ភ្លៀងកក់ខែនឹងបន្តមានឥទ្ធិពលមកលើព្រះរាជាណាចក្រកម្ពុជា រយៈពេល ២៣ ថ្ងៃ ពោលគឺចាប់ពីថ្ងៃទី៧ ដល់ថ្ងៃ ទី៣០ ខែមេសា ឆ្នាំ២០២៥ ខាងមុខនេះ ដែលនឹងគ្របដណ្តប់រាយប៉ាយនៅក្នុងក្របខ័ណ្ឌទូទាំងប្រទេស កម្ពុជា និងលាយឡំជាមួយខ្យល់កន្រ្តាក់ និងផ្គររន្ទះ។ នេះបើយោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី៤ ខែមេសា ឆ្នាំ២០២៥។
ដើម្បីចៀសវាងពីគ្រោះថ្នាក់ផ្សេងៗដែលកើតមានជាយកថាហេតុ ក្រសួងធនធានទឹក និងឧតុនិយម ក៏បានអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ផងដែរ ទាក់ទងនឹងបម្រែបម្រួលអាកាសធាតុនេះ។ ខណៈក្រសួងនឹងបន្ដតាមដានស្ថានភាពធាតុអាកាស និងអាកាសធាតុ ដើម្បីជម្រាបជូនដំណឹងជាបន្ដបន្ទាប់ ប្រសិនបើមានការវិវត្ដប្រែប្រួល។
សូមជម្រាបថា កន្លងមកចាប់ពីថ្ងៃទី១៥ ខែមីនា រហូតដល់ថ្ងៃទី៤ ខែមេសា ឆ្នាំ២០២៥ ភ្លៀងកក់ខែបានគ្រប់ដណ្ដប់លើ ៤៥ ខណ្ឌ/ស្រុក ក្នុង ១៥ រាជធានី/ខេត្ដរួមមកហើយផងដែរ៕
