ដូចប្រិយមិត្តបានជ្រាបរួចមកហើយអំពី កីឡាការិនី ខាន់ ចេសា ម្ចាស់មេដាយមាសកីឡាអាស៊ីអាគ្នេយ៍តំណាងឱ្យកម្ពុជា ក៏ដូចជាលេងនៅស៊ីហ្គេមក្នុងនាមជាម្ចាស់ផ្ទះ លើប្រភេទកីឡាជីជឺតស៊ូ និងជាកីឡាការិនីមួយរូបដែលដណ្តើមបានមេដាយមាសលំដាប់ថ្នាក់ពិភពលោកជាច្រើនប្រភេទផងដែរ។
ក្រៅពីចេះក្បាច់កីឡាជីជឺតស៊ូ ដែលជាកីឡារបស់ប្រទេសប្រេស៊ីល និងកម្រមានមនុស្សស្រីលេងនេះ កញ្ញា ចេសា ក៏អាចលេងកីឡា៣ ប្រភេទផ្សេងទៀតដូចជា កីឡាបាល់ទាត់, ជូដូ និងចំបាប់។ កូនកាត់៣សាសន៍ រាងកាយមាំមួនរូបនេះ បានឱ្យដឹងថាចំពោះកញ្ញាអ្វីដែលធ្វើឱ្យកញ្ញាមានទេពកោសល្យលើកីឡាព្រោះនេះជាទម្លាប់គ្រួសាររបស់នាង ហើយនាងពិតជាហ្មត់ចត់ជាមួយកីឡានេះណាស់ មួយថ្ងៃហ្វឹកហាត់ជីជឺតស៊ូស្ទើរតែ៥ម៉ោងទៅហើយ និងឆ្លៀតរៀនបណ្តើរផងដែរ។
ថ្លែងក្នុងបទសម្ភាសន៍មួយជាមួយស្ថានទូតអាមេរិកប្រចាំនៅកម្ពុជា ចេសា បានលើកឡើងថា "ខ្ញុំដឹងថាកីឡាជីជឺតស៊ូជាកីឡាដែលមិនសូវមានការចាប់អារម្មណ៍នោះទេនៅកម្ពុជា ក៏ដូចជាសហរដ្ឋអាមេរិក ប៉ុន្តែខ្ញុំពិតជាចូលចិត្តនិងស្រឡាញ់កីឡានេះនិងចង់ឱ្យខ្លួនឯង ក្លាយជាមនុស្សដំបូងធ្វើឱ្យកីឡានេះមានប្រជាប្រិយភាព”។
ក្នុងនោះកញ្ញាវ័យ២២ឆ្នាំរូបនេះ ក៏បានបន្ថែមថាអ្វីដែលនាំឱ្យកញ្ញាខំប្រឹងប្រែងខ្លាំងលើកីឡានេះ ព្រោះកញ្ញា ចង់ឃើញស្រ្តី លេងកីឡានេះឱ្យបានកាន់តែច្រើនឡើង ដើម្បីរក្សារាងនិង មានសុខភាពល្អ ហើយមួយវិញទៀតកញ្ញាចង់ក្លាយជាគ្រូបង្វឹកដែលអាចផ្ទេរចំណេះដែលកញ្ញាមានទៅកាន់អ្នកជំនាន់ក្រោយ។
គួរឱ្យដឹងដែរថាក្រៅពីជីជឺតស៊ូដែលកីឡាការិនីឆ្នើមរូបនេះអាចលេងបានកីឡា៣ប្រភេទខាងលើនេះក៏ជាកីឡាដែលមានប្រជាប្រិយភាពផងដែរនៅទូទាំងអាស៊ីនិងអ៊ឺរ៉ុប មួយវិញទៀតកីឡាទាំងនេះដូចជាចំបាប់ជាដើមសុទ្ធសឹងតែជាកីឡាដែលមិនសូវសម្បូរមនុស្សស្រីលេងនោះទេ៕
វីដេអូបទសម្ភាសន៍ស្ថានទូតអាមេរិកប្រចាំនៅកម្ពុជាជាមួយ កញ្ញា ខាន់ ចេសា៖ វីដេអូ
អត្ថបទដោយ៖ ពីង ជូអេង