ក្រោយសម្រេចចាកចេញពីក្លឹបបារាំង Paris Saint Germain ពេលនេះកីឡាករ Lionel Messi បានសម្រេចចូលរួមជាមួយក្លឹបថ្មី Inter Miami ដែលស្ថិតនៅលីគកំពូលសហរដ្ឋអាមេរិកហើយ។ ហើយថ្មីៗនេះដែរម្ចាស់ជើងឯកពិភពលោកឆ្នាំ២០២២ ក៏បានបង្ហាញខ្លួនទៅកាន់អ្នកគាំទ្ររបស់ក្លឹប Inter Miami ផងដែរ។
ក្រោយបានចូលរួមនៅក្លឹបថ្មីនេះភ្លាម Lionel Messi ក៏បានបង្ហាញចំណាប់អារម្មណ៍របស់ខ្លួនផងដែរ។ យោងតាមការចុះផ្សាយពីអ្នកការសែតកីឡាដ៏ល្បីលោក Fabrizio Romano នៅថ្ងៃទី១៧ ខែកក្កដា ឆ្នាំនេះ កីឡាករ Lionel Messi បានបញ្ជាក់យ៉ាងដូច្នេះថា “ ខ្ញុំសប្បាយចិត្តណាស់ដែលបាននៅទីនេះ! ខ្ញុំមិនអាចរង់ចាំក្នុងការចាប់ផ្តើមការហ្វឹកហាត់ និងការប្រកួតប្រជែងនោះទេ”។
លោកបានបន្តថា “ខ្ញុំមកទីនេះដើម្បីប្រកួតប្រជែង និងយកឈ្នះ ដើម្បីជួយក្រុមរបស់ខ្ញុំដូចដែលខ្ញុំតែងតែធ្វើរាល់ដង ខ្ញុំមកទីនេះដោយក្តីប្រាថ្នាដូចរាល់ដង ហើយពួកយើងនឹងរីករាយច្រើន”។
គួររំលឹកផងដែរថា កីឡាករខ្សែប្រយុទ្ធរូបនេះមានអាយុ ៣៦ឆ្នាំ បានចាកចេញពីក្លឹប Barcelona ទៅលេងឱ្យក្លឹប PGS កាលពីអំឡុងខែសីហាឆ្នាំ២០២១ មក ហើយលោកក៏បានចាកចេញពីក្លឹប PGS ដែរហើយទៅចុះកុងត្រាថ្មីលេងឱ្យក្លឹប Inter Miami ដែលមានអតីតកំពូលកីឡាករ David Beckham ជាប្រធានក្លឹប៕
អត្ថបទដោយ៖ ឌឿក ស្រីនុត
