សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា បានប្រគល់ភារកិច្ចឲ្យអ្នកជំនាញខាងផ្នែកកសិកម្ម ពិសេសអ្នកឧកញ៉ា ៤ រូបគឺ អ្នកឧកញ៉ា ម៉ុង ឫទ្ធី, អ្នកឧកញ៉ា ផែ ហុក ឈួន, អ្នកឧកញ៉ា ហ៊ុន ឡាក់ និងអ្នកឧកញ៉ា ហេង ឡុង ធ្វើការសិក្សាលទ្ធភាពធ្វើយ៉ាងណា ផលិតជីកសិកម្មឲ្យបានសម្រាប់ប្រើប្រាស់ក្នុងស្រុក។ ខណៈជីគឺជាវត្ថុធាតុដើមដ៏សំខាន់សម្រាប់ប្រើប្រាស់ក្នុងវិស័យកសិកម្ម។
ថ្លែងក្នុងអង្គប្រជុំសមាជ រដ្ឋសភា និងព្រឹទ្ធសភា កាលពីថ្ងៃទី៣ មិថុនា ២០២៥ សម្ដេចធិបតីបានមានប្រសាសន៍ដូច្នេះថា «ខ្ញុំបានជួបថ្នាក់ដឹកនាំក្រសួងកសិកម្ម ជាពិសេសឥឡូវខ្ញុំបានប្រគល់ភារកិច្ចឲ្យវិស័យឯកជន និងបានសុំឲ្យឧកញ៉ា ម៉ុង ឫទ្ធី, ឧកញ៉ា ផែ ហុក ឈួន, ឧកញ៉ា ហ៊ុន ឡាក់, ហេង ឡុង និងអ្នកជំនាញក្នុងវិស័យកសិកម្មមួយចំនួន ជួយសិក្សាអំពីលទ្ធភាពក្នុងការផលិតជីក្នុងស្រុក ក្នុងកម្រិតណាមួយ មិនថាតែជីធម្មជាតិ ឬមួយក៏ជីគីមី»។
សម្ដេចបន្ដថា បើមិនបាន ១០០ ភាគរយ យ៉ាងហោចណាស់បាន ៣០ ភាគរយនៃសមត្ថភាពរបស់យើង ព្រោះនេះជាកិច្ចការសំខាន់របស់យើង គុណភាព បរិមាណ និងតម្លៃ។ ហើយយើងអាចមានលទ្ធភាពធ្វើ នៅក្នុងកិច្ចការងារនេះ។ ហើយកិច្ចការងារនេះក្រុមការងារកំពុងតែសិក្សាធ្វើយ៉ាងណា រូបមន្ដយ៉ាងណា ដើម្បីយើងធានា។
សម្ដេចធិបតីនាយករដ្ឋមន្ដ្រីក៏បានលើកឡើងថា ជីមិនមែនត្រឹមជាវត្ថុធាតុដើមក្នុងការផលិតផលិតផលកសិកម្មទេ ប៉ុន្ដែជីគឺជាយុទ្ធសាស្ដ្រ។ ពឹងដង្ហើមគេដកពេលថ្ងៃណាមួយគេក្រឡុកតែថ្លៃជីយើងស្លាប់ បិទតែជីយើងនឹងធ្វើអ្វីមិនបានឡើយ។ ដូច្នេះការផលិតជីដោយខ្លួនឯងនេះ ត្រូវតែខិតខំធ្វើ៕
