ជាឱកាសល្អមួយសម្រាប់អ្នកដែលចូលចិត្តញ៉ាំផ្លែឈើស្រស់ដែលបេះពីដើមផ្ទាល់ៗ ខណៈពេលនេះចំការផ្លែឈើមួយកន្លែងដែលស្ថិតនៅខេត្តកំពុងចាម ប្រកាសបើកជាលក្ខណៈប៊ូសហ្វេ ចាយត្រឹមតែ១ម៉ឺនរៀលម្នាក់អាចញ៉ាំដោយសេរី។

ថ្លែងប្រាប់ក្រុមការងារ Business Cambodia លោក ថន ចាន់ធឿន ដែលត្រូវបានគេស្គាល់ថាជាម្ចាស់ចំការ ចំការតាថន បានឱ្យដឹងថា បច្ចុប្បន្ននេះគាត់បានរៀបចំនៅកម្មវិធីមួយ សម្រាប់បងប្អូនដែលនិយមនិងចូលចិត្តទទួលទានផ្លែឈើធម្មជាតិនៅក្នុងចម្ការផ្ទាល់ ដោយពេលនេះលោកបានបើកឱ្យទទួលទានសាវម៉ៅតាមចិត្ត ដោយចំណាយអស់ត្រឹម១០០០០រៀលតែប៉ុណ្ណោះ ខណៈក្មេងៗតូចៗពុំមានការគិតថវិការឡើយ។​ ​ចំពោះលក្ខខណ្ឌក្នុងការហូបប៊ូសហ្វេសាវម៉ៅនេះវិញ លោកបានលើកទ្បើងថា ក្នុងករណីភ្ញៀវបេះហើយញ៉ាំមិនអស់ នោះលោកនឹងធ្វើការផាកដោយថ្លឹងគីឡូគិតលុយ ពោលមួយគីឡូ១០០០០រៀល។

គួរជម្រាបផងដែរថា ចំការរបស់លោកមានផ្ទៃដីសរុបប្រមាណជា ១៨ ហិតា ហើយសម្រាប់បងប្អូនដែលចង់ទៅភ្លក្សនៅប៊ូហ្វេផ្លែឈើខាងលើ គឺមានទីតាំងស្ថិតនៅ ភូមិតាប៉ុម ឃុំល្វា ស្រុកចំការលើ ខេត្តកំពង់ចាមហើយបងប្អូនក៏អាចទំនាក់ទំនងតាមរយៈលេខទូរស័ព្ទ ០១១ ៦៦៦ ០៩៤011 ឬហ្វេសប៊ុកផ្លូវការផ្ទាល់មានឈ្មោះថា ៖ ចំការតាថន៕​

គួរបញ្ជាក់ថានេះជាគំនិតថ្មីមួយនៃការធ្វើអាជីវកម្ម ដែលម្ចាស់អាជីវកម្មនៅស្រុកខ្មែរទាំងអស់គួរតែរិះរកគំនិតថ្មីៗ ដើម្បីឆ្លើយតបនៅក្នុងការរកស៊ីរបស់ខ្លួន ដែលធ្វើឱ្យផលិតផលឬសេវាកម្មជាតម្រូវការសម្រាប់មនុស្សភាគច្រើននៅក្នុងស្រុក ។