កាលពីយប់ថ្ងៃទី០២ ខែមេសា ឆ្នាំ២០២៥ នៅសេតវិមាន ប្រធានាធិបតីអាម៉េរិក លោក Donald Trump បានប្រកាសដាក់ពន្ធលើទំនិញនាំចូលពីកម្ពុជារហូតដល់ ៤៩% ខណៈតួរលេខពន្ធនេះខ្ពស់ជាងគេបំផុតក្នុងតំបន់អាស៊ាន។

ក្នុងនោះយោងតាមរបាយការណ៍ចុងឆ្នាំ ២០២៤ របស់អគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា ទំនិញសំខាន់ៗដែលកម្ពុជា បាននាំចេញច្រើនជាងគេរួមមាន៖ សម្លៀកបំពាក់ និងគ្រឿងបន្ទាប់បន្សំ ដែលធ្វើឡើងពីក្រណាត់, ផ្លែឈើ និងគ្រាប់ផ្លែឈើ ដែលអាចបរិភោគបាន, ម៉ាស៊ីន និងឧបករណ៍អគ្គិសនី, ស្បែកជើង, កៅស៊ូ និង ផលិតផលធ្វើអំពីកៅស៊ូ រួមនឹងទំនិញសំខាន់ៗផ្សេងទៀត។

គួរជម្រាបផងដែរថា របាយការណ៍ដដែលបានបង្ហាញថា កម្ពុជានាំចេញទំនិញទៅអាម៉េរិក ក្នុងទំហំប្រមាណ ៨,៨ពាន់លានដុល្លារ ដោយកើនឡើង ១១% បើធៀបនឹងឆ្នាំ២០២៣។ កម្ពុជា នាំចូលទំនិញពីអាម៉េរិកមានទំហំប្រមាណ ២៥៧លានដុល្លារ ដោយកើនឡើង ២,៧%៕