បច្ចុប្បន្នមានមនុស្សមិនតិចទេដែលកំពុងធ្វើការដើម្បីតំណែង កេរ្តិ៍ឈ្មោះនិងការទទួលស្គាល់។ យ៉ាងណាមិញបើតាមអនុប្រធានជាន់ខ្ពស់មួយរូបនៃក្រុមហ៊ុនបច្ចេកវិទ្យាធំមួយនៅអាមេរិក AT&T គឺលោក Robert Walters បានឱ្យដឹងថា ក្នុងបរិបទការងារចូរកុំព្យាយាមធ្វើខ្លួនជាបុគ្គលិកល្អផុតគេនៅកន្លែងធ្វើការ។
ម្យ៉ាងវិញទៀតបើអ្នកដឹកនាំឱ្យតម្លៃលើភាពល្អផុតគេរបស់បុគ្គលិកណាម្នាក់ខ្លាំងពេក ឬប្រៀបធៀបដោយលើក A បង្អាប់ B នឹងធ្វើឱ្យវប្បធម៌រួបរួមក្នុងការងារត្រូវបែកខ្ជាយ បុគ្គលិកមកធ្វើការនឹងចំណាយពេលប៉ែងជើងគ្នាមិនឈប់ អត្តចរិតច្រណែននឹងក្លាយជាមហារីក។
ថ្លែងក្នុងបទចែករំលែកមួយនៃ CNBC លោក Robert Walters បានពន្យល់ថា បុគ្គលិកមិនគួរមានផ្នត់គំនិតតាំងខ្លួនជាតួឯកនៅកន្លែងធ្វើការនោះទេ ហើយអ្នកដឹកនាំកាន់តែមិនត្រូវឱ្យតម្លៃលើបុគ្គលតែម្នាក់ខ្លាំងពេកដែរ ព្រោះនៅពេលអ្នកដឹកនាំកាន់តែឱ្យតម្លៃលើបុគ្គលល្អជាងគេនៅកន្លែងធ្វើការ នោះបាតុភាពនៃការមិនសហការនឺងកាន់កើតរីកធំឡើងៗ ជាបញ្ហាដែលពិបាកស្រាយ។
ដោយបាតុភាពនេះនឹងជំរុញឱ្យមានការប្រកួតប្រជែងក្នុងចំណោមមិត្តរួមការងារ ជាជាងពួតដៃគ្នាបង្កើនលទ្ធផលរួម ដើម្បីប្រយោជន៍រួមស្របតាមគោលដៅស្ថាប័ន ក្រុមហ៊ុនមិនអាចរីកចម្រើនសម្រាប់រយៈពេលវែងឡើយ។
លោក Walters បានបញ្ជាក់បន្តថា ការដាក់មនុស្សឱ្យសមនឹងការងារ ផ្តល់ឱ្យពួកគេនូវការទទួលស្គាល់អំពីសមិទ្ធិផលសំខាន់ៗចំពោះការងាររបស់ពួកគេរៀងៗខ្លួននោះ ទើបជាការបណ្តុះស្មារតីរួមនិងជំរុញឱ្យមានការរួបរួមគ្នានៅកន្លែងធ្វើការ រវាងបុគ្គលិកនិងបុគ្គលិក។ ដោយគ្មានបុគ្គលណាល្អជាងបុគ្គលណា គឺមានតែបុគ្គលដែលល្អនិងខ្លាំងពូកែលើជំនាញនិងការប្រតិបត្តិការងាររៀងៗខ្លួនប៉ុណ្ណោះ។
មិនខុសអ្វីពីអ្នកជំនាញផ្នែកភាពជាអ្នកដឹកនាំនិងជាអ្នកនិពន្ធដែលលក់ដាច់បំផុត កវី Simon Sinek ធ្លាប់បានលើកឡើងអំពីវិធីសាស្រ្តស្រដៀងគ្នាទៅនឹងអ្វីដែលលោក Walters បានលើកឡើងនិងអនុវត្តន៍រួចស្រាច់នោះទេ គឺថាសម្រាប់បុគ្គលិកវិញមិនគួរខ្វល់និងយកចិត្តទុកដាក់ខ្លាំងពេក អំពីការសរសើរ ការទទួលស្គាល់ និងសមិទ្ធផលដែលនាំឱ្យមានអំនួតនៅកន្លែងធ្វើការនោះទេ អ្វីដែលពួកគេគួរយកចិត្តទុកដាក់នោះគេលទ្ធផលការងារដែលបានជួយឱ្យក្រុមហ៊ុននិងខ្លួនឯងរីកចម្រើនទៅមុខ៕
អត្ថបទដោយ៖ ពីង ជូអេង
