រដ្ឋបាលខេត្តសៀមរាបបានជូនដំណឹងអំពី ការធ្វើដំណើរដោយឥតបង់ថ្លៃដល់សាធារណៈជនទាំងអស់ ដែលមានបំណងធ្វើដំណើរពីភ្នំពេញទៅខេត្តសៀមរាប  និងខេត្តសៀមរាបមកភ្នំពេញ ចាប់ពីថ្ងៃទី១២ ដល់ថ្ងៃទី១៧ មេសា​ ឆ្នាំ២០២៥ ក្នុងឱកាសបុណ្យចូលឆ្នាំខ្មែរ។

ការធ្វើដំណើរដោយឥតបង់ថ្លៃតាមរយៈរថយន្តក្រុងនេះ គឺមានរយៈពេល០៦ថ្ងៃ ដែលមាន រថយន្ត ចំនួន១១២គ្រឿងសម្រាប់បម្រើដល់ការដឹកជញ្ជូនពីរាជធានីភ្នំពេញ ទៅកាន់ខេត្តសៀមរាប និងការដឹកជញ្ជូន ត្រឡប់មករាជធានីភ្នំពេញវិញ តាមពេលវេលា និងទីតាំងចំណតដូចខាងក្រោម។

១. ការចេញដំណើរពីរាជធានីភ្នំពេញ ទៅកាន់ខេត្តសៀមរាប៖

ចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ ២០២៥ ចេញដំណើររៀងរាល់ម៉ោង០៦៖៣០នាទីព្រឹក (ចេញជាបន្តបន្ទាប់រហូតអស់រថយន្ត) ដែលមានទីតាំងចំណតនៅដីឡូតិ៍តំបន់ OCICជ្រោយចង្វារ (រង្វង់មូលទេពមច្ឆា) ។

គោលដៅចុះនៅទីតាំងគោលដៅ នៅមណ្ឌលរដ្ឋបាលមន្ទីរខេត្ត សៀមរាប វិថីសម្តេចវិបុលបញ្ញា សុខ អាន (ផ្លូវ៦០ម៉ែត្រ)។

២. ការចេញដំណើរពីខេត្តសៀមរាប មករាជធានីភ្នំពេញ៖

នៅថ្ងៃទី១២ ខែមេសា ឆ្នាំ២០២៥ ចេញដំណើរនៅវេលាម៉ោង ១៤:៣០ នាទីរសៀល។ ក្នុងនោះចាប់ពីថ្ងៃទី១៣ ដល់ថ្ងៃទី១៧ ខែមេសា ឆ្នាំ២០២៥ ចេញដំណើររៀងរាល់ម៉ោង៦៖៣០ នាទីព្រឹក (ចេញដំណើរជាបន្តបន្ទាប់រហូតអស់រថយន្ត) ។

ទីតាំងចេញដំណើរគឺនៅ មណ្ឌលរដ្ឋបាលមន្ទីរខេត្តសៀមរាប វិថីសម្តេចវិបុលបញ្ញា សុខ អាន (ផ្លូវ៦០ ម៉ែត្រ)។

គោលដៅចុះនៅទីតាំងចំណតដីឡូតិ៍តំបន់ OCIC ជ្រោយចង្វារ (រង្វង់មូលទេពមច្ឆា)។

អាស្រ័យហេតុនេះ សូមបងប្អូនប្រជាពលរដ្ឋទាំងអស់មេត្តាជ្រាប និងចូលរួមធ្វើដំណើរ តាមរថយន្ត របស់រដ្ឋាករស្វ័យ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ ប្រកបដោយសុវត្ថិភាព និងផាសុកភាព។

ដោយឡែកប្រសិនបើបងប្អូនមានបំណងចង់ជិះរថយន្ត ដោយចេញសោហ៊ុយខ្លួនឯងជាមួយនឹងការធ្វើដំណើរដែលមានតម្លៃសមរម្យ​ អាចធ្វើការកក់សំបុត្រឡានក្រុងអគ្គិសនីរបស់ ក្រុមហ៊ុន​វីរៈប៊ុនថាំ ដែលមានជើងចេញដំណើរទៅខេត្តសៀមរាបផងដែរ។

សម្រាប់សំបុត្រជិះឡានក្រុងអគ្គិសនីទៅខេត្តសៀមរាប គឺមានតម្លៃ១០ដុល្លារ  ដែលមានម៉ោងចេញដំណើរចាប់ពីម៉ោង ៩ព្រឹក ដល់២:៣០រសៀល និងពីម៉ោង៥ល្ងាច ដល់១០:៣០នាទីយប់៕