បច្ចុប្បន្នពិភពលោកកំពុងជួបវិបត្តិអតិផរណាកើនឡើងយ៉ាងខ្លាំងដែលផ្ដើមចេញពីបញ្ហាសង្រ្គាមរវាងរុស្ស៊ីនិងអ៊ុយក្រែនបង្កការរំខានដល់សង្វាក់ផលិតកម្មជាច្រើន យ៉ាងណាមិញសេដ្ឋី Elon Musk បានចេញមុខអះអាងថាអតិផរណានឹងធ្លាក់ចុះវិញក្នុងពេលឆាប់ៗ។
បើយោងតាមការចុះផ្សាយរបស់សារព័ត៌មាន Yahoo Finance លោក Elon Musk បានឲ្យដឹងថាអត្រាអតិផរណាដើរដល់ចំណុចកំពូលហើយវានឹងធ្លាក់ទៅវិញនៅអំឡុងចុងឆ្នាំ២០២២នេះ។ លោកថាអតិផរណានឹងធ្លាក់ចុះមកវិញព្រោះបច្ចុប្បន្នតម្លៃប្រេងសាំងនិងទំនិញផ្សេងៗចាប់ផ្ដើមធ្លាក់ចុះបណ្ដើរៗហើយ។
លោកក៏បានពន្យល់ផងដែរថាកន្លងមកក្រុមហ៊ុនTesla របស់លោកធ្វើការដំឡើងថ្លៃរថយន្តអគ្គិសនី Tesla ដោយសារតែអតិផរណាកើនឡើងដែលធ្វើឲ្យការចំណាយលើវត្ថុធាតុដើមនិងថ្លៃដើមផលិតកើនឡើងខ្ពស់ដូច្នេះតម្លៃឡានTeslaក៏បានឡើងថ្លៃតាមហ្នឹងដែរ។ លោកក៏បានបង្ហើបផងដែថាបើអតិផរណាថយចុះនោះតម្លៃរថយន្តTesla នឹងថយចុះប៉ុន្ដែវាពឹងផ្អែកលើស្ថានភាពសេដ្ឋកិច្ចព្រោះអតិផរណាយើងមិនងាយគ្រប់គ្រងបានឡើយ។
គួរបញ្ជាក់ផងដែរបញ្ហាអតិផរណាចាប់ផ្ដើមកើនឡើងខ្លាំងទូទាំងពិភពលោកនៅពេលដែលប្រទេសរុស្ស៊ីនិងអ៊ុយក្រែនចាប់ផ្ដើមមានភាពតានតឹងដាក់គ្នា។ នៅសហរដ្ឋអាមេរិកអតិផរណាឡើងដល់៩.២%ជាអត្រាដ៏ខ្ពស់ក្នុងរយៈពេល៤០ឆ្នាំ ចំណែកនៅកម្ពុជាយើងវិញអតិផរណាឡើងដល់៧.២%ជាអត្រាដ៏ខ្ពស់ក្នុងរយៈពេលជាង១០ចុងក្រោយនេះ៕
អត្ថបទដោយ ទឿយ ហុង
