អនុក្រឹត្យរបស់រាជរដ្ឋាភិបាលកម្ពុជា ចុះហត្ថលេខាដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី១ ខែមេសា ឆ្នាំ២០២៥ បាន កំណត់យកទម្រង់ថ្មីនិងលក្ខណៈសម្គាល់ពិសេស លើអត្តសញ្ញាណបណ្ណសញ្ជាតិខ្មែរ។

ក្នុងនោះ នៅលើសន្លឹកអត្តសញ្ញាណបណ្ណសញ្ជាតិខ្មែររូបរាងថ្មីនឹងមានកំណត់អំពីទម្រង់ លក្ខណៈសម្គាល់ ​និងសុវត្ថិភាពពិសេស ដែលមានដូចជាទង់ជាតិកម្ពុជា ប្រាសាទអង្គរ  ព្រះរាជសង្ហារ មីក្រូអក្ខរៈ បន្ទះឈីប ខែ្សកោងសុវត្ថិភាព និមិត្តសញ្ញាក្រសួងមហាផ្ទៃ ក្បាច់លម្អនិងផ្នែកខាងក្រោយបង្កប់ UV ជាដើម។

ដោយអនុក្រឹត្យស្តីពីទម្រង់ថ្មីនៃអត្តសញ្ញាណបណ្ណសញ្ជាតិខ្មែរនេះ មានគោលបំណងដើម្បីធានាលើការចុះបញ្ជីអត្តសញ្ញាណបណ្ណសញ្ជាតិខ្មែរឱ្យបានត្រឹមត្រូវ ស្របតាមគោលការណ៍កំណត់នៅក្នុងច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម។

សូមបញ្ជាក់ផងដែរថា អនុក្រឹត្យនេះនឹងមានវិសាលភាពអនុវត្ត ចំពោះការចុះបញ្ជីអត្តសញ្ញាណបណ្ណសញ្ជាតិខ្មែរ សម្រាប់បុគ្គល គ្រប់រូបដែលមានសញ្ជាតិខ្មែរ៕