LG ត្រូវបានគេស្គាល់ថាជាយីហោចាស់វស្សាផលិតស្មាតហ្វូនដ៏ល្បីល្បាញមួយរបស់កូរ៉េ ដែលបានប្រកាសបិទរោងចក្រផលិតស្មាតហ្វូនរបស់ខ្លួនកាលពីខែមេសា ឆ្នាំ២០២១ កន្លងទៅនេះ ដោយសារតែការលក់ធ្លាក់ចុះខ្លាំង និងការប្រកួតប្រជែងពីស្មាតហ្វូនរបស់ចិនកាន់តែច្រើនឡើងនៅលើទីផ្សារ ។ នេះបើយោងទៅតាមគេហទំព័រ businesstoday ។
យ៉ាងណាមិញកាលពីថ្មីៗនេះបានបែកធ្លាយវីដេអូមួយ ចេញពី YouTuber ម្នាក់មានឈ្មោះជាភាសារកូរ៉េថា 뻘짓연구소 បានធ្វើការ Review បង្ហាញពីស្មាតហ្វូនថ្មីរបស់ LG ដែលមានឈ្មោះថា LG Rollable វាមានរូបរៀងប្លែកភ្នែក អេក្រង់អាចបត់បាន(Rollable)មិនចាញ់ស្មាតហ្វូន Samsung ឬ oppo ឡើយ ។
ម៉ូឌែលមួយនេះ LG អាចនឹងធ្វើការដាក់លក់នៅក្នុងប្រទេសឥណ្ឌាមុនគេ នៅក្នុងតម្លៃប្រមាណជា១ពាន់ដុល្លារ កញ្ចប់ លុយហ្នឹង LG ព្យាយាមញ៉ាត់កម្មវិធីទំនើបៗមិនចាញ់ស្មាតហ្វូនមួយចំនួនឡើយ ពោលគឺវាមកជាមួយអេក្រង់ទំហំ 6.8 អ៊ីងដ៏អស្ចារ្យ ជាមួយនឹងកម្រិតភាពច្បាស់ 1080 x 2460 ភីកសែល ដែលនឹងនាំមកនូវភាពរស់រវើកនៅពេលដែលមើលវីដេអូ ថែមទាំងមានល្បឿនលឿនជាងមុន ។
បន្ថែមពីនេះទៅទៀតវាមកជាមួយឈីប Snapdragon 888 RAM 2GB Storage 256GB គេរំពឹងថានឹងដំណើរការ ប្រព័ន្ធប្រតិបត្តិការ Android v10 (Q) ថាមពលថ្ម 4000 mAh ដែលអាចកំដរឱ្យអ្នកប្រើប្រាស់បានយូរ បើប្រើកម្មវិធីល្មមៗឆ្លងផុតបានពីរថ្ងៃឯណ្ណោះ ចំណែកឯកាមេរ៉ាខាងក្រោយវិញចំនួនបីគ្រាប់ដែលមានទំហំ 64 MP + 13 MP + 2 MP រីឯកាម៉ារ៉ាខាងខមុខមានទំហំ 32 MP ។
គួរបញ្ជាក់ផងដែរថា ខាងលើនេះគ្រាន់តែជាការបែកធ្លាយនៅព័ត៌មានមួយចំនួនប៉ុណ្ណោះ ហើយគេមិនទាន់បានដឹងច្បាស់នៅឡើយទេថា LG Rollable នឹងចេញលក់ជាផ្លូវការនៅពេលណាឡើយ ។ សម្រាប់បងប្អូនដែលធ្លាប់ប្រើប្រាស់ស្មាតហ្វូនយីហោ LG យល់ឃើញយ៉ាងណាដែរ ប្រសិនបើក្រុមហ៊ុនមួយនេះចេញមកវាយលុកស្មាតហ្វូននៅលើទីផ្សារម្តងទៀត ?
