ថៃគឺជាប្រទេសដែលមានប្រជាជនជំពាក់បំណុលច្រើនជាងគេបំផុតនៅអាស៊ាន ដោយបំណុលប្រជាជនថៃសរុបបូកបញ្ចូលគ្នាឡើងដល់៤៧០ពាន់លានដុល្លារ។ ជុំវិញប្រជាជនថៃជំពាក់បំណុលច្រើនក៏ជាផ្នែកមួយធ្វើឲ្យកម្ចីខូចក្នុងប្រព័ន្ធធនាគារថៃឡើងដល់ជាង១៤ពាន់លានដុល្លារ។
បើយោងតាមរបាយការណ៍ធនាគារកណ្ដាលថៃដែលចុះផ្សាយដោយ Bangkok Post បានឲ្យដឹងថាកម្ចីខូចក្នុងវិស័យធនាគារមានជាង១៤ពាន់លានដុល្លារគិតត្រឹមត្រីមាសទី១ឆ្នាំ២០២៣នេះ។ ប៉ុន្ដែកម្ចីខូចនេះបានថយចុះបន្តិចពី២.៧៧% មកពី២.៦៨%ធៀបនឹងរយៈពេលដូចគ្នានៃឆ្នាំ២០២២កន្លងទៅ។
យ៉ាងណាមិញគេសង្កេតឃើញថាកម្ចីខូចក្នុងវិស័យអចលនទ្រព្យជាពិសេសកម្ចីទិញផ្ទះដែលខូចបានកើនឡើងគំហុកដល់៣.១៦% ក្រោយពីធនាគារកណ្ដាលថៃអនុវត្តដំឡើងការប្រាក់។ នេះបើយោងតាមសម្ដីរបស់លោកស្រី Suwanee Jatsadasak ជំនួយការទេសាភិបាលធនាគារកណ្ដាលរបស់ថៃ។
បើតាប្រសាសន៍របស់លោកស្រី Suwanee Jatsadasak បានឲ្យដឹងថាធនាគារកណ្ដាលរបស់ថៃបានពង្រីកការរៀបចំឥណទានឡើងវិញរហូតដល់ចុងឆ្នាំ២០២៣នេះដើម្បីឲ្យធនាគារក្នុងស្រុកទាំងអស់ជួយសម្រាលបន្ទុកផ្នែកហិរញ្ញវត្ថុរបស់អតិថិជននិងកម្ចីខូចដែលកំពុងកើនឡើងក្នុងវិស័យអចលនទ្រព្យ។
តាមពិតទៅកម្ចីខូចក្នុងប្រព័ន្ធធនាគាររបស់ថៃបានកើនឡើងក្រោយពីមានបញ្ហាកូវីដនិងវិបត្តិសង្រ្គាមរវាងរុស្ស៊ីនិងអ៊ុយក្រែនបង្កើតបានជាវិបត្តិអតិផរណា ធ្វើឲ្យពលរដ្ឋថៃដែលកំពុងជាប់បំណុលស្រាប់បាត់បង់ការងារ ចំណូលធ្លាក់ចុះដែលធ្វើឲ្យពួកគាត់គ្មានលទ្ធភាពសងត្រលប់ទៅធនាគារ។ ជាក់ស្ដែងបំណុលប្រជាជនថៃសរុបឡើងដល់៤៧០ពាន់លានដុល្លារហើយបំណុលភាគច្រើនគឺកើតចេញពីវិស័យអចលនទ្រព្យ៕