ប្រធានាធិបតីអាម៉េរិក លោក Donald Trump បានបញ្ជាក់ថា ក្រសួងប្រសិទ្ធភាពរដ្ឋាភិបាល (DOGE) ដែលដឹកនាំដោយមហាសេដ្ឋី Elon Musk អាចនឹងត្រូវបិទ មុនថ្ងៃកំណត់។ នេះបើយោងតាមការឲ្យដឹងពី AP News នាថ្ងៃទី ០៣ ខែមេសា ឆ្នាំ២០២៥។

លោក Donald Trump បានថ្លែងប្រាក់ទីភ្នាក់ងារសារព័ត៌មានយ៉ាងដូច្នេះថា៖ «គាត់មានក្រុមហ៊ុនធំៗជាច្រើនកំពុងដំណើរការ។ ដូច្នេះក្នុងពេលណាមួយ គាត់នឹងត្រូវត្រឡប់ទៅធ្វើការងារទាំងអស់របស់គាត់វិញ។ គាត់ជាមនុស្សពូកែ ហើយខ្ញុំពិតជាចង់រក្សាគាត់ឲ្យនៅធ្វើការងារជាមួយយើងណាស់ ឲ្យបានយូរតាមដែរអាចធ្វើទៅបាន»។

យ៉ាងណាមិញ លោក Elon Musk ដែលជាក្បាលម៉ាស៊ីននៃ ក្រសួងប្រសិទ្ធភាពរដ្ឋាភិបាល (DOGE) រំពឹងថានឹងចាកចេញពីតួនាទីនៅចុងខែឧសភា ឆ្នាំ២០២៥ ដោយសារលោកអាចបម្រើជានិយោជិតរដ្ឋបាលពិសេសបានត្រឹមរយៈពេល ១៣០ ថ្ងៃក្នុងមួយឆ្នាំប៉ុណ្ណោះ។

ក្រៅពីការចាកចេញរបស់លោក Elon Musk ប្រធានាធិបតី Donald Trump ក៏បានបញ្ជាក់ផងដែរថា វាមិនច្បាស់នោះទេថា DOGE នឹងបន្តដំណើរការទៀតឬយ៉ាងណានោះ ដោយសារតែថ្នាក់ដឹកនាំរបស់ទីភ្នាក់ងារនេះ សុទ្ធសឹងតែមានមុខជំនួញផ្ទាល់ខ្លួនរបស់ពួកគេ ដើម្បីត្រលប់ទៅគ្រប់គ្រងវិញ។

សូមជម្រាបថា ក្រោយទទួលភារកិច្ចដឹកនាំការិយាល័យប្រសិទ្ធភាពរដ្ឋាភិបាល ចាប់តាំងពីចុងខែមករាមក មហាសេដ្ឋី Elon Musk បានជួយសម្រួលដល់ការកាត់បន្ថយការចំណាយរបស់ទីភ្នាក់ងារសហព័ន្ធ ដោយជំរុញឲ្យមានការបញ្ឈប់ការងារ និងបិទអង្គភាពមួយចំនួន ជាពិសេសបានគាស់កកាយ និងរកឃើញរឿងរ៉ាវមិនប្រក្រតីក្នុងរដ្ឋបាលចាស់ ខណៈលោកបានសម្រេចលុបឈ្មោះខ្មោចរហូតដល់ ៣,២លាននាក់ ចេញពីបញ្ជីអ្នកទទួលបានផលប្រយោជន៍ពីរបបសន្តិសុខសង្គម ដោយក្នុងចំណោមអ្នកទាំងនោះភាគច្រើនមានអាយុ១២០ឆ្នាំ ហើយខ្លះច្រើនជាងនេះទៅទៀត៕

អត្ថបទដោយ៖ កាន់ ដារ៉ា (ស្មេរពនេចរ) សៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ បញ្ជាទិញតាម  https://t.me/BusinessCambodiaBook