បាត់មុខជាង២០ឆ្នាំ! ពេលនេះទូរស័ព្ទដៃ Nokia បានត្រឡប់មកវិញហើយ ស៊េរី២០២៤ ស្តើងជាងមុន
Ping Chou EngMAY 15 202421.9 K views

ក្រោយបាត់មុខអស់ជាង២០ឆ្នាំ ទូរស័ព្ទដៃម៉ូឌែល Nokia 3210 ដែលល្បីឈ្មោះនិងមានភាពពេញនិយមបំផុតកំឡុងឆ្នាំ១៩៩៩ ពេលនេះបានត្រឡប់មកវិញហើយ  ស៊េរីឆ្នាំ២០២៤ ដោយរំលេចនូវរូបរាងដើម និងមានមុខងារអាប់ដេតបច្ចេកវិទ្យាសំខាន់ៗ​ដើម្បីបំពេញតាមតម្រូវការរបស់អ្នកប្រើប្រាស់ នាពេលបច្ចុប្បន្ន។

Sddefault

តាមប្រភពចុះផ្សាយពី​ Gizchina នៅខែឧសភា ឆ្នាំ២០២៤នេះបានឱ្យដឹងថា HMD Global ដែលជាក្រុមហ៊ុនហ្វាំងឡង់កាន់កាប់ទូរស័ព្ទម៉ាក Nokia នេះបានប្រកាសពីការវិលត្រឡប់ចូលទីផ្សារវិញរបស់ទូរស័ព្ទដៃ​ Nokia 3210 ដែលរក្សារូបរាងជំនាន់ម៉ូឌែលដើមលាយបញ្ចូលគ្នានិងបច្ចេកវិទ្យាច្នៃប្រឌិត ដោយមាន៣ពណ៌ ខ្មៅ ខៀវ និងមាស។

Csm Nokia 3210 2024 1 Bc72a92d81

ចំពោះមុខងារពិសេសៗរួមមានដូចជា មានអេក្រង់ធំជាងមុន រាងស្តើងជាងមុន ថាមពលថ្ម 1450mAh ដែលធានាការប្រើប្រាស់បានយូរ ដោយមិនចាំបាច់បញ្ចូលថ្មញឹកញាប់  ជាមួយនឹងកម្រិតភាពច្បាស់ QVGA នៃ 320 x 240 ភីកសែល កាមេរ៉ាខាងក្រោយទំហំ 2 MP ជាមួយអំពូល LED ភ្ជាប់ Bluetooth 5.0 និង USB-C សម្រាប់សាកថ្មបាន មានរន្ធដោតកាស 3.5 mm និងគាំទ្របណ្តាញអ៊ីនធើណែត 4G LTE ផងដែរ។

Nokia 3210 2024 Nokia 1 1715228354693

ប្រភពដដែលបានឱ្យដឹងថាស៊េរី Nokia 321០ នេះត្រូវបានចេញលក់ដំបូងដោយក្រុមហ៊ុន HMD Global នៅក្នុងទីផ្សារអឺរ៉ុបជាមួយតម្លៃ ៩០ ដុល្លារអាមេរិក ហើយកាលពីថ្ងៃទី ៨ ខែឧសភា ផលិតផលនេះក៏បាននាំចូលទីផ្សារចិន ក្នុងប្រមាណ៤៨ ដុល្លារអាមេរិក ហើយកំពុងមានការចាប់អារម្មណ៍យ៉ាងខ្លាំង និងលក់ដាច់ខ្លាំងរហូតអស់ពីស្តុកនៅតាមបណ្តាញសង្គមចិន Wiebo។

គួរជម្រាបថាការបញ្ចេញម៉ូឌែល Nokia 321០​ បែប4G នេះក្រុមហ៊ុន HMD Global បានបញ្ជាក់ថាជាការចាប់ចំណែកទីផ្សារថ្មី សម្រាប់ទាក់ទាញអ្នកពេញនិយមប្រើប្រាស់រចនាបទបែបបុរាណលាយសម័យ បំពាក់ជាមួយបច្ចេកវិទ្យាថ្មីៗ ព្រមទាំងជាការប្រមូលយកអតិថិជនស្មោះត្រង់និងស្រឡាញ់ម៉ូឌែល Nokia៕

អត្ថបទដោយ៖ ពីង ជូអេង

អត្ថបទពេញនិយមប្រចាំខែ
អត្ថបទថ្មីៗ
Footer Background
Business Cambodia
បំផុសគំនិតរកស៊ី នាំមនុស្សឱ្យហ៊ានចេញរកស៊ីតាមក្ដីស្រមៃ
© 2024 Baksey Media. All Rights Reserved.
Developed by: Technology Cambodia