ថ្ងៃនេះបើកភ្នែកឡើងឃើញលោក Donald Trump កំពុងឈរអានតារាងដែលសហរដ្ឋអាមេរិកត្រូវដំឡើងពន្ធនាំចូលថ្មីដែលជាការយកពន្ធទៅវិញទៅមកដោយក្នុងនោះប្រទេសកម្ពុជាយើងក៏ត្រូវបានអាមេរិកដំឡើងពន្ធចំនួន៤៩%ផងដែរ។

ចំពោះការយកពន្ធនាំចូលរបស់អាមេរិកទៅលើប្រទេសជាច្រើនដែលជាដៃគូពាណិជ្ជកម្មរបស់ខ្លួន បងប្អូនមួយចំនួនប្រហែលជាឆ្ងល់ហើយថាតើអាមេរិកគេគិតពន្ធដូចម្ដេច។

តាមពិតទៅរបៀបដែលក្រុមការងារសេតវិមានរបស់រដ្ឋាភិបាលគណនារកអត្រាគិតពន្ធនាំចូលរបស់របស់ប្រទេសជាច្រើនគឺសាមញ្ញបំផុត។ ត្រង់នេះអាមេរិកយកឱនភាពនៃការធ្វើពាណិជ្ជកម្មរបស់ខ្លួនជាមួយប្រទេសមួយចែកនឹងចំនួនទំហំទឹកប្រាក់នាំចេញរបស់ប្រទេសនោះទៅកាន់អាមេរិក។

ឧទាហរណ៍ជាក់ស្ដែងឱនភាពពាណិជ្ជកម្មរបស់អាមេរិកជាមួយចិនមានចំនួន២៩១.៩ពាន់លាន$ ចំណែកចំនួនទឹកប្រាក់នាំចូលរបស់ចិនទៅកាន់អាមេរិកមានចំនួន៤៣៣.៨ពាន់លានដុល្លារ។ ដូច្នេះយើងបាន ២៩១.៩ពាន់លាន$ ចែកចំនួន៤៣៣.៨ពាន់លានដុល្លារ ស្មើ០.៦៧២៨ឬស្មើនឹង៦៧%។

 ត្រង់នេះអាមេរិកត្រូវគិតពន្ធនាំចូលរបស់ចិនចំនួន៦៧% ប៉ុន្ដែលោក Donald Trump លើកឡើងថាដោយសារលោកជាមនុស្សចិត្តល្អ ដូច្នេះលោកសម្រេចកាត់ពន្ធនាំចូលពាក់កណ្ដាល ដែលជាលទ្ធផលចុងក្រោយចិនត្រូវបង់ពន្ធនាំចូលតែ៣៤%ប៉ុណ្ណោះ។ ហើយរូបមន្តនេះគឺប្រើប្រាស់គណនាសម្រាប់ប្រទេសទាំងអស់ដែលអាមេរកគិតពន្ធនាំចូល៕