ក្រោយចំណាយពេលសាងសង់អស់រយៈពេលជាង៣ឆ្នាំទីបំផុតព្រលានយន្តហោះអន្តរជាតិសៀមរាប-អង្គរបានសម្ពោធដាក់ប្រើប្រាស់ជាផ្លូវការហើយ ក្រោមអធិបតីសម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រី  នៃ ព្រះរាជាណាចក្រកម្ពុជា។ យ៉ាងណាមិញកម្ពុជានៅសល់ព្រលានយន្តហោះចំនួន៤ទៀត ខណៈ នៅមានព្រលានយន្តចំនួន២កំពុងសាងសង់និង២ទៀតកំពុងសិក្សា។ នេះបើយោងតាមប្រសាសន៍របស់ឧត្ដមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល។

ថ្លែងនៅក្នុងពិធី សម្ពោធដាក់ឲ្យប្រើប្រាស់ជាផ្លូវការអាកាសយានដ្ឋានអន្តរជាតិសៀមរាបអង្គរ កាលពីថ្ងៃទី១៦ ខែវិច្ឆិកា ២០២៣ កន្លងទៅ ឯឧត្តមបានលើកឡើងថា  “ជាក់ស្ដែងបន្ថែមពីលើអាកាសយានដ្ឋានសៀមរាប-អង្គដែលបានដាក់សម្ពោតឲ្យប្រើប្រាស់ជាផ្លូវការថ្ងៃនេះ កម្ពុជាបាននឹងកំពុងសាងសង់អាកាសយានដ្ឋានចំនួន២ទៀត គឺអាការយានដ្ឋានភ្នំពេញនិងដារាសាគរ និងលើកកំរិតអាកាសយានដ្ឋានព្រះសីហនុ ជាមួយគ្នានេះ យើងក៏មានអាកាសយានដ្ឋានមណ្ឌលគីរី និងអាកាសយានដ្ឋានកោះរ៉ុង ក៏ស្ថិតនៅក្នុងគម្រោងរបស់រាជរដ្ឋាភិបានផងដែរ”។