គិតដល់ពេលនេះ គម្រោងសាងសង់ស្ពានអាកាស ស្ថិតនៅចំណុចប្រសព្វរវាងមហាវិថីព្រះមុនីវង្ស និងមហាវិថីសម្ដេចតេជោ ហ៊ុន សែន សម្រេចការសាងសង់បានចំនួន ២៥ ភាគរយហើយ។ នេះបើយោងតាមការបញ្ជាក់ពីមន្ទីរសាធារណការ និងដឹកជញ្ជូន នៅមុននេះបន្ដិច។
តាមការបញ្ជាក់ពីមន្ទីរសាធារណការ នៅលើផេកហ្វេសប៊ុកផ្លូវការបានសរសេរបញ្ជាក់យ៉ាងដូច្នេះថា “គិតត្រឹមថ្ងៃទី១២ខែកក្កដាឆ្នាំ២០២៣ ការដ្ឋានសាងសង់ស្ពានអាកាសព្រះមុនីវង្ស សម្រេចបាន ២៥%” ។
មន្ទីរបន្ដថា “គម្រោងនេះ ជាស្ពានអាកាសកំពស់ ២ជាន់ ដែលនឹងសម្រួលលំហូរចរាចរលើដងមហាវិថី ព្រះមុនីវង្ស មហាវិថី សម្តេចអគ្គមហាសេនាបតីតេជោ ហ៊ុន សែន វិថី កងយោធពលខេមរភូមិន្ទ និងតភ្ជាប់ចរាចរពីតំបន់ក្នុងទីក្រុងទៅមកអាកាសយានដ្ឋានអន្តរជាតិ តេជោ។ តាមផែនការគម្រោងនេះ នឹងបញ្ចប់ការសាងសង់នៅខែសីហាឆ្នាំ២០២៥”។
គួររំលឹកផងដែរថា ស្ពានអាកាសកម្ពស់ ២ ជាន់នេះ ត្រូវបានបើកការដ្ឋានសាងសង់កាលពីថ្ងៃទី៣១ ខែសីហា ឆ្នាំ២០២២។ តាមការបញ្ជាក់គម្រោងនេះនឹងត្រូវចំណាយថវិកាក្នុងការសាងសង់ចំនួន ៣៦,៧៧លានដុល្លា៕
