ប្រធានាធិបតីចិនលោក​ ស៊ី ជីនពីង-Xi Jinping នឹងអញ្ចើញមកបំពេញទស្សនកិច្ចនៅប្រទេសកម្ពុជា នាពាក់កណ្តាលខែមេសា ឆ្នាំ២០២៥នេះ បន្ទាប់ពីកន្លងទៅជិត១០ឆ្នាំដែលលោកបានអញ្ចើញមកទស្សនកិច្ចផ្លូវរដ្ឋជាលើកដំបូងនៅកម្ពុជា កាលពីខែតុលា ឆ្នាំ២០១៦ ក្នុងនាមជាមេដឹកនាំសាធារណៈរដ្ឋប្រជាមានិតចិន។

ទីភ្នាក់ងារសារព័ត៌មាន South China Morning Post បានឱ្យដឹងថា បើតាមការបញ្ជាក់ពីមន្រ្តីការទូតចិនគឺ គម្រោងទស្សនកិច្ចនេះលោកស៊ី ជីនពីង នឹងអញ្ជើញទៅប្រទេសកម្ពុជា, ម៉ាឡេស៊ី និងវៀតណាម ដោយការប្រទេសទៅទាំង៣នេះ គឺក្នុងគោលបំណងពង្រឹងទំនាក់ទំនង ស្របពេលតំបន់អាស៊ីអាគ្នេយ៍កំពុងបារម្ភពីគោលនយោបាយការបរទេសរបស់អាមេរិកជុំវិញពន្ធគយ។

សម្រាប់ការអញ្ចើញទៅបំពេញទស្សនកិច្ចនៅប្រទេសចំនួន៣នេះ គឺជាលើកដំបូងបំផុតហើយនៅក្នុងឆ្នាំ២០២៥នេះ ដែលលោកប្រធានាធិបតីចិន ធ្វើដំណើរមកកាន់អាស៊ីអាគ្នេយ៍។​

សូមជម្រាបបន្ថែមថានាពេលកន្លងមក កម្ពុជានិងចិន បានបង្កើនកិច្ចសហប្រតិបត្តិការត្បូងពេជ្រ, ច្រកអភិវឌ្ឍឧស្សាហកម្ម, ច្រករបៀងត្រី និងស្រូវ, ឆ្នាំផ្លាស់ប្តូរប្រជាជន និងប្រជាជនកម្ពុជា-ចិន ឆ្នាំ២០២៤ និងការអភិវឌ្ឍហេដ្ឋារចនាសម្ព័ន្ធផ្សេងៗ ក្រោមគំនិតផ្តួចផ្តើមខ្សែក្រវាត់ និងផ្លូវ៕