កាលពីដើមខែឧសភា ឆ្នាំ២០២៤ កន្លងទៅ ក្រុមហ៊ុនផលិតរថយន្ដ Toyota របស់ប្រទេសជប៉ុន ទើបនឹងបានសម្ពោធបើកដំណើរការរោងចក្រដំឡើងរថយន្ដរបស់ខ្លួនដំបូងបំផុតនៅក្នុងប្រទេសកម្ពុជា ដែលមានសមត្ថភាពដំឡើងរថយន្ដសរុប ១ ៣២០ គ្រឿងនៅក្នុង ១ ឆ្នាំ។ ដោយក្នុងនោះ រថយន្ដ FORTUNER មានចំនួន ២៩០ គ្រឿង និងរថយន្ដ HILUX មានចំនួន ១,០៣០គ្រឿង។
យ៉ាងណាទាក់ទងនឹងវិស័យដំឡើងយានយន្ដខាងលើ ថ្មីៗនេះក្រុមហ៊ុនផលិតអគ្គិសនី BYD របស់ប្រទេសចិនក៏បានបង្ហើបពីគម្រោងសាងសង់រោងចក្រដំឡើងរថយន្ដរបស់ខ្លួននៅក្នុងប្រទេសកម្ពុជាផងដែរ ដែលមានសមត្ថភាពដំឡើងបានច្រើនជាងរោងចក្ររបស់ Toyota ជាង ១០ ដងឯណោះ។
តាមការបញ្ជាក់ពីលោក Liu Xueliang អគ្គនាយកក្រុមហ៊ុន BYD Asia Pacific Auto Sales Division ក្នុងជំនួបសម្ដែងការគួរសម និងពិភាក្សាការងារជាមួយសម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជានៅថ្ងៃទី ១៥ ខែកក្កដា ឆ្នាំ២០២៤ បានឲ្យដឹងថា ក្រុមហ៊ុន BYD Asia Pacific Auto Sales Division មានគម្រោងសាងសង់រោងចក្រដំឡើងយានយន្តអគ្គិសនីនៅកម្ពុជា ដែលអាចមានសមត្ថភាពដំឡើងរថយន្តចំនួន ២០ ០០០គ្រឿងក្នុងមួយឆ្នាំ សម្រាប់ផ្គត់ផ្គង់ទីផ្សារក្នុងស្រុក និងនាំចេញទីផ្សារអន្តរជាតិ ។
សូមជម្រាបថា ក្រុមហ៊ុន BYD Asia Pacific Auto Sales Division ត្រូវបានបង្កើតឡើងនៅឆ្នាំ១៩៩៥ និងមានទីស្នាក់ការនៅក្រុង Shenzhen ប្រទេសចិន ។ នៅឆ្នាំ២០២២ ក្រុមហ៊ុន BYD បានផលិតរថយន្ត ចំនួន ៣លានគ្រឿង និងមានសាខានៅ៧០ប្រទេស៕
