នៅថ្ងៃម្សិលមិញនេះ ហាងឆេងមាសនៅលើទីផ្សារអន្តរជាតិបានហក់ឡើងខ្ពស់បំផុតដល់ទៅ៣,១៤៩ដុល្លារ(ស្មើនឹង៣,៧៩៣ដុល្លារក្នុងមួយតម្លឹង) ដោយសារតែលោក Donald Trump ប្រកាសដាក់ពន្ធនាំចូលលើប្រទេសជាច្រើនដែលធ្វើឲ្យពិភពលោកមានការព្រួយបារម្ភ។

យ៉ាងណាមិញ បើទោះបីស្ថានភាពសេដ្ឋកិច្ចស្ថិតក្នុងភាពមិនច្បាស់ក៏ដោយ ប៉ុន្ដែថ្ងៃនេះហាងឆេងមាសបានចាប់ផ្ដើមធ្លាក់ចុះគំហុកវិញ។ គិតត្រឹមម៉ោង១០យប់ថ្ងៃសុក្រនេះហាងឆេងមាសបានធ្លាក់ចុះចំនួន៨២ដុល្លារដោយធ្លាក់ចុះមកត្រឹម៣០២០ដុល្លារក្នុងមួយអោន(ស្មើនឹង៣៦៣៨ដុល្លារក្នុងមួយតម្លឹង។

ចំពោះមូលហេតុចម្បងដែលធ្វើឲ្យហាងឆេងមាសធ្លាក់ចុះដោយសារតែក្រុមអ្នកវិនិយោគបានចាប់ផ្ដើមលក់ចេញដើម្បីយកផលចំណេញនៅពេលដែលមាសបានហក់ឡើងខ្ពស់បំបែកកំណត់ត្រាតម្លៃដ៏ខ្ពស់បំផុតមួយ។

 តាមពិតវាជារឿងធម្មតាទៅហើយដែលមាសឡើងខ្លាំងហើយធ្លាក់ចុះមកវិញព្រោះពេលមាសចាប់ផ្ដើមឡើងដល់តម្លៃមួយខ្ពស់ ក្រុមអ្នកវិនិយោគគិតថាវាដល់តម្លៃមួយខ្ពស់ដែលពិបាកនឹងឡើងទៀតនោះពួកគាត់នឹងធ្វើការលក់ចេញដើម្បីបានផលចំណេញ។ សម្រាប់ហាងឆេងមាសក្នុងស្រុកយើងវិញនៅថ្ងៃនេះធ្លាក់ចុះមកត្រឹម៣៦៣ដុល្លារក្នុងមួយជី។ 

គួរបញ្ជាក់ផងដែរថាសម្រាប់អ្នកចង់ស្វែងយល់និងវិនិយោគលើហាងឆេងមាសឲ្យបានផលចំណេញបងប្អូនគួរសិក្សាស្វែងយល់ ជាពិសេសគួរមានចំណេះដឹងផ្នែកហិរញ្ញវត្ថុងនិងផ្នែកវិភាគទីផ្សារ។ លើសពីនេះបងប្អូនក៏អាចស្វែងរកអ្នកប្រឹក្សាដែលជាអ្នកជំនាញក្នុងការវិភាគទីផ្សារជូនបងប្អូន៕