ថ្មីៗនេះការប្រឡងសិស្សពូកែទូទាំងប្រទេសប្រចាំឆ្នាំ២០២៥ សម្រាប់ថ្នាក់ទី០៩ និងថ្នាក់ទី១២ បានប្រកបទៅដោយរលូន លើមុខវិជ្ជាអក្សរសិល្ប៍ខ្មែរ គណិតវិទ្យា និងរូបវិទ្យា។ ក្នុងនោះគេបានរកឃើញសិស្សខ្លាំងៗជាច្រើនរូប ដោយក្នុងមួយមុខវិជ្ជាមានសិស្សពូកែនិងមានលំដាប់ពិន្ទុខ្ពស់បំផុតចំនួន៥រូប។
ចំពោះការប្រឡងសិស្សនេះ បេក្ខជននឹងទទួលបាន រង្វាន់ជ័យលាភីលើកទឹកចិត្តចំនួន៥ចំណុចរួមមាន៖
១. ប្រកាសស្តីពីការទទួលស្គាល់សិស្សពូកែទូទាំងប្រទេស ដោយឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មួយច្បាប់។
២. មេដាយមួយគ្រឿងសម្រាប់បេក្ខជនជ័យលាភី ចំណាត់ថ្នាក់ពីលេខ១ ដល់លេខ៣
៣. វិញ្ញាបនបត្របញ្ជាក់សិស្សពូកែទូទាំងប្រទេសមួយច្បាប់
៤. ប្រាក់រង្វាន់តាមចំណាត់ថ្នាក់
- ជ័យលាភីលេខ ១ ទទួលបានថិកា ៣លាន ៥សែនរៀល
- ជ័យលាភីលេខ ២ ទទួលបានថិកា ៣លាន ២សែនរៀល
- ជ័យលាភីលេខ ៣ ទទួលបានថិកា ២លាន ៩សែនរៀល
- ជ័យលាភីលេខ ៤ ទទួលបានថិកា ២លាន ៦សែនរៀល
- ជ័យលាភីលេខ ៦ ទទួលបានថិកា ២លាន ៣សែនរៀល
៥. ប្រាក់រង្វាន់ឬវត្ថុផ្សេងៗពីសប្បុរសជន។
សូមជម្រាបផងដែរថា បេក្ខជនសិស្សពូកែដែលលេចធ្លោ៣រូបសម្រាប់ថ្នាក់ទី១២ ប្រចាំឆ្នាំ២០២៥នេះរួមមាន៖ ជ័យលាភីលេខ១ ផ្នែកអក្សរសិល្ប៍ខ្មែរ បានទៅលើ យុវតី ណា មុន្នីចន្ទកន្និកា មកពីវិទ្យាល័យអន្លង់វែង ខេត្តបន្ទាយមានជ័យ, ជ័យលាភីលេខ១ ផ្នែកគណិតវិទ្យា បានទៅលើ យុវសិស្ស ចាន់ សុវណ្ណារាជ មកពីវិទ្យាល័យប៊ុនរានី ហ៊ុនសែន ព្រៃពោន ខេត្តព្រៃវែង និង ជ័យលាភីលេខ១ ផ្នែករូបវិទ្យា បានទៅលើ យុវសិស្ស ពៅ ជុំរតនៈ មកពីសាលារៀនអន្តរជាតិស្មាធឃីដ ខេត្តសៀមរាប៕
អត្ថបទដោយ៖ ពីង ជូអេង
