បន្ទាប់ពីកាន់កាប់ក្រសួងប្រសិទ្ធិភាពរដ្ឋាភិបាល DOGE ចាប់តាំងពីខែមករា ឆ្នាំ២០២៥មក មហាសេដ្ឋី Elon Musk អាចនឹងចាកចេញពីតួនាទីរដ្ឋាភិបាល នៅខែឧសភា ខាងមុខនេះ ក្រោយបំពេញមុខងារជាបុគ្គលិករដ្ឋបាលពិសេសនៃរដ្ឋបាល Trump គ្រប់រយៈពេល១៣០ថ្ងៃ។
ប្រភពពី NBC បានចុះផ្សាយដូច្នេះថា បើតាមលោកប្រធានាធិបតីអាមេរិក Donald Trump បានបង្ហើបប្រាប់ទៅកាន់ក្រុមគណៈរដ្ឋមន្រ្តី គឺលោក Elon Musk អាចនឹងលាឈប់ពីតួនាទីនៅចុងខែឧសភា ដោយសារតែMusk មានភារៈកិច្ចជាច្រើននៅក្នុងអាជីវកម្មរបស់គាត់។
ចំពោះដំណឹងដែលលោក Elon Musk បម្រុងនឹងលាលែងពីតំណែងនេះបានផ្សព្វផ្សាយពេញប្រព័ន្ធផ្សព្វផ្សាយអាមេរិក ក្រោយតម្លៃភាគហ៊ុនរបស់ក្រុមហ៊ុន Tesla ធ្លាក់ចុះ ព្រមទាំងបញ្ហាដែលប្រជាជនអាមេរិកនាំគ្នាដុតបំផ្លាញឡាន Tesla នាពេលថ្មីៗនេះ។
ក្នុងនោះការតវ៉ានិងការបំផ្លិចបំផ្លាញ បានរីករាលដាលពាសពេញសហរដ្ឋអាមេរិក និងមានពាក្យស្លោក ពហិកាកុំទិញផលិតផល Tesla ព្រោះតែហេតុផលដែលលោកចូលបម្រីរដ្ឋាភិបាល។
ទោះបីជាយ៉ាងនេះក្តី លោកប្រធានាធិបតី Trump បានបញ្ជាក់ប្រាប់ក្រុមអ្នកសារព័ត៌មាន នៅការិយាល័យ Oval នៃសេតវិមាន កាលពីថ្ងៃចន្ទកន្លងទៅថា Elon Muskជាមនុស្សអស្ចារ្យតែគាត់ក៏មានក្រុមហ៊ុនធំៗដែលត្រូវដំណើរការ ប៉ុន្តែគាត់នៅអាចត្រឡប់មកបម្រើរដ្ឋាភិបាលវិញបើសិនជាគាត់ចង់៕
អត្ថបទដោយ៖ ពីង ជូអេង
