ជាព្រឹត្តិការណ៍ថ្មីមួយរបស់ក្រុមហ៊ុនបច្ចេកវិទ្យា Cyber Grow Solution និងក្រុមហ៊ុន ECI Distribution អ្នកចែកចាយម៉ាកយីហោ Dell ផ្តាច់មុខនៅកម្ពុជា បានចាប់ដៃគ្នាណែនាំ ផលិតផលថ្មីជាបច្ចេកវិទ្យាផ្ទុកទិន្នន័យដ៏រឹងមាំបំផុត​សម្រាប់អាជីវកម្មគ្រប់ទំហំ “Dell PowerVault ME5” ។

នៅល្ងាចថ្ងៃទី២២​ ខែវិច្ឆិកា ថ្មីៗនេះក្រុមហ៊ុនបច្ចេកវិទ្យាខ្មែរទាំង២នេះបានសហការគ្នារៀបចំ ធ្វើបទបង្ហាញ ក្រោមប្រធានបទ  “Empowering Business Resilience with Dell PowerVault ME5 Storage Solutions”។ ដោយបទបង្ហាញនោះបានលើកឡើងអំពីគោលបំណងរបស់ក្រុមហ៊ុន ជួយទប់ស្កាត់  បញ្ហាប្រឈមអំពីសុវត្ថិភាពបច្ចេកវិទ្យា​ អំពីទិន្នន័យប្រើប្រាស់ក្នុងប្រព័ន្ធអាជីវកម្មគ្រប់ទំហំ នៅកម្ពុជា។

ថ្លែងនៅកម្មវិធីដាក់ដំណើរការផលិតផលនេះដែរ លោក ប៊ុន ចាន់ឈីម នាយកប្រតិបត្តិរបស់ Cyber Grow Solution បានលើកឡើងអំពីភាពរីករាយនិងជាទីមោទនដែលក្រុមហ៊ុនបច្ចេកវិទ្យាខ្មែរទាំងពីររួមទាំង ECI Distribution បានរួមសហការគ្នាផ្តល់ដំណោះស្រាយបច្ចេកវិទ្យាឱ្យមានសុវត្ថិភាពខ្ពស់ជាងមុនជៀសវាង ពីការបាត់បង់ឬលួចទិន្នន័យ សម្រាប់អាជីវកម្មក្នុងស្រុក។

ខណៈនោះ លោក ញ៉េប ចន្ថា ជាប្រធានគ្រប់គ្រងទូទៅនៃ ECI Distribution  ក៏បានបង្ហាញពីការសាទរចំពោះក្រុមការងារ Cyber Grow Solution ដែលបានសហការគ្នាផ្តល់សេវាកម្មដោះស្រាយ បញ្ហាបច្ចេកវិទ្យានេះដល់ម្ចាស់អាជីវកម្មនៅកម្ពុជាទាំងធំទាំងតូច។

យ៉ាងណាមិញនៅក្នុងបទបង្ហាញដែលធ្វើឡើងរួមជាមួយ អាហារពេលល្ងាចយ៉ាងប្រណីតរបស់ភ្ញៀវកិត្តិយស លោក ម៉េន ប្រាំង ដែលជា Deputy Presale Manager បានបង្ហាញនូវអត្ថប្រយោជន៍សំខាន់ៗនៃផលិតផលបច្ចេកវិទ្យា “Dell PowerVault ME5” យ៉ាងដូច្នេះថា៖

១. មានសមត្ថភាពផ្ទុកទិន្នន័យខ្ពស់៖ Dell PowerVault ME5 មានសមត្ថភាពក្នុងការផ្ទុកទិន្នន័យដ៏ធំទូលាយ   សម្រាប់អាជីវកម្មដែលត្រូវការប្រព័ន្ធផ្ទុកទិន្នន័យដែលអាចទុកចិត្តបាន និងមានសុវត្ថិភាពខ្ពស់តឹងរឹង។

២. សេវាកម្មមានតម្លៃសមរម្យ៖ Dell PowerVault ME5 ជាបច្ចេកវិទ្យាកម្រិតខ្ពស់តែមានតម្លៃសមរម្យ ខណៈការរចនាឡើងគឺសម្រាប់ដំណោះស្រាយអាជីវកម្មដែលត្រូវការចំណាយតិចតែមានប្រសិទ្ធភាពក្នុងការប្រតិបត្តិការ។

៣. ប្រសិទ្ធភាពក្នុងការគ្រប់គ្រងទិន្នន័យ៖ Dell PowerVault ME5 នេះមានសមត្ថភាពអភិវឌ្ឍ ផ្នែកសន្តិសុខ និងប្រសិទ្ធភាពក្នុងការប្រើប្រាស់ទិន្នន័យរបស់អាជីវកម្ម ដែលមានបច្ចេកវិទ្យាស៊េរីថ្មី អាចគ្រប់គ្រងបានដោយងាយស្រួល។

៤. ស្ថិរភាពនិងគុណភាពប្រើប្រាស់៖ មិនត្រឹមតែមានតម្លៃសមរម្យ មានសុវត្ថិភាពខ្ពស់សម្រាប់ប្រត្តិបត្តិការអាជីវកម្ម​ដែលមានទិន្នន័យតឹងរឹងប៉ុណ្ណោះទេ ប៉ុន្តែបច្ចេកវិទ្យានេះក៏អាចមានស្ថិរភាពយូរ គុណភាពប្រើប្រាស់មិនងាយហួសសម័យ សម្រាប់បម្រើគ្រប់ សេវាកម្មស្តង់ដារ តាមបំពេញតម្រូវការរបស់អាជីវកម្ម។

ក្រោយបទបង្ហាញបានបញ្ចប់ទៅដោយរលូននិងអតិថិជនបានបង្ហាញចំណាប់អារម្មណ៍ ភ្ញៀវកិត្តិយសទាំងអស់ក៏បានចូលរួមឆ្លើយសំណួរ (Q&A) យ៉ាងយកចិត្តទុកដាក់ ចំពោះលទ្ធភាពនិងការប្រើប្រាស់ Dell PowerVault ME5 ក្នុងការដោះស្រាយបញ្ហាទិន្នន័យ​ និងទទួលបានវត្ថុអនុស្សាវីរយ៍ធំតូចមុននឹងបន្តអាហារពេលល្ងាចយ៉ាងឆ្ងាញ់ពិសាផងដែរ៕