ផ្លូវល្បឿនលឿនភ្នំពេញ-ព្រះសីហនុ ត្រូវបានដាក់ដំណើរការសាកល្បងជាលើកដំបូងហើយ ក្រោយចំណាយពេលសាងសង់អស់ច្រើនខែរួចមក។ នេះបើយោងតាមការបញ្ជាក់ពីស្នងការដ្ឋាននគរបាលខេត្ដកំពង់ស្ពឺនៅថ្ងៃទី១៦ ខែកក្កដា ឆ្នាំ២០២២។
អ្វីដែលចាប់អារម្មណ៍នោះគឺ បច្ចេកទេសនៃការបង់ប្រាក់ថ្លៃធ្វើដំណើរលើផ្លូវទំនើបមួយនេះគឺពុំមែនបង់ជាសាច់ប្រាក់សុទ្ធនោះទេ។ ជាក់ស្ដែងតាមការបញ្ជាក់ពីប្រភពខាងលើ អ្នកដំណើរលើផ្លូវល្បឿនលឿនត្រូវប្រើប្រាស់កាតអេឡិចត្រូនិក ដើម្បីស្គេនឆ្លងកាត់ និងបង់ប្រាក់ទៅតាមចម្ងាយផ្លូវបើកបរជាក់ស្ដែង កាតអេឡិចត្រូនិកនោះមានឈ្មោះ ETC ជាកាតបង់ប្រាក់រួចរាល់ និងមានកត់ត្រាអត្តសញ្ញាណរថយន្តរួចជាស្រេចជាមួយក្រុមហ៊ុន៕
ប្រភពដដែលបន្ថែមថា ផ្លូវល្បឿនលឿនដំណើរការស្ថាបនាលើកំណាត់ផ្លូវប្រវែងជាង១៨៥គីឡូម៉ែត្រនេះជិតនឹងបញ្ចប់នៅអំឡុង២ខែ ខាងមុខនេះ ខណៈបញ្ជរបង់ប្រាក់លើផ្លូវល្បឿនលឿន មានចំនួន៥កន្លែង។ ដោយក្នុងនោះចាប់ផ្ដើមចេញពីភ្នំពេញត្រង់ផ្លូវក្រវ៉ាត់ក្រុងទី៣ មានបញ្ជរបង់ប្រាក់ទី១ បញ្ជរទី២ គឺនៅគីឡូម៉ែត្រ២៦ ត្រង់ខាងកើតទីរួមខេត្តកំពង់ស្ពឺ។ បញ្ជរទី៣ នៅត្រង់គីឡូម៉ែត្រ៧៦ តំបន់គីរីរម្យ និងត្រែងត្រយឹង។ បញ្ជរទី៤ ត្រង់គីឡូម៉ែត្រ១១៤ តំបន់កំពង់សិលា ចុះទៅផ្លូវបំបែកស្រែអំបិល និងបញ្ជរចុងទី៥ នៅគីឡូម៉ែត្រ១៨០ ទៅភ្ជាប់ផ្លូវជាតិលេខ៤ ត្រង់ខាងកើតច្រកចូលតំបន់ក្បាលឆាយ៕
អត្ថបទ៖ កឹម ប៊ុនធឿន
