សេចក្តីថ្លែងការណ៍ពីការិយាល័យរបស់លោក អតីតប្រធានាធិបតី បានបញ្ជាក់កាលពីថ្ងៃទី១៨ ខែឧសភា ឆ្នាំ២០២៥នេះយ៉ាងដូច្នេះ លោក ចូ បៃដិន ស្ថិតក្នុងអាយុ៨២ ឆ្នាំត្រូវបានគេធ្វើរោគវិនិច្ឆ័យ រកឃើញថាមានជំងឺមហារីកក្រពេញប្រូស្តាត។ នេះបើយោងតាមការចុះផ្សាយរបស់សារព័ត៌មាន BBC ។
បច្ចុប្បន្ននេះគ្រួសាររបស់លោក ចូ បៃដិន កំពុងពិចារណាលើជម្រើសព្យាបាល ខណៈជំងឺរបស់លោកគឺស្ថិតក្នុងដំណាក់កាលរាលដាលដល់ឆ្អឹង ដោយនេះមានន័យថាជំងឺរបស់លោកត្រូវបានចាត់ថ្នាក់ថាជាមហារីក "កម្រិតខ្ពស់" ដែលកោសិកាមហារីកអាចរីករាលដាលយ៉ាងឆាប់រហ័ស។
ក្នុងនោះជំងឺហមហារីកក្រពេញប្រូស្តាត គឺជាមហារីកទូទៅបំផុតទីពីរដែលងាយប៉ះពាល់បំផុតដល់បុរស ជាជំងឺលាក់មុខនៅពីក្រោយជំងឺមហារីកស្បែក។
បើតាមមជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក (CDC) បានបញ្ជាក់ថាបុរស ១៣ នាក់ក្នុងចំណោម ១០០នាក់នឹងវិវត្តទៅជាជំងឺមហារីកក្រពេញប្រូស្តាតនៅចំណុចណាមួយក្នុងជីវិតរបស់ពួកគេ ដោយអាយុគឺជាកត្តាហានិភ័យទូទៅបំផុត។
យ៉ាងណាមិញបន្ទាប់ពីដំណឹងនេះត្រូវបានផ្សព្វផ្សាយលោកប្រធានាធិបតីបច្ចុប្បន្ន Donald Trump បានសរសេរនៅលើបណ្តេញសង្គមផ្ទាល់ខ្លួន Truth Social ទៅកាន់ភរិយាលោក Jeo Biden ថា៖ “យើងសូមថ្លែងអំណរគុណយ៉ាងកក់ក្ដៅ និងជូនពរដល់លោក Jill និងក្រុមគ្រួសារ យើងសូមជូនពរឱ្យ Joe ឆាប់ជាសះស្បើយ និងជោគជ័យ"។
សូមជម្រាបផងដែរថានៅមុនពេលកាន់តំណែងជាប្រធានាធិបតី និងអំឡុងពេលកាន់តំណែងលោក ចូ បៃដិន គឺជាបុគ្គលដែលសកម្មបំផុតក្នុងបរិច្ចាគលើបេសសកម្មស្រាវជ្រាវអំពីជំងឺមហារីក ខណៈកូនប្រុសច្បងរបស់លោកបានទទួលមរណៈភាពក្នុងឆ្នាំ២០១៥ ដោយសារជំងឺមហារីកខួរក្បាល៕
អត្ថបទដោយ៖ ពីង ជូអេង
