ភ្នំពេញ ប្រទេសកម្ពុជា ថ្ងៃទី០២ ខែកញ្ញា ឆ្នាំ ២០២៤ - ក្រុមហ៊ុន DKSH ដែលជាអង្គភាពអាជីវកម្មផ្នែក Technology (ផ្គត់ផ្គង់ឧបករណ៍ និងសម្ភារៈក្នុងមន្ទីរពិសោធន៍) បានប្រកាសចាប់ដៃគូការសហការថ្មីជាមួយក្រុមហ៊ុន Hygiena ដែលឈានមុខគេផ្នែកផលិតឧបករណ៍តេស្ដរហ័សស្វែងរក ត្រួតពិនិត្យ និងកត់សម្គាល់ទៅលើអនាម័យ និងសុវត្ថិភាពចំណីអាហារ។ ក្រោមកិច្ចព្រមព្រៀងនេះ ក្រុមហ៊ុន DKSH នឹងនាំចូល និងចែកចាយផ្ដាច់មុខផលិតផលរបស់ Hygiena ដែលមានឧបករណ៍តេស្តរហ័សផ្ទៀងផ្ទាត់អនាម័យ (ATP) និងឧបករណ៍តេស្តរហ័សលើរោគវិនិច្ឆ័យមីក្រូជីវសាស្រ្ត ដែលស្វែងរកវត្តមាន GMO, Allergen, Microbial, Mycotoxin, និង Pathogen ជាដើម។
ឧបករណ៍តេស្តរហ័សនេះត្រូវបានរចនាឡើងជាពិសេស ក្នុងគោលបំណងគាំទ្រដល់ការពង្រឹងស្ដង់ដារអនាម័យ និងរក្សាសុវត្ថិភាពការផលិតលើគ្រប់វិស័យដូចជា ប្រព័ន្ធសុវត្ថិភាពចំណីអាហារ សុខាភិបាល និងឱសថ មីក្រូជីវសាស្រ្ត បរិស្ថាន បដិសណ្ឋារកិច្ច រោងចក្រ និងឧស្សាហកម្មធុនតូច និងមធ្យមជាដើម។
អ្នកនាង ស៊ូរ៉ាដា កេត្រោង (Surada Ketruang) ប្រធានផ្នែកលក់ប្រចាំតំបន់អាស៊ីអាគ្នេយ៍របស់ក្រុមហ៊ុន Hygiena បានលើកឡើងថា៖ “ការសហការរួមគ្នានេះ យើងនឹងនាំមកនូវ
ឧបករណ៍តេស្តរហ័សបែបនាវានុវត្តន៍ និងភាពងាយស្រួលជូនដល់អតិថិជនជាច្រើន ដែលធានាបាននូវសុវត្ថិភាព និងអនុលោមតាមស្ដង់ដារបច្ចេកវិទ្យាចុងក្រោយ”។ អ្នកនាងបន្តទៀតថា៖ “ពួកយើងមានសេចក្ដីសោមនស្សរីករាយក្នុងការសហការជាមួយក្រុមហ៊ុន DKSH ដើម្បីពង្រីកទីផ្សារនៅក្នុងប្រទេសកម្ពុជា ឡាវ និងមីយ៉ាន់ម៉ា ដោយជឿជាក់ថា ក្រុមហ៊ុន DKSH មានភាពប៉ិនប្រសប់ និងការយល់ដឹងស៊ីជម្រៅពីទីផ្សារក្នុងស្រុក ដែលធ្វើឱ្យពួកគេក្លាយជាដៃគូដ៏ល្អបំផុតសម្រាប់យើង”។
គួរបញ្ជាក់ផងដែរថា ក្រោមកិច្ចសហការព្រមព្រៀងនេះ DKSH ផ្ដល់នូវការវិភាគទីផ្សារ ការលក់ ការចែកចាយ និងសេវាកម្មជួសជុល និងថែទាំ ដើម្បីផ្ដល់ទំនុកចិត្ត និងភាពជឿជាក់ចំពោះអតិថិជនទាំងអស់លើគ្រប់វិស័យក្នុងប្រទេសកម្ពុជា ឡាវ និងមីយ៉ាន់ម៉ា។
លោក ជូលៀន ម៉ររ៉េត (Julien Moret) ប្រធានចាត់ការទូទៅ និងផ្នែកបង្កើតយុទ្ធសាស្ត្រទីផ្សារក្រុមហ៊ុន DKSH ប្រចាំប្រទេសកម្ពុជា ឡាវ និងមីយ៉ាន់ម៉ា បានលើកឡើងថា៖ “ការសហការរួមគ្នាជាមួយក្រុមហ៊ុន Hygiena គឺស័ក្ដិសមបំផុតជាមួយនឹងយុទ្ធសាស្រ្តរបស់ពួកយើង ដែលបាននិងកំពុងផ្ដល់នូវផលិតផលបែបបច្ចេកវិទ្យាទំនើបជំនាន់ចុងក្រោយទៅកាន់អតិថិជនរបស់យើង”។ លោកបន្តទៀតថា៖ “ការរួមបញ្ចូលគ្នានូវអ្នកជំនាញទីផ្សារ និងបណ្ដាញចែកចាយដ៏រឹងមាំគួបផ្សំជាមួយផលិតផលបែបនវានុវត្តន៍ យើងរំពឹងថា ភាពជាដៃគូសហការនេះនឹងប្រកបដោយភាពជោគជ័យ ហើយនឹងនាំមកនូវការរីកចម្រើនព្រមទាំងផ្ដល់នូវដំណោះស្រាយដ៏ប្រសើរ ដើម្បីឆ្លើយតបទៅនឹងតម្រូវការរបស់អតិថិជនយើង”។
