កាសែត Bangkok Post បានចុះផ្សាយថា គណៈរដ្ឋមន្ត្រីថៃបានអនុម័តបង្កើនថ្ងៃឈប់សម្រាកសាធារណៈ សម្រាប់ឆ្នាំ២០២៥ និងខែមករា ឆ្នាំ២០២៦ ឱ្យមានថ្ងៃឈប់សម្រាករយៈពេលវែងជាច្រើនថ្ងៃ ដើម្បីជំរុញវិស័យទេសចរណ៍ និងកំណើនសេដ្ឋកិច្ចជាតិ។

សម្រាប់ការឈប់សម្រាកនេះរដ្ឋាភិបាលថៃនឹងបន្ថែមនៅក្នុងខែមិថុនា និងខែសីហា ឆ្នាំ២០២៥ ដោយរៀបចំឱ្យថ្ងៃបុណ្យជាតិកន្លងមកដែលមានរយៈពេល១ថ្ងៃ​​ ជាប់ជាមួយថ្ងៃចុងសប្តាហ៍ ហើយថែមថ្ងៃសម្រាក១ថ្ងៃទៀត ដូច្នេះប្រជាជននឹងបានថ្ងៃឈប់សម្រាករយៈពេលវែងចំនួន៤ថ្ងៃ ចំនួនពីរលើកពោលគឺនៅក្នុងខែ០៦និងខែ០៨។ 

បន្ថែមពីនេះដែរសម្រាប់បំណាច់ខែធ្នូឆ្នាំ២០២៥ ចូលឆ្នាំ២០២៦ ក្នុងខែមករា រដ្ឋថៃនឹងអនុញ្ញាតឱ្យប្រជាជនឈប់សម្រាកចាប់ពីថ្ងៃទី៣១ខែធ្នូ ហូតដល់ថ្ងៃទី០២ ខែមករា  ដូច្នេះប្រជាជនថៃនឹងបានសម្រាករយៈពេល៥ថ្ងៃសម្រាប់ទិវាចូលឆ្នាំសកល។ ដូច្នេះប្រទេសថៃនឹងមានថ្ងៃឈប់សម្រាកសាធារណៈ សរុបចំនួន២១ថ្ងៃនៅក្នុងឆ្នាំ២០២៥។

គូរជម្រាបថាការ​ប្រកាសនិងសម្រេចបង្កើន​ថ្ងៃ​ឈប់​សម្រាក​បន្ថែម​នេះ​ រដ្ឋាភិបាលថៃធ្វើឡើងដើម្បី​ស្រប​ទៅនឹង​យុទ្ធសាស្រ្តរបស់​នាយក​រដ្ឋមន្ត្រីថ្មីលោកស្រី Paetongtarn Shinawatra ក្នុង​ការ​កំណត់​ឆ្នាំ​២០២៥​ជា​ឆ្នាំ ​ទេសចរណ៍និង​កីឡា​ ខណៈប្រទេសថៃកំពុងពឹងផ្អែកទៅលើឧស្សាហកម្មទេសចរណ៍ និងការដើរលេងរបស់ប្រជាជន ដើម្បីជួយឱ្យសេដ្ឋកិច្ចជាតិរីកចម្រើន ក្រោយជំងឹកូវីត៕

អត្ថបទដោយ៖ ពីង ជូអេង