងតែត្រូវការអ្នកដែលមានសមត្ថភាព ចំណេះដឹង និងជំនាញ ដូចជារូបអ្នកទាំងអស់គ្នានេះហើយ។ សូមឱ្យនិស្សិតទាំងអស់គ្នា ទទួលបាននូវជោគជ័យដ៏ត្រចះត្រចង់ ដែលនឹងនាំយកមកនូវប្រយោជន៍ និងមោទនភាព ជូនខ្លួនឯងផង ក្រុមគ្រួសារផង និងសង្គមជាតិផង។

ជាចុងបញ្ចប់ ខ្ញុំបាទសូមគោរពថ្លែងអំណរគុណយ៉ាងជ្រាលជ្រៅ ចំពោះវត្តមានដ៏ខ្ពង់ខ្ពស់បំផុតរបស់ឯកឧត្តមបណ្ឌិត ងី តាយី រដ្ឋ លេខាធិការក្រសួងសេដ្ឋកិច្ច និងហិរញ្ញវត្ថុ សមាជិកក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារប្រធានគណៈកម្មាធិការគ្រប់គ្រងកម្ម វិធីសិក្សាគណនេយ្យករជំនាញកម្ពុជា និងជាប្រធានគណៈកម្មការចុះឈ្មោះ និងសមាជិកភាពវិទ្យាស្ថានគណនេយ្យករជំនាញ និងសវនករកម្ពុជា និងសូមគោរពថ្លែងអំណរគុណ ចំពោះវត្តមានរបស់ឯកឧត្ដម លោកជំទាវ លោកបណ្ឌិត សាស្ត្រាចារ្យ អស់លោក លោកស្រី មាតាបិតា អាណា ព្យាបាល និងនិស្សិត ព្រមទាំងសហការី និងភ្ញៀវកិត្តិយសទាំងអស់ ដែលបានចំណាយពេលវេលាដ៏មានតម្លៃ មកផ្ដល់កិត្តិយសក្នុងកម្មវិធីនា ថ្ងៃនេះ។

ខ្ញុំបាទ​សូមគោរព​ជូនពរ​​អោយ​​ឯកឧត្ដម លោកជំទាវ លោកបណ្ឌិត សាស្ត្រាចារ្យ អស់លោក លោកស្រី អ្នកនាងកញ្ញា និង​និស្សិត​ដែល​បាន​បញ្ចប់​ការសិក្សា​ ព្រមទាំង​ភ្ញៀវ​កិត្តិយស​ទាំង​អស់ អោយ​ជួប​នូ​វពុទ្ធពរ​​ទាំង​បួន​ប្រការ គឺ អាយុ វណ្ណៈ សុខៈ ពលៈ កុំបី​ឃ្លាងឃ្លាត​ឡើយ។ សូមអរគុណ!”