កម្មវិធី Pinterest ជាកម្មវិធីមួយដែលបានបង្កើតឡើងដោយស្ថាបនិកវ័យក្មេង Ben Silberman ។លោកបានបង្កើតកម្មវិធីមួយនេះ ខណៈពេលដែលលោកបម្រើការក្នុងក្រុមហ៊ុនGoogle ម្លេះ ហើយមូលហេតុចម្បងដែលធ្វើឲ្យលោកសម្រេចចិត្តបង្កើតកម្មវិធីល្បីមួយនេះឡើងមកគឺដោយសារ មានការណែលនាំពីមិត្តរួមការងារម្នាក់បានសួរលលោកថា “អ្នកមានសមត្ថភាពយ៉ាងនេះ តើអ្នកមិនគិតចង់បង្កើតកម្មវិធីអ្វីមួយសម្រាប់ជាអាជីវកម្មផ្ទាល់ខ្លួនទេអី” ។
រហូតដល់ឆ្នាំ២០០៧ លោកបានចាប់អារម្មណ៍ទៅការបង្កើតគំនិតច្នៃប្រឌិតមួយដែលអាចប្រើនៅលើទូរស័ព្ទហើយវាអាចផ្តល់ប្រយោជន៍បានច្រើនពីវា ទើបលោកសម្រេចបង្កើតកម្មវិធី Pinterest នេះឡើងជាមួយក្រុមការងារ៤នាក់ផ្សេងទៀត។លោកបានបន្តថា នៅពេលដែលលោកបង្កើតកម្មវីធីនេះដំបូង គ្រាន់តែចង់ផ្តោតទៅលើការចែករំលែកជារូបភាពប៉ុណ្ណោះ តែក្រោយមកក៏ឃើញថាមានសន្ទុះនៃចំនួនអ្នកប្រើប្រាស់មានការកើនឡើង ហេតុនេះទើបលោកព្យាយាមបង្កើតអ្វីថ្មីៗប្លែកជាច្រើនបន្ថែមទៀតជារៀងរាល់ថ្ងៃ។
គួររំលឹកផងដែរថា Pinterest ជាកម្មវិធចែករំលែករូបភាពច្រើនប្រភេទមានទាំង ធម្មជាតិ មនុស្ស សត្វនិងរូបភាពផ្សេងៗទៀតជាច្រើន អាចនិយាយបានថា អ្នកប្រើប្រាស់អាចរកអ្វីៗបានគ្រប់យ៉ាងនៅក្នុងកម្មវិធីមួយនេះដោយមិនបាច់ចំណាយពេលទៅស្រាវជ្រាវនៅក្នុង Google ឬកម្មវិធីផ្សេងឡើយ។ហើយអ្នកប្រើប្រាស់កម្មវិធីនេះភាគច្រើនគឺជាយុវវ័យដែលចូលចិត្តអ្វីៗដែលថ្មីៗ។
បច្ចុប្បន្នកម្មវិធីបំផុសគំនិតដ៏ល្បីល្បាញមួយនេះអាចរកចំណូលបានលើសពី ៧០០លានដុល្លារអាមេរិចក្នុងការផ្សាយពាណិជ្ជកម្មប្រចាំឆ្នាំហើយ Pinterest បានក្លាយជាក្រុមហ៊ុនធំមួយនិងមានតម្លៃដល់ទៅ១២ពាន់លានដុល្លារ។ហើយក្នុងរយៈពេលដប់ឆ្នាំចុងក្រោយនេះកម្មវិធី Pinterest របស់ស្ថាបនិកជនជាតិអាមេរិចរូបនេះបានទាញអ្នកប្រើប្រាស់បានប្រមាណជា ៤៥០ លាននាក់ ។ហើយបើតាមការចុះផ្សាយរបស់ការសែត New York Time បានរាយការណ៍ថាក្រុមហ៊ុន Pinterest អាចរកចំណូលពីការផ្សាយពាណិជ្ជកម្មចំនួន១ពាន់លានដុល្លារកាលពីឆ្នាំ ២០១៩។
ក្នុងនោះដែរ Ben Silberman បានទទួលឋានៈជាមហាសេដ្ឋីនៅកំឡុងឆ្នាំ២០១០ ដែលមានទ្រព្យសម្បត្តិប្រមាណជា ១.៥ពាន់លានដុល្លារ និងត្រូវបានគេស្គាល់ថាជាមនុស្សដែលមានទេព្យកោសល្យមួយរូបប្រចាំ San Francisco ថែមទៀតផង៕
អត្ថបទដោយ៖សម្បតិ្ត សុខឡាង
