គិតត្រឹមឆ្នាំ២០២២នេះ មហាសេដ្ឋី Jack Ma សហស្ថាបនិកក្រុមហ៊ុន Alibaba បានរៀបការជាមួយនឹងភរិយាឈ្មោះ Zhang Ying អសរយៈពេល៣៤ឆ្នាំហើយ។ ចំណងអាពាហ៍ពាហ៍របស់អ្នកទាំង២ បានបន្សល់កូនប្រុសស្រីចំនួន៣នាក់ និងមានទ្រព្យសរុបប្រមាណជាង ២៤ពាន់លានដុល្លារអាមេរិក។
អ្នកស្រី Zhang Ying គឺជាភរិយារបស់មហាសេដ្ឋី Jack Ma ដែលធ្លាប់រៀន និងធ្វើការជាគ្រូបង្រៀនជាមួយគ្នា មុននឹងបានរៀបការ។ ក្នុងនោះផងដែរលោកស្រី Zhang Ying ធ្លាប់និយាយថា “ Ma Yun មិនមែនបុរសសង្ហា ប៉ុន្តែខ្ញុំបានស្រឡាញ់គាត់ ដោយសារគាត់ហ៊ានធ្វើរឿងដែលបុរសសង្ហាភាគច្រើនមិនហ៊ានធ្វើ”។
តាមរយៈប្រសាសន៍លោកស្រី មានន័យថា ភាពក្លាហានមោះមុត គឺពិតជាសំខាន់ខ្លាំងបំផុតសម្រាប់មនុស្សប្រុសគ្រប់រូប។ កាលនោះគាត់ហ៊ានលះបង់ការងារដែលគាត់មានតំណែងជាគ្រូបង្រៀនវ័យក្មេងនិងឆ្នើមក្នុងចំណាម១០នាក់ ដើម្បីមកចាប់ផ្តើមក្រុមហ៊ុនបកប្រែភាសា។
គួររំលឹកមកវិញថាកាលដែលលោក Jack Ma បានចាប់ផ្តើមចេញរកស៊ីបើកក្រុមហ៊ុនបច្ចេកវិទ្យានៅឆ្នាំ១៩៩៥ គឺភរិយារបស់លោកក៏បានសម្រេចចិត្តឈប់ពីការងារមកជួយលោកផ្តើមក្រុមហ៊ុន Alibaba ដែរ។ ទោះជាកាលនោះលោកស្រីត្រូវចំណាយពេលស្ទើរពេញមួយថ្ងៃ ជាអ្នកចម្អិនអាហារសម្រាប់ក្រុមការងារស្វាមីលោកស្រីក្តី។
គួរបញ្ជាក់ផងដែរថា Jack Ma ត្រូវបានគេដឹងថា ជាបុរសមានបំផុតទី២១ក្នុងពិភពលោក ប៉ុន្តែកាលពីអំឡុងឆ្នាំ២០១៩ លោកធ្លាប់មានបញ្ហាចម្រូងចម្រាស់ ដោយសារតែលោកបានរិះគន់លើនិយ័តករចិន ធ្វើឱ្យមានបញ្ហារហូតលែងសូវបង្ហាញមុខជាសាធារណៈដូចមុន៕
អត្ថបទដោយ៖ ពីង ជូអេង (កូនត្រចៀកកាំ)
