ក្រុមហ៊ុនផលិតបន្ទះឈីប Nvidia បានគ្រងដំណែងជាក្រុមហ៊ុនដែលមានតម្លៃខ្ពស់បំផុតលើពិភពលោក ក្រោយវ៉ាដាច់ក្រុមហ៊ុនសម្រុកបច្ចេកវិទ្យា Microsoft។ នេះបើយោងតាមការឲ្យដឹងពីទីភ្នាក់ងារសារព័ត៌មាន CNBC ចុះនាថ្ងៃទី០៣ ខែមិថុនា ឆ្នាំ២០២៥។

ភាគហ៊ុនរបស់ Nvidia បានកើនឡើងប្រហែល ៣% កាលពីថ្ងៃអង្គារ៍ ដោយឡើងដល់ ១៤១.៤០ដុល្លារ ក្នុងមួយហ៊ុន ខណៈកើនឡើងជិត ២៤% ក្នុងរយៈពេលមួយខែកន្លងមកនេះ។ បច្ចុប្បន្នក្រុមហ៊ុន Nvidia មានទីផ្សារមូលធនចំនួន ៣.៤៥ ពាន់ពាន់លានដុល្លារ ស្របពេលដែលក្រុមហ៊ុន Microsoft មានតម្លៃលើទីផ្សារប្រហែល ៣.៤៤ ពាន់ពាន់លានដុល្លារ។

គួរជម្រាបផងដែរថា ការកើនឡើងនេះបណ្តាលមកពីភាពរីកចម្រើននៃបញ្ញាសិប្បនិម្មិត (AI) ដែលជំរុញឲ្យមានតម្រូវការខ្ពស់លើការប្រើប្រាស់បន្ទះឈីប AI ដែលផលិតចេញពីក្រុមហ៊ុន Nvidia ខណៈគ្រប់ក្រុមហ៊ុនធំៗដូចជា OpenAI, Anthropic, និង xAI ត្រូវការការគណនាដែលមានសមត្ថភាពខ្ពស់សម្រាប់ម៉ូដែល AI ជំនាន់ថ្មី។ ក្នុងនោះលោក Ian Buck ប្រធានផ្នែក Accelerated Computing របស់ Nvidia បានបញ្ជាក់ថា ម៉ូដែល AI ទំនើបៗទាមទារការគណនាខ្ពស់ជាងម៉ូដែលមុនៗរហូតដល់ទៅ ១០០ ដងឯណោះ៕