ក្រោយមានការផ្ទុះឡើងវិញនូវជំងឺកូវីដ-១៩បំប្លែងថ្មី JN.1 ក្នុងប្រទេសថៃ និងតំបន់ខាងជើងរបស់អាស៊ីអាគ្នេយ៍ ក្រសួងសុខាភិបាលកម្ពុជាបានអំពាវនាវ ឲ្យប្រជាពលរដ្ឋបង្កើនការប្រុងប្រយ័ត្នខ្ពស់ ជាពិសេសជនដែលងាយរងគ្រោះ។
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានលើកឡើងយ៉ាងដូច្នេះថា៖ «ដើម្បីអាចការពារខ្លួនពីការវាយលុកក្នុងសរីរាង្គរាងកាយបុគ្គល ជាពិសេសក្រុមងាយទទួលរងគ្រោះពីជំងឺកូវីដ-១៩នេះ ដែលអាចឈានដល់ភាពធ្ងន់ធ្ងរ និងអាចស្លាប់បាត់បង់ជីវិតបានដែរនោះ ខ្ញុំសូមក្រើនរំលឹកបងប្អូនប្រជាពលរដ្ឋកម្ពុជាទាំងអស់ ជាពិសេសគឺក្រុមងាយរងគ្រោះ ដូចបានរៀបរាប់ខាងលើ នាំគ្នាទៅចាក់វ៉ាក់សាំងកូវីដ-១៩ ភីហ្វាយហ្សឺ (Pfizer) ដែលមាននៅតាមបណ្តារាជធានី-ខេត្តទាំង២៥ (នៅតាមមណ្ឌលសុខភាព ឬមន្ទីរពេទ្យរដ្ឋ) ចាប់ពីពេលនេះតទៅ»។
លើសពីនេះ លោកជំទាវវេជ្ជបណ្ឌិតបានសង្កត់ធ្ងន់ថា សូមកុំភ្លេចវិធានការ ««៣ ការពារ និង ៣ កុំ»» រួមជាមួយនឹងការចាក់វ៉ាក់សាំងកូវីដ-១៩ ទើបអាចជួយកាត់បន្ថយជាអតិប្បរិមា នូវភាពធ្ងន់ធ្ងរនៃជំងឺការចូលសម្រាកពេទ្យ និងការស្លាប់ ដូចដែលយើងទាំងអស់គ្នាឆ្លងកាត់បទពិសោធន៍ទទួលបានលទ្ធផលល្អទាំងនេះនៅឆ្នាំ២០២១ដល់ឆ្នាំ២០២២ ស្រាប់ហើយ។
គួរជម្រាបផងដែរថា គិតត្រឹមចន្លោះថ្ងៃទី១ ខែមករា ដល់ថ្ងៃទី ១៤ ខែឧសភា ឆ្នាំ២០២៥ ប្រទេសថៃបានរាយការណ៍ថាមានអ្នកឆ្លងជំងឺកូវីដ-១៩បំប្លែងថ្មី JN.1 សរុបចំនួន ៧១,០៦៧នាក់ និងស្លាប់ចំនួន ១៩នាក់ ដោយយោងតាមមជ្ឈមណ្ឌលព័ត៌មានកូវីដ-១៩ របស់ប្រទេសនេះ៕
