ឯកឧត្តម វ៉ី សំណាង បានចូលកាន់តំណែង អភិបាលខេត្តតាកែវ ជាផ្លូវការ នារសៀលថ្ងៃទី១ ខែកក្កដា ឆ្នាំ២០២៤នេះ ក្រោយបានកាន់តួនាទីជាអភិបាលខេត្តកំពង់ស្ពឺ អស់រយៈពេល៨ឆ្នាំ។ ខាងក្រោម គឺជាប្រវត្តិ និងស្នាដៃធំៗ ដែលលោកធ្លាប់បានកសាង៖
ឯកឧត្តម វ៉ី សំណាង បានចាប់កំណើតក្នុងឆ្នាំ១៩៧៤ នៃត្រកូលមន្ត្រីរាជការមួយក្នុងភូមិព្រៃផ្តៅ ឃុំកញ្ជ្រៀច ស្រុកកញ្ជ្រៀច ខេត្តព្រៃវែង។ លោកបានបញ្ចប់ថ្នាក់បាក់ឌុបក្នុងឆ្នាំ១៩៩១ និងបន្តសិក្សានៅសាលាជាតិកសិកម្មព្រែកលាប នៅឆ្នាំ១៩៩៣-ឆ្នាំ១៩៩៤។ ក្រោយមកទៀត លោកបានសិក្សាយកបរិញ្ញាបត្រផ្នែកច្បាប់ នៅសាកលវិទ្យាល័យបៀលប្រាយ និងថ្នាក់អនុបណ្ឌិត នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។ មិនតែប៉ុណ្ណោះ លោកក៏ជាថ្នាក់ដឹកនាំខេត្តមួយរូប ដែលបានបន្តការសិក្សាថ្នាក់បណ្ឌិត នៅរាជបណ្ឌិត្យសភាកម្ពុជាផងដែរ។
យ៉ាងណាមិញ ចំពោះអាជីពការងារ ឯកឧត្តម វ៉ី សំណាង បានចាប់ផ្ដើមចូលបម្រើការដំបូង នៅថ្ងៃទី៣ ខែកក្កដា ឆ្នាំ១៩៩៥ រហូតដល់ថ្ងៃទី៦ ខែឧសភា ឆ្នាំ២០១៥ ជានាយផ្នែករដ្ឋបាលព្រៃឈើ នៅក្រសួងកសិកម្ម រុក្ខាប្រម៉ាញ់ និងនេសាទ។ បន្ទាប់មកនៅថ្ងៃទី៦ ខែឧសភា ឆ្នាំ២០១៥ រហូតដល់ថ្ងៃទី១៧ ខែមីនា ឆ្នាំ២០១៦ លោកក៏បានឡើងតំណែងទៅជាអភិបាលខេត្តកំពង់ស្ពឺ និងទើបតែប្តូរមកកាន់តួនាទីជាអភិបាលខេត្តតាកែវ ជាផ្លូវការ កាលពីរសៀលម្សិលមិញនេះ។
ក្នុងនោះ កាលគ្រាលោកនៅជាចៅហ្វាយខេត្តកំពង់ស្ពឺ ក្រៅពីការខិតខំប្រឹងប្រែង អភិវឌ្ឍ ផ្លាស់ប្តូរមុខមាត់ខេត្តមួយនេះ លើការស្តារហេដ្ឋារចនាសម្ព័ន្ធ និងការសាងសមិទ្ធផលជាច្រើនទៀត អ្វីដែលជាការកត់សម្គាល់ ឯកឧត្តម វ៉ី សំណាង គឺជា អភិបាលខេត្តដំបូងគេ ដែលបានបញ្ជាឱ្យទម្លាក់ស្លាកផ្សាយពាណិជ្ជកម្មស្រាបៀរ ទាំងអស់ចេញពីក្នុងខេត្តកំពង់ស្ពឺ។ លើសពីនេះ ក្នុងពិធីប្រកាសចូលកាន់ណែង លោកអភិបាលខេត្តតាកែវថ្មីរូបនេះ បានប្ដេជ្ញាចិត្ត បន្តកៀរគរអ្នកវិនិយោគមកអភិវឌ្ឍន៍ខេត្តតាកែវឱ្យកាន់តែរីកចម្រើន ដែលជាផ្នែកមួយនៃការចូលរួមរុញកំណើនសេដ្ឋកិច្ចជាតិ និងនិយាយដោយឡែក គឺជីវភាពប្រជាពលរដ្ឋនៅក្នុងខេត្តឱ្យមានភាពល្អប្រសើរ៕
អត្ថបទដោយ៖ កាន់ ដារ៉ា (ស្មេរពនេចរ) សៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ បញ្ជាទិញតាម
