ក្រោយពីតបជាពាក្យសម្ដីតាមរយៈអ្នកនាំពាក្យក្រសួងការបរទេសរបស់ចិនថានឹងកំដរអាមេរិកដល់ទីបញ្ចប់បើអាមេរិកនៅតែបង្ហាញអាកប្បកិរិយាមិនត្រឹមត្រូវលើការធ្វើពាណិជ្ជកម្មតាមរយៈពេលដំឡើងពន្ធនាំចូលចិនដល់ទៅ១០៤% ពេលនេះចិនចាប់ផ្ដើមដំឡើងពន្ធនាំចូលអាមរិកមកចិនដូចគ្នា។

បើយោងតាមការចុះផ្សាយបស់CNBC បានឲ្យដឹងថាចិនបានសម្រេចវាយបកទៅអាមេរិកវិញដោយសម្រេចដំឡើងពន្ធនាំចូលអាមេរិកទៅកាន់ប្រទេសចិនចំនួន៨៤%ដែលនឹងអនុវត្តជាធរមានចាប់ពីថ្ងៃទី១០ខែមេសាឆ្នាំ២០២៥នេះតទៅ។

 គួរបញ្ជាក់ផងដែរ សហរដ្ឋាអាមេរិកតាមរយៈលោក Donald Trump បានប្រកាសដំឡើងពន្ធនាំចូលថ្មីទៅកាន់ប្រទេសជាច្រើនហើយថែមទាំងព្រមានមិនឲ្យប្រទេសដែលជាដៃគូរបស់ខ្លួនដាក់ពន្ធវាយបកវិញឡើយ។ ក្នុងនោះអាមេរិកដាក់ពន្ធនាំចូលចិនចំនួន៣៤%។

ក្រោយពីទទួលបានដំណឹងថាអាមេរិកដាក់ពន្ធលើខ្លួនចំនួន៣៤ ចិនក៏សម្រេចចិត្តដាក់ពន្ធវាយបកទៅអាមេរិកវិញចំនួន៣៤%ដូចគ្នា។ ដោយសារតែចិនដាក់ពន្ធវាយបកមកវិញ ទើបអាមេរិកសម្រេចដំឡើងពន្ធនាំចូលរបស់ចិនចំនួន៥០%ដែលធ្វើឲ្យពន្ធនាំចូលរបស់ចិនទៅកាន់អាមេរិកឡើងដល់ទៅ១០៤%៕