ព្រោះតែមនោសញ្ចេតនារាប់អានទើបអ្នកព្រមឱ្យមិត្តភក្តិឬបងប្អូនខ្ចីលុយយកទៅប្រើប្រាស់ ដោយសង្ឃឹមថាគេនឹងប្រញាប់សងមកវិញក្រោយពេលដែលដោះស្រាយបញ្ហារួចរាល់។ ក៏ប៉ុន្តែមិនមែនគ្រប់ករណីសុទ្ធតែរលូនបែបនេះឡើយ ជួនកាលគេអាចនឹងយូរសងលើសពីការរំពឹងទុករបស់អ្នកក៏ថាបាន។

វាជារឿងឆ្គងណាស់នៅក្នុងការនិយាយទៅកាន់មិត្តភក្តិដែលជំពាក់លុយអ្នកថា “ខ្ញុំត្រូវការលុយខ្ញុំវិញ ឆាប់សងខ្ញុំមក”។​ ដោយសារតែយល់ដល់ទំនាក់ទំនង អ្នកក៏មិនហ៊ាននិយាយពាក្យបែបនេះចំៗ ដោយសុខចិត្តជ្រើសរើសការបង្ហាញកាយវិកា ឬពាក្យសម្ដីទាក់ទងមួយចំនួនដើម្បីឱ្យគេទទួលអារម្មណ៍ដឹងថាអ្នកកំពុងរង់ចាំគេសងលុយ ប៉ុន្តែលទ្ធផលគេនៅតែមិនដឹងដដែលមែនទេ?

ស្របនឹងបញ្ហាខាងលើនេះអ្នកជំនាញហិរញ្ញវត្ថុ របស់គេហទំព័រ Comparehero បានចែករំលែកនូវវិធីសាស្រ្តមួយចំនួន ដែលអាចស្នើសុំលុយរបស់អ្នកមកវិញបាន ថែមទាំងមិនធ្វើឱ្យខូចមិត្តភាពទៀតផង។ វិធីសាស្រ្តទាំងនោះរួមមាន៖

១. ការរំលឹកគួរសម

ជួនកាលមិត្តរបស់អ្នកគេគ្រាន់តែភ្លេចខ្លួនថាបានជំពាក់អ្នក​ មិនមែនគេចង់ស៊ីដាច់លុយនោះទេ ដូច្នេះអ្នកគួរតែសាកល្បងរំលឹកគេសិនទៅ។ អ្នកអាចលើកជាសំណួរសួរពួកគេថា “តើអ្នកចាំបានទេថាបានខ្ចីលុយខ្ញុំប៉ុន្មានកាលពីខែមុន? តើពេលណាទើបអាចសងខ្ញុំវិញបាន?”

២. សួរអំពីស្ថានភាពបញ្ហារបស់គេ

ធម្មតានៅពេលខ្ចីលុយពួកគេតែងតែបញ្ជាក់ពីមូលហេតុសំខាន់ ដែលអាចជាបញ្ហាធំដែលគេកំពុងជួបប្រទះជាដើម។​ហេតុនេះហើយអ្នកអាចឆ្លៀតសួរពីស្ថានភាពរបស់គេ ថាតើពេលនេះយ៉ាងម៉េចហើយ? ដោះស្រាយដល់ណាហើយ? ការសួរនាំបែបនេះអាចជាការបើកឱកាសឱ្យគេនឹកឃើញថាបានជំពាក់អ្នក និងបកស្រាយពីមូលហេតុដែលមិនទាន់បានសង រួចបង្ហើបថាអាចនឹងសងវិញពេលណា។ វាក៏ប្រសើរជាងអ្នកនៅស្ងៀម ហើយមិនដឹងសូម្បីតែបន្តិចថាគេនៅចាំឬអត់ គឹអាចសងពេលណា ហេតុអ្វីគេមិនសងអ្នកឱ្យលឿន។

៣. ឱ្យគេចេញលុយពេលទៅញ៉ាំអីជាមួយគ្នា

ប្រសិនបើចំនួនលុយដែលគេជំពាក់តិចតួចល្មមទេ អ្នកអាចមិនបាច់ទារ ឬរំលឹកអ្វីក៏បាន គ្រាន់តែអនុញ្ញាតឱ្យគេចេញលុយ នៅពេលដែលបានញ៉ាំអីជុំគ្នាលើកក្រោយទៅ។ ហោចណាស់ក៏អ្នកបានចំនួនទឹកប្រាក់មួយចំនួនមកវិញ ហើយវាក៏ជាឱកាសធ្វើឱ្យគេចាំបានថាជំពាក់អ្នកប៉ុន្មានដូចគ្នា។

៤. សុំឱ្យគេជួយអ្នក

កាលពីគេខ្ចីអ្នកគេសុំឱ្យអ្នកជួយ ហេតុនេះអ្នកក៏អាចសុំឱ្យគេជួយវិញបានដែរ ហើយប្រសិនបើអ្នកពិតជាត្រូវការលុយមកវិញដើម្បីបំពេញតម្រូវការអ្វីមួយ សូមយកវាធ្វើជាហេតុផលដើម្បីសុំឱ្យគេជួយសងលុយមកវិញ។ ប្រសិនបើអ្នកត្រូវការខ្លាំងពិតមែនហើយគេឆ្លើយថាគ្មានលុយគ្រប់គ្រាន់ អ្នកអាចសុំឱ្យគេរកអ្វីមកជំនួសក៏បាន ព្យាយាមនិយាយឱ្យគេយល់ចិត្តថាអ្នកពិតជាត្រូវការចាំបាច់ណាស់។

៥. ផ្ដល់លក្ខខណ្ឌសងដែលបត់បែន

ប្រសិនបើគេថាគ្មានលុយសងសរុប អ្នកអាចលើកជាលក្ខខណ្ឌសងរំដោះក៏បាន ដោយកំណត់ចំនួនបង់ជាដំណាក់កាល។ ការលើកជាដំណោះស្រាយបែបនេះបានបង្ហាញថាអ្នក កំពុងរកវិធីជួយដល់អ្នកដែលជំពាក់ ហើយមួយវិញទៀតវាក៏អាចបង្កើតក្ដីសង្ឃឹមថ្មីថាអ្នកនឹងអាចទទួលបានលុយមកវិញផងដែរ។

សូមចាំថាលុយជាបញ្ហារសើបមួយ ដែលអាចបំផ្លាញមិត្តភាព ឬនាំឱ្យទំនាក់ទំនងរាប់អានគ្នារងនូវភាពតានតឹងបាន។ ហេតុនេះហើយសូមប្រាកដចិត្តថាចំនួនលុយដែលអ្នកសម្រេចចិត្តឱ្យពួកគេខ្ចី មិនស្ថិតនៅក្នុងតម្រូវការចាំបាច់របស់អ្នក។ មានន័យថាលុយនោះទោះបីបាត់បង់ក៏អ្នកមិនមានបញ្ហា ដូច្នេះអ្នកនឹងមិនមានកំហឹងពេលដែលគេមិនសងវិញ។

បើទើបីជាអ្នកមិនស្ដាយលុយនោះក៏ដោយក៏អ្នកត្រូវតែរកវិធីឱ្យគេសងវាមកវិញមិនថាយូរឬឆាប់ទេ ព្រោះថាបើគេមិនបានសងមិត្តភាពរបស់អ្នកក៏ខូចខាតដូចគ្នា គេច្បាស់ជាលែងហ៊ាននិយាយរកអ្នក។ ដើម្បីបញ្ជៀសបញ្ហានេះអ្នកអាចប្រើវិធីសាស្រ្តទី២ ខាងលើដើម្បីឱ្យគេបើកចិត្តនិយាយហេតុផលជាមួយអ្នកនិងរកវិធីសម្រួលដល់គេ ឬបើអ្នកមិនចង់វែងឆ្ងាយអាចឱ្យទៅគេដាច់តែម្ដងក៏បាន៕