ក្រោយលើកពានFIFA World Cup ជាលើកដំបូងក្នុងអាជីព ប្រធានកីឡាកររបស់ប្រទេសអាហ្សង់ទីន លោក Lionel Messi បានបំបែកកំណត់ត្រាអ្នកចុចមើលច្រើនបំផុតជាមួយនឹងរូបថតលើកពានមួយសន្លឹក មានអ្នកចុចឡែក៦៧លានដងត្រឹមរយៈពេល ៧២ម៉ោង នៅលើគណនី Instagram ផ្ទាល់ខ្លួនរបស់លោក រហូតដល់មេធំ Meta លោក Mark Zuckerberg លាន់មាត់ភ្ញាក់ផ្អើល។
ក្នុងនោះដែរលោក Mark Zuckerberg បានថ្លែងទៅកាន់កីឡាករ Messi យ៉ាងដូច្នេះថា “ Leo Messi's ការបង្ហោះរបស់ World Cup ពេលនេះត្រូវបាន Like ច្រើនជាងគេក្នុងកំណត់ត្រាប្រវត្តិសាស្ត្ររបស់ Instagram ជាមួយគ្នានេះដែរសូម្បីតែ WhatsApp ក៏បានឈានដល់កំណត់ត្រាទទួលបាន ២៥លានសារក្នុងមួយវិនាទីដែរ នាអំឡុងពេលវគ្គផ្តាច់ព្រ័ត្រនោះ” ។
គួររំលឹកផងដែរថា អ្វីដែលគេភ្ញាក់ផ្អើលនោះ ពេលនេះរូបភាពរបស់លោក Messi លើកពាន World Cup ២០២២ ដែលទើបបង្ហោះរយៈពេល៣ថ្ងៃ បានហក់ឡើងវ៉ាដាច់រូបពងមាន់មួយគ្រាប់ ដែលបង្ហោះតាំងពីឆ្នាំ២០១៩មានអ្នកចុចឡែក៥៧លាននាក់មកទល់ពេលនេះស្ទើរតែពុំមាននរណាម្នាក់ អាចយកឈ្នះបាន ប៉ុន្តែរូបភាពមួយសន្លឹករបស់ Messi បានទាញទម្លាក់រូបពងមាន់នោះឱ្យធ្លាក់មកនៅលេខ២វិញ៕
អត្ថបទដោយ៖ ពីង ជូអេង
