មហាសេដ្ឋីប្រាក់លាន Mark Cuban បានរិះគន់ចំៗលើផែនការពន្ធថ្មីរបស់ប្រធានាធិបតី Donald Trump រួមទាំងបានព្រមានថា ការដំឡើងពន្ធដ៏គឃ្លើន និងការកាត់បន្ថយការងារ ដោយក្រសួងប្រសិទ្ធភាពរដ្ឋាភិបាល (DOGE) អាចបង្កផលប៉ះពាល់ដល់សេដ្ឋកិច្ចរយៈពេលវែង។ នេះបើយោងតាមការឲ្យដឹងពី Business Insider នាថ្ងៃទី០៦ ខែមេសា ឆ្នាំ២០២៥។
លោក Mark Cuban ស្ថាបនិកក្រុមហ៊ុន Cost Plus Drugs បានសរសេរបង្ហោះនៅលើបណ្តាញ Bluesky កាលពីថ្ងៃសៅវ៍ យ៉ាងដូច្នេះថា៖ «ប្រសិនបើពន្ធថ្មីមិនប្រែប្រួល ហើយត្រូវបានអនុវត្តយ៉ាងតឹងរឹង ស្របពេលដែលខ្សែកោងអតិផរណាកើនឡើង រីឯក្រសួងប្រសិទ្ធភាពរដ្ឋាភិបាល (DOGE) នៅតែបន្តកាត់បន្ថយការងារ នោះយើងនឹងស្ថិតក្នុងស្ថានភាពវិបត្តិសេដ្ឋកិច្ចធ្ងន់ធ្ងរជាងឆ្នាំ ២០០៨ ទៅទៀត»។
យ៉ាងណាមិញ ការដាក់ចេញនូវផែនការពន្ធថ្មីរបស់ប្រធានាធិបតីអាម៉េរិក កាលពីថ្ងៃពុធ សប្តាហ៍មុនបានធ្វើឲ្យទីផ្សារភាគហ៊ុនដាំក្បាលចុះ ហើយជំរុញឲ្យអ្នកប្រើប្រាស់ ស្តុកទុករបស់សំខាន់ៗ និងកាត់បន្ថយការទិញទំនិញថ្មីៗ។ ក្នុងនោះ សេដ្ឋវិទូ និងអ្នកជំនាញខ្សែសង្វាក់ផ្គត់ផ្គង់បានប្រាប់ Business Insider ថាការកើនឡើងនៃថ្លៃដើមនាំចូលដែលបណ្តាលមកពីពន្ធនេះ ត្រូវបានគេរំពឹងថា នឹងនាំឱ្យតម្លៃកាន់តែខ្ពស់សម្រាប់អ្វីៗគ្រប់យ៉ាង។
គួរជម្រាបផងដែរថា ក្នុងអំឡុងវិបត្តិហិរញ្ញវត្ថុឆ្នាំ ២០០៨ និងផលវិបាកភ្លាមៗ បានធ្វើ GDP របស់សហរដ្ឋអាម៉េរិកធ្លាក់ចុះជាង ៤%, អត្រាគ្មានការងារធ្វើបានឈានដល់ ១០% រីឯទីផ្សារលំនៅដ្ឋានបានដាំក្បាលចុះងើបលែងរួច ខណៈអ្នកសេដ្ឋកិច្ចបានទទួលស្គាល់ថា វាជាវិបត្តិសេដ្ឋកិច្ចដ៏ជ្រៅបំផុតចាប់តាំងពីសង្គ្រាមលោកលើកទីពីរ៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ បញ្ជាទិញតាម
https://t.me/BusinessCambodiaBook
