នៅថ្ងៃទី៣ ខែសីហា ឆ្នាំ២០២៣ ខាងមុខនេះ ក្រសួងសារធារណការ និងដឹកជញ្ជូន នឹងរៀបចំពិធីសម្ពោធដាក់ឲ្យប្រើប្រាស់ជាផ្លូវការកំណាត់ផ្លូវក្រវាត់ក្រុងទី៣។ ដោយកម្មវិធីនេះក៏មានការអញ្ជើញចូលរួមក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជាផងដែរ។ នេះបើយោងតាមការបញ្ជាក់ពីក្រសួងសាធារណការ និងដឹកជញ្ជូន កាលពីថ្ងៃទី២៤ ខែកក្កដា។
យ៉ាងណាមុនដល់ថ្ងៃបើកសម្ពោធឲ្យប្រើប្រាស់ជាផ្លូវការ យើងមកដឹងពីមហាវិថី និងផ្លូវសំខាន់ៗ ដែលផ្លូវក្រវាត់ក្រុងទី៣នេះតភ្ជាប់ជាមួយ។ តាមការឲ្យដឹង ផ្លូវក្រវាត់ក្រុងទី៣ នេះ គឺតភ្ជាប់មហាវិថីឈ្នះឈ្នះ ផ្លូវល្បឿនលឿនទី១ ផ្លូវល្បឿនលឿនទី២ ផ្លូវជាតិលេខ១ ផ្លូវជាតិលេខ២ ផ្លូវជាតិលេខ៣ ផ្លូវលេខ៤ ផ្លូវជាតិលេខ២១ និងចូលកំពង់ផែស្វយ័តភ្នំពេញផងដែរ។
ជាក់ស្ដែងយោងតាមការបញ្ជាក់ពីក្រសួងសាធារណការតបជាមួយសំណួររបស់ប្រជាពលរដ្ឋបានឲ្យដឹងយ៉ាងដូច្នេះថា “ក្រវាត់ក្រុងទី៣ តភ្ជាប់ពីមហាវិថីឈ្នះឈ្នះ ផ្លូវល្បឿនលឿន និងផ្លូវជាតិលេខ៤ កាត់មកផ្លូវលេខ៣ លេខ២ លេខ២១ និងលេខ១ ចូលកំពង់ផែស្វយ័តភ្នំពេញ និងភ្ជាប់ទៅផ្លូវល្បឿនលឿនភ្នំពេញ បាវិតតែម្តង”។
សូមជម្រាបថា ផ្លូវក្រវាត់ក្រុងទី៣ មានប្រវែងប្រមាណ ៥៣ គីឡូម៉ែត្រ ត្រូវបានបើកការដ្ឋានសាងសង់ កាលពីថ្ងៃទី១៤ ខែមករា ឆ្នាំ២០១៩ អនុវត្តការងារសាងសង់ដោយក្រុមហ៊ុន Shanghai Construction Group Co., Ltd. ក្នុងតម្លៃ ២៦៧,៦៧ លានដុល្លារអាមេរិក និងអនុវត្តការងារត្រួតពិនិត្យគម្រោងដោយក្រុមហ៊ុន Guangzhou Wanan Construction Supervision Co., Ltd. ក្នុងតម្លៃ ៥,៣៨ លានដុល្លារអាមេរិកក្រោមហិរញ្ញប្បទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជាសម្រាប់ការដោះស្រាយផលប៉ះពាល់ ការបោសសម្អាតមីន និងយុទ្ធភ័ណ្ឌមិនទាន់ផ្ទុះ៕
