ក្រោយទទួលបានជោគជ័យលើផ្លូវល្បឿនលឿនទី១ គឺពីភ្នំពេញទៅព្រះសីហនុ ពេលនេះកម្ពុជាបាននឹងកំពុងសិក្សាក្នុងការសាងសង់ផ្លូវល្បឿនលឿនចំនួន ២ ខ្សែបន្ថែមទៀត ដែលក្នុងនោះរួមមានផ្លូវល្បឿនលឿនភ្នំពេញ-បាវិត និងផ្លូវល្បឿនលឿនភ្នំពេញ-សៀមរាប ខណៈផ្លូវល្បឿនលឿនភ្នំពេញ-បាវិត អាចបើកការដ្ឋានសាងសង់នៅពាក់កណ្ដាលឆ្នាំ២០២៣នេះ។

ជាក់ស្ដែងនៅក្នុងជំនួបជាមួយ ប្រតិភូសមាគមដឹកជញ្ជូនអ្នកដំណើរផ្លូវគោកកម្ពុជា (CAMBA) កាលពីថ្ងៃទី១១ ខែមករា ឆ្នាំ២០២៣ ឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដីក្រសួងសាធារណការ​ និងដឹកជញ្ជូនក៏បានលើកឡើងពីគម្រោងផ្លូវសំខាន់ទាំងពីនេះផងដែរ។

ដោយក្នុងឱកាលនោះឯកឧត្ដមបានលើកឡើងថា គម្រោងផ្លូវល្បឿនលឿនភ្នំពេញ-បាវិត ដែលបានសិក្សា និងចុះកិច្ចព្រមព្រៀងក្របខ័ណ្ឌរួចរាល់ហើយនោះ គ្រោងនឹងចុះហត្ថលេខាលើកិច្ចព្រមព្រៀងសម្បទាននៅខែក្រោយ ក្នុងពេលដែលសម្តេចតេជោ បំពេញទស្សនកិច្ចផ្លូវរដ្ឋនៅប្រទេសចិន លើសពីនេះទៅទៀត គម្រោងផ្លូវល្បឿនលឿនថ្មីមួយទៀត ភ្នំពេញ-សៀមរាប ក៏កំពុងសិក្សាផងដែរ។

ភ្ជាប់ជាមួយនឹងការលើកឡើងអំពីគម្រោងផ្លូវល្បឿនលឿនទាំងនេះ ឯកឧត្តមទេសរដ្ឋមន្ត្រី ក៏បានសំណូមពរទៅកាន់សមាគមដឹកជញ្ជូនអ្នកដំណើរផ្លូវគោកកម្ពុជា ឱ្យជួយជំរុញការដឹកជញ្ជូនតាមផ្លូវល្បឿនលឿនភ្នំពេញ-ក្រុងព្រះសីហនុ ហើយទាក់ទងនឹងសំណូមពរនេះដែរ សមាគមសូមធ្វើការគាំទ្រ និងចូលរួមជំរុញឱ្យប្រតិបត្តិករផ្តល់សេវាដឹកជញ្ជូនងាកមកប្រើប្រាស់ផ្លូវល្បឿនលឿនភ្នំពេញ-ក្រុងព្រះសីហនុ ឱ្យបានច្រើន។ ជាការឆ្លើយតប លោកប្រធានសមាគមបានបញ្ជាក់អំពីការចូលរួមប្រើប្រាស់ផ្លូវល្បឿនលឿន នាពេលកន្លងទៅ និងសន្យាថានឹងបន្តជំរុញការប្រើប្រាស់ឱ្យកាន់តែច្រើនជាងនេះទៅទៀត៕

អត្ថបទ៖ កឹម ប៊ុនធឿន